“Biz dəfələrlə bildirmişik ki, Dağlıq Qarabağ xalqının hüquqları və təhlükəsizliyi məsələsi bizim üçün əsas məsələdir. Biz bütün görüşlərimizdə, o cümlədən beynəlxalq tərəfdaşlarla bu məsələləri qaldırırıq. Lakin Azərbaycan bu məsələni Ermənistanla müzakirə etməyə meylli deyil”.
Bunu Ermənistanın xarici işlər nazirinin mətbuat katibi rəsmi “Armenpress” agentliyinin suallarını cavablandırarkən bildirib.
Onun sözlərinə görə, guya beynəlxalq tərəfdaşlar da belə bir fikrə gəlirlər ki, Dağlıq Qarabağ ermənilərinin təhlükəsizliyi və bütün hüquqlarının müdafiəsi məsələləri aydınlaşdırılmalıdır və bu baxımdan Xankəndi ilə Bakı arasında aparılan müzakirələr beynəlxalq səviyyədə görünən mexanizmin yaradılması ilə vacibdir: “Ermənistan, təbii ki, Azərbaycanla bütün təmaslarında məsələni müzakirə edir”.
Azərbaycan Qarabağ məsələsini öz daxili işi hesab edir, oradakı erməniləri öz vətəndaşı sayır, beynəlxalq hüquq Qarabağı Azərbaycanın bir hissəsi kimi qəbul edir və s. Bütün bunlardan sonra Azərbaycan Qarabağı Ermənistanla niyə müzakirə etməlidir ki? Üstəlik, hansı “Dağlıq Qarabağ xalqından” söhbət gedə bilər ki?
Məsələyə münasibət bildirən Aydınlar Partiyasının sədr müavini Qorxmaz İbrahimlinin fikrincə, Ermənistan rəsmisinin irəli sürdüyü arqumentlərin əsası yoxdur: “Nə hüquqi, nə də siyasi. Azsaylı erməni azlığı ilə bağlı biz niyə Ermənistanla müzakirələr aparmalıyıq ki? Otuz ilə yaxın Azərbaycanla Ermənistan arasında danışıqlar getdi. Bu, nəyisə dəyişdimi? Əksinə, Ermənistan erməni separatizmini təbliğ etmək üçün bütün vasitələrə əl atdı. Azərbaycan ərazisində yaşayan ermənilər tək indi deyil, zaman-zaman ölkəmizə qarşı çıxıblar. Xüsusən də 1920-ci ildə Qarabağda yaşayan ermənilərin qiyam qaldırması tarixdən bəllidir. 80-ci illərin sonlarına doğru SSRİ-də milli azdlıq hərəkatı başlayanda Qarabağda etnik ermənilər bundan sui-istifadə edərək separatçılıq fəaliyyətlərini açıq müstəviyə keçirdilər. Sonra Ermənistanın birbaşa iştirakı ilə Qarabağ və ətraf rayonlar işğal edildi. Ondan sonra 30 ilə yaxın mənasız danışıqlar getdi. Bu müddət ərzində bir qarış belə ərazimiz geri qaytarılmadı. Ən nəhayət, 27 sentyabrda başlanan Vətən müharibəsi nəticəsində Azərbaycanın ərazi bütövlüyü təmin edildi. Ondan sonra da Azərbaycanın mövqeyi ortadadır. Prezident İlham Əliyev dəfələrlə bəyan edib ki, Qarabağdaki etnik ermənilər Azərbaycanın bərabər hüquqlu vətəndaşıdır. Hansı əsasla Qarabağ ermənilərinin taleyi Ermənistanla müzakirə olunmalıdır? Onda belə çıxır ki, Azərbaycanda yaşayan etnik rusların məsələsi Rusiya ilə, yəhudilərin məsələsi İsraillə, polyakların məsələsi Polşa ilə müzakirə edilməlidir. Azərbaycan hüquqi-demokratik dövlətdir və ölkəmiz Konstitusiya çərçivəsində hər bir vətəndaşın milliyətinə, dininə görə deyil, qanuna görə haqlarını tanıyır. Yəni, Konstitusiyaya görə erməni vətəndaşların hüquqları tanınır. Yazıqlar olsun ki, ötən illər ərzində ermənilər bu imkanlardan yararlanmadılar”.
Q.İbrahimli əlavə etdi ki, etnik ermənilərə növbəti dəfə şans verildiyi üçün onlar bundan istifadə etməlidirlər.
Vidadi ORDAHALLI
