Oktyabrın 7-də müxalifətdə olan Azərbaycan Demokratiya və Rifah Partiyası Rusiya hərbçilərinin Azərbaycan ərazisindən çıxarılması tələbi ilə Bakıda piket keçirib.
Onlar Rusiya ordusunun Qarabağdan çıxarılmasını tələb edən sözlər yazılmış plakatları, Azərbaycan və Ukrayna bayraqlarını qaldıraraq "Rədd olsun işğalçı Rusiya ordusu" şüarı səsləndiriblər.
Aksiya iştirakçıları bildirib ki, bu gün Ukraynada kütləvi qətllər törədən hərbçilər Azərbaycanda sülhməramlı ola bilməz. Onların demələrinə görə, Rusiya Azərbaycanda da çoxsaylı faciələr törədib.
Zorge parkında toplaşan və Rusiya səfirliyinin önünə doğru hərəkət edən aksiya iştirakçılarının qarşısını polis əməkdaşları alıb. Ona görə də aksiya iştirakçıları piket qətnaməsini parkda oxuyublar.
Qeyd edək ki, Rusiya rəsmiləri, bir qayda olaraq, Ukraynada dinc mülki insanların kütləvi şəkildə qətli ilə bağlı deyilənləri qəbul etmirlər. Onların iddialarına görə, Ukraynada bu ölkənin neytrallığına nail olmaq üçün xüsusi əməliyyat keçirilir.
Maraqlıdır, Ermənistanla sülh prosesində müəyyən irəliləyişin olduğu nəzərə çarpdığı bir zamanda belə bir aksiyanın keçirilməsi kimin əlinə oynayır?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, bəzi siyasi qüvvələrin Rusiya sülhməramlılarının Qarabağda müvəqqəti yerləşdirilməsi ilə bağlı etiraz bildirməsi heç də başa düşülən deyil: “Xüsusi ilə də belə həssas dönəmdə bənzər addımların atılması təxribat xarakteri daşıyır. Bu, eyni zamanda sülh prosesinin irəliləməsinə maneçilik törətmək istəyən bir haldır. Rusiya sülhməramlıları Azərbaycanın suveren ərazilərində müvəqqəti yerləşdirilib. Məqsəd bölgədə sülh və sabitliyin təmin edilməsidir. Həmin ərazidə etnik ermənilər yaşayır. Orada həm də quruculuq-bərpa işlərinə ermənilərin mane olmaması üçün sülhməramlılar vacib missiya üzərlərinə götürüblər. Azərbaycan buna razılıq verməklə rus qoşunlarını əbədi olaraq Azərbaycana dəvət etməyib. Zamanı gələndə, xüsusilə də Azərbaycanla Ermənistan arasında sülh müqaviləsi imzalanandan sonra onlara ehtiyac olmayacaq. Çünki bölgədə daimi sülh və əminamanlıq yaşanacaq. Ölkədə təxribat yaratmaq istəyən bu radikal dairələrin əməlləri pislənilməlidir. Azərbaycan 10 noyabrda üzərinə götürdüyü bütün öhdəliklərə sadiqlik nümayiş etdirir. Ermənistan isə buna əməl etmir. Həmin öhdəliklərdən biri də sülhməramlıların bölgəyə yerləşməsidir. Biz bu şərtə əməl etməklə etibarlı dövlət olduğumuzu nümayiş etdiririk. Yaxşı olar ki, belə həlledici məqamda bütün siyasi qüvvələr təxribatçı mövqedən deyil, milli maraqlardan çıxış etsin”.
Məhəmmədəli QƏRİBLİ
