Əli Mahmud: “Terrorçu ermənilərin bizim evlərimizi zəbt edib yaşamaqları az cinayət imiş, gedəndə də evlərimizdə tələ-minalar quraşdırıblar ki, insanlarımız tələf olsun”
Ermənilər Laçın rayonunu və onun iki kəndini tərk edərkən burda özlərindən sonra ölüm saçan təhlükələr buraxıb gediblər. Onlar bu ərazilərimizdə də mina terrorunu davam etdiriblər.
Azərbaycan Respublikasının Minatəmizləmə Agentliyindən (ANAMA) verilən məlumata görə, Laçın rayonunun Zabux və Sus kəndlərində evlərin təmizlənməsi əməliyyatları zamanı düşmən tərəfindən quraşdırılan tələ-minalara rast gəlinib. Bildirilib ki, evlərin və həyətyanı sahələrin girişinə quraşdırılan tələ məftili ilə işə düşən, eləcə də PMN-G Ermənistan istehsalı olan minaların altına əl qumbarası yerləşdirilməsi faktları aşkar olunub: “Yüksək partlayışın baş verməsi məqsədilə partlayıcı qurğuları birləşdirməklə faciənin miqyasını böyütmək düşmənin insanlıq əleyhinə düşünülmüş xəyanətkar xislətidir. Bu kimi faktlar Ermənistanın regionda sülhə və təhlükəsizliyə, ətraf mühitə qarşı məkrli niyyətinin davam etdirdiyinin göstəricisidir. Tələ-minaların, ölüm ehtimalını artıran mina-sürprizlərin quraşdırılması Ermənistanın dövlət səviyyəsində mina terroru həyata keçirdiyini bir daha sübut edir”.
Qeyd edilib ki, ANAMA-nın Təmizləmə Qrupları Laçın rayonunda minatəmizləmə əməliyyatlarını davam etdirir.
- “...Terrorçuların quraşdırdığı tələ-minalarla bağlı məsələ beynəlxalq aləmdə ictimailəşdirilməlidir”
“Qarabağa aparan yol” qəzetinin baş redaktoru, tanınmış şair-jurnalist Əli Mahmud “Bakı-Xəbər”ə şərhində bildirdi ki, ermənilərin mina terroruna qarşı beynəlxalq təşkilatlar səviyyəsində ciddi tədbirlər görülməlidir. Əslən Laçından olan bir ziyalı kimi, ermənilərin bu cinayətlərinin cəzasız qaldığına təəssüflənən Ə.Mahmud qeyd etdi ki, Laçın rayonunun Zabux və Sus kəndlərində 1992-ci ildə Laçın Ermənistanın işğalçı qüvvələri tərəfindən qəsb edildikdən və laçınlılar didərgin salınandan sonra Ermənistan dövləti Suriyadan, Livandan və başqa ölkələrdən köçürüb gətirdiyi erməniləri əsasən Laçında məskunlaşdırdı. “Gəlmə ermənilər Yaxın Şərq ölkələrində müxtəlif terrorçu düşərgələrində təlim keçən, terror qruplaşmalarına üzv olanlar idi. Onlar gətirib Laçını və başqa ərazilərimizi terrorçularla doldurdular ki, həm buranı terror yuvasına çevirsinlər, həm də həmin terrorçulardan Azərbaycana qarşı istifadə etsinlər. Laçın şəhərində, Zabux və Sus kəndlərində məskunlaşdırdıqları terrorçu ermənilər bu əraziləri tərk etmək məcburiyyətində qaldıqdan sonra evlərdə, əkin sahələrində, müxtəlif yerlərdə bu kimi tələ-minalar yerləşdiriblər. Terrorçu ermənilərin bizim evlərimizi zəbt edib yaşamaqları az cinayət imiş, gedəndə də evlərimizdə tələ-minalar quraşdırblar ki, insanlarımız tələf olsun. Yəni məqsədləri də o olub ki, camaat öz kəndlərinə, evlərinə qayıtdıqdan sonra minaya düşüb həyatını itirsin, yaxud şikəst olsunlar. Dövlətimizin həyata keçirdiyi tədbirlər nəticəsində aidiyyəti qurum tərəfindən minaların təmizlənməsi əməliyyatları gerçəkləşdirilir. Bilirsiz ki, Laçında düşmən tərəfindən quraşdırılan tələ-minalar da təmizləmə zamanı aşkar edilib. Erməni terrorçuları bu qədər qanlar axıtmaqdan, cinayət etməkdən doymayıb evlərə də tələ-minalar qoyublar. Ermənistanın Azərbaycana qarşı illərdir həyata keçirdiyi mina terroruna dünya laqeyd yanaşmamalıdır. Azərbaycana qarşı haqsız ittihamlar irəli sürən beynəlxalq təşkilatlar, bəzi dövlətlər indi gözlərini açıb Ermənistanın cinayətlərinə baxsınlar. Laçın şəhərində, Sus və Zabux kəndlərində erməni terrorçularının quraşdırdığı tələ-minalarla bağlı məsələ beynəlxalq aləmdə ictimailəşdirilməlidir. Əgər bizim əlaqədar qurumlar vaxtında bu tələ-minaları aşkarlamasaydılar, görün nə qədər insan tələfatı ilə üzləşərdik”.
Ə.Mahmud hesab edir ki, dünyanın aparıcı təşkilatları uzun illərdir erməni vandalizminə susduğu kimi, yeni terror aktlarına, mina terroruna da susurlar. Ə.Mahmud vurğuladı ki, halbuki, Azərbaycan dəfələrlə bu barədə dünyaya çağırış edib, amma Ermənistana qarşı hər hansı bir sənəd qəbul edilməyib, bu ölkəyə cəzalar, sanksiyalar tətbiq edilməyib: “Heç bir beynəlxlq təşkilat terror dövləti Ermənistandan tələb etmir ki, mina terroruna son qoy və tam dəqiq mina xəritələrini Azərbaycana təhvil ver. Bu tələbi edən yoxdur. Görün, nə qədər insanımız Ermənistanın ərazilərimizə “əkdiyi” minaların qurbanı olub. Dünya bunları görüb qiymət versin”-deyə Ə.Mahmud vurğuladı.
İradə SARIYEVA
.jpg)
