Ermənistan Təhlükəsizlik Şurasının katibi Armen Qriqoryan erməni mediasına açıqlamasında bəyan edib ki, guya Azərbaycan sentyabrın 30-dək 17 “erməni əsiri” azad edəcəyini vəd etsə də, üzərinə götürdüyü öhdəlikləri yerinə yetirməyib:
“ABŞ prezidenti Cozef Baydenin milli təhlükəsizlik məsələləri üzrə müşaviri Ceyk Sallivanın təşəbbüsü ilə sentyabrın 27-də Ağ Evdə keçirilən görüşdə mənimlə Azərbaycan prezidentinin köməkçisi Hikmət Hacıyev arasında üçtərəfli razılaşma əldə olundu ki, Azərbaycan sentyabrın 30-dək 17 erməni hərbi əsiri azad edəcək. Söhbət sentyabrda götürülən əsirlərdən gedir. Bildiririk ki, Azərbaycan növbəti dəfə öz öhdəliklərini yerinə yetirə bilməyib”.
Görünən odur ki, A.Qriqoryan ağ yalan danışmaqla beynəlxalq ictimai rəyi aldatmağa, çaşdırmağa çalışır. Bütün bunlarla yanaşı, nəzərə almaq lazımdır ki, 13 sentyabr təxribatında ələ keçən ermənilər hərbi əsir yox, diversantdılar. Onlar Azərbaycana təcavüz edərkən zərərsizləşdirilib. Bu isə o deməkdir ki, onları hərbi əsir saymaq olmaz. Çünki onlar diversant, terrorçudular və sərhədimizi keçib ərazilərimizi minalayıblar. Belələrini hansı əsasla hərbi əsir hesab etmək olar?
“Biz kiməsə söz verəndə ona əməl edirik, verdiyimiz sözdən qaçmırıq”
Məsələyə münasibət bildirən Böyük Azərbaycan Partiyasının sədri Elşad Musayev hesab edir ki, A.Qriqoryanın açıqlaması növbəti erməni həyasızlığıdır: “Ermənilər şər-şəbədə, yalan informasiyalar üzrə adətkardılar. Yalançı gündəm yaradıb ondan şou düzəldirlər və qarşı tərəfi ittiham edirlər. Nəyə əsasən 13 sentyabrda ələ keçən erməni diversantlar hərbi əsir sayılmalıdır? Yaxşı olardı A.Qriqoryan birinci buna aydınlıq gətirsin. Digər tərəfdən, biz kiməsə söz verəndə ona əməl edirik, verdiyimiz sözdən qaçmırıq. Həqiqətən belə bir şey olsaydı, o zaman vasitəşilik edən Ceyk Sallivan da bunu təstiqləyərdi. Başqa bir tərəfdən, Ermənistan illərdir söz verir, amma buna əməl etmir. Bəs buna nə ad qoyasan? Birinci Qarabağ müharibəsində 4 min nəfərədək itkin düşən azərbaycanlı barədə hələ də qarşı tərəf məlumat vermir. Sentyabra qədər bütün Ermənistan ordusu Qarabağdan çıxmalı idi, amma indiyə qədər bu təmin olunmayıb. Zəngəzur dəhlizi açılmalı idi. Ancaq biz görürük ki, Ermənistan dəhliz məsələsində daha da barışmaz mövqe sərgiləyir. O üzdən, ermənilərin nə deməsi elə bir əhəmiyyət kəsb etmir. Onlar davamlı şəkildə yalan danışmaqla məşğuldular. Ona görə də, Azərbaycan öz bildiyini etməlidir. İki ildir deyirəm ki, ermənilərin nə deməsindən asılı olmayaraq Azərbaycan hər gün bir addım irəli getməlidir. Biz hər gün qabağa gedirik və erməniləri də narahat edən budur. Bu səbəbdən hər vəchlə çalışırlar ki, aranı yenidən qatsınlar. Diversantlarla bağlı növbəti “hərbi əsir” şousunu dünyaya sırımaq istəyirlər. Budur onların əsas niyyəti”.
Bir sözlə, partiya sədri hesab edir ki, sözügedən məsələdə Azərbaycan daha sərt tələblərlə çıxış etməlidir.
Vidadi ORDAHALLI
