Məlum olduğu kimi, teleqramın erməni seqmentində erməni əsgərlərinin guya edam edilməsinin videosu paylaşılıb. Guya Azərbaycan hərbçiləri əsir götürülmüş erməni hərbçiləri güllələyib və üstəlik, bu vaxt video çəkiliş aparıb. Aydın məsələdir ki, bu bir tamaşadır və ermənilər özləri qurublar. Çünki qarşı tərəfin Azərbaycan əsgərləri olmasına dair heç bir dəlil yoxdur.
Məsələnin təəccüb doğuran tərəfi odur ki, Avropa İttifaqının Cənubi Qafqaz üzrə xüsusi nümayəndəsi Toivo Klaar bunun nə dərəcədə doğru olub-olmamasını yoxlamadan dərhal öz “Twitter” səhifəsində buna münasibət bildirib Azərbaycana tənqidi fikirlər səsləndirib: “Erməni hərbi əsirlərin edam edildiyini göstərən daha bir dəhşətli video yayılıb. Videonun həqiqiliyi sübuta yetirilərsə, bu hərbi cinayət araşdırılmalı və günahkarlar cəzalandırılmalıdır”.
Düzdür, T.Klaar Azərbaycanla bağlı da paylaşım edib: “Bu gün mənə azərbaycanlılara qarşı törədilmiş hərbi cinayətləri əks etdirən bir neçə video göndərilib. Onlar araşdırılmalı və əgər doğrudursa, təqsirkarlar məsuliyyətə cəlb edilməlidir”.
Ancaq Azərbaycanla bağlı paylaşım məzmun baxımından zəif və ümumi xarakterlidir. İstənilən halda, T.Klaarın saxta bir videoya belə operativ münasibət bildirməsinin özü düşündürücüdür və bir sıra suallar doğurur. Məsələ ondadır ki, müharibə bitəndən sonra 240 nəfərdən çox Azərbaycan vətəndaşı minaya düşüb. Onların bir qismi həlak olub. Digər qismi isə ağır yaralanıb. Ermənistanın verdiyi mina xəritələrinin çoxu saxtadır. Qəribədir ki, bunların heç birnə T.Klaar operativ reaksiya verərək tənqidi mövqedən yanaşmayıb. Bir dəfə də olsun Avropa İttifaqından mülki insanların minadan əzəiyyət çəkməsinə ciddi reaksiya olmayıb. Yəni desin ki, bütün bunlar hərbi cinayətdir. Ancaq erməni tərəfi saxta video yayan kimi, o dəqiqə operativ reaksiya verilir. Halbuki, videonun saxtalığı göz qabağındadır. Burada bir sıra məqsəd var. Başlıca məqsəd odur ki, müharibədən sonra bütün mövqelərdə uduzduqlarını görən ermənilər bu yolla məğlubiyyətlərini kompensasiya etmək istəyir. Digər tərəfdən, “hərbi əsir” adlandırdıqları diversantların Ermənistana təhvil verilməsini sürətləndirmək istəyirlər. Özü də bütün bunların BMT-nin işgəncələrlə mübarizə günü ərəfəsində baş verməsi də çox düşündürücüdür. Aydın məsələdir ki, sözügedən video Ermənistan xüsusi xidmət orqanları tərəfindən hazırlanıb. Üstəlik, bunda Fransadaki ermənipərəst dairələrin də bu və ya digər formada iştirakı, müəyyən texniki yardım göstərmələri də istisna olunmur.
Maraqlıdır, T.Klaar Azərbaycan əsgəri ilə bağlı saxta videoya münasibət bildirərkən bunu hərbi cinayət hesab edir, Azərbaycanın təqdim etdiyi videoya isə yumşaq reaksiya verir və bunun araşdırılmasını məqsədəuyğun hesab edir. O baxımdan, T.Klaarın bu ikili yanaşması nə ilə izah oluna bilər?
“Bunlar istəyir ki, Azərbaycan qalib olduğu halda məğlub duruma düşsün”
Məsələyə münasibət bildirən AMİP funksioneri Əli Orucovun fikrincə, bütün bunlarda məqsəd odur ki, Ermənistan zəif mövqedə olmasın: “Qərbin əsas məqsədlərindən biri budur. Ona görə də, Avropa İttifaqının məlum təsisatları, onları təmsil edənlər Azərbaycana qarşı qərəzli mövqedən çıxış edirlər. Otuz ilə yaxın Ermənistanın işğalçılıq siyasətini, törətdiyi vandallıq aktlarını görməzdən gəldilər. Elə ki, Azərbaycan hərb yolu ilə ərazlərin böyük bir qismini işğaldan azad etdi, o dəqiqə erməni “hərbi əsirlər”in hüquqlarının, Qarabağda erməni “mədəni irsi”nin qorunması bunların yadına düşdü. Yaxşı. bəs onda ucu-bucağı görünməyən ərazilərin necə gəldi minalanması Avropanı niyə bu qədər narahat etmir? Halbuki, bu səbəbdən məcburi köçkünlərin öz yurdlarına qayıdışı yubanır. Nədənsə T.Klaar bu barədə bir kəlmə də söz açmır. Çünki Ermənistanın cəzalandırılması bunlara sərf etmir. Bunlar istəyir ki, Azərbaycan qalib olduğu halda məğlub duruma düşsün”.
Bu baxımdan partiya funksioneri hesab edir ki, Azərbaycana qarşı bənzər haqsızlıqlar bununla yekunlaşmayacaq.
Vidadi ORDAHALLI
