Toyvo Klaar kimilərin belə ikibaşlı sözləri Ermənistanı həvəsləndirir - sülhü zorla qəbul etdirmək pisdir?

Avropa İttifaqının Cənubi Qafqaz üzrə xüsusi nümayəndəsi Toyvo Klaar Twitter səhifəsində sərhəddə baş verən toqquşmalara toxunub.

T.Klaar sosial media hesabında yaydığı fikirləri ilə bir növ dolayı da olsa topu Azərbaycana atıb: “Bu gün üç erməni əsgərin həlak olması və bir azərbaycanlının yaralanması barədə xəbərlər daxil olub. Bu və bir çox digər mənasız qurbanlar nifrəti və qeyri-sabitliyi artırır. Təhlükəsizlik həqiqətən də o halda mümkündür ki, sərhədlərə əməl olunsun və qoşunlar bir-birinə yaxın məsafədə olmasın. Sülhü zorla qəbul etdirmək olmaz ”.

Sanki Klaar demək istəyir ki, Azərbaycan sərhədə əməl etmir. Sonra deyir “sülhü zorla qəbul etmək olmaz”. İşarə edir ki, Azərbaycan zorla Ermənistana sülhü qəbul etdirmək istəyir. Əslində bu kimi ədalətsiz yanaşmalar Ermənistanda revanşizmi körükləyir və hakimiyyətin danışıqlarda destruktiv mövqedən çıxış etməsinə rəvac verir. Məsələ ondadır ki, Ermənistan üzərinə götürdüyü öhdəliklərə xoşluqla əməl etmirsə, o zaman bu ölkənin zor gücü ilə sülhə məcbur edilməsinin nəyi pisdir?

• “Ermənistanı məcbur etmək lazımdır ki, Azərbaycanla sülh müqaviləsi imzalasın, sərhədləri dəqiqləşdirsin”

Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, belə çağırışlar bir növ revanşist ermənilərin həvəslənməsinə xidmət edir: “İstər Avropa İttifaqı, istərsə də ABŞ-ın timsalında belə açıqlamalar regionda sülhə və sabitliyə xidmət etmir. Əksinə, bütün bunlara zərər vurur. Azərbaycan ərazilərini 30 il işğal altında saxlayan Ermənistanı görməzdən gələn aparıcı güclər məsələyə başqa rəng qatmağa çalışırlar. Yəni Azərbaycanın öz suverenliyini qorumasını, sərhədlərini dəqiqləşdirməsini qəbul etmək istəmirlər. Toyvo Klaarın məlum açıqlaması bunun nümunəsidir. Hər vasitə ilə çalışırlar ki, regionda öz iştiraklarını genişləndirsinlər. Daha konkret desək, Rusiyanı, Türkiyəni regiondan çıxarsınlar və təkbaşına öz bildiklərini etsinlər. Bunun üçün də ermənipərəst mövqedən istifadə edirlər, erməniləri həvəsləndirirlər, şirnikləndirirlər. Bu da, öz növbəsində, erməni təxribatlarının artmasına, regionda sabitliyin pozulmasına xidmət edir. Məqsəd odur ki, bu minvalla regiona daxil olsunlar. Fikrimcə, regiona daxil olmaq üçün belə təxribatlardan istifadə etmək doğru deyil. Sadəcə, Ermənistanı məcbur etmək lazımdır ki, Azərbaycanla sülh müqaviləsi imzalasın, sərhədləri dəqiqləşdirsin. Ondan sonra sərhəddə hansısa münaqişə baş verərsə, o zaman münasibət bildirmək olar. Bu gün Ermənistan sərhədlərin dəqiqləşdirilməsindən qaçır. Azərbaycan da əlindəki xəritələrdən istifadə edərək ərazilərini nəzarətə götürür. Bunun nəyi qəbahətdir? O üzdən, Azərbaycan barəsində belə fikirlərin səslənməsi yolverilməzdir. Çünki bu, təcavüzkarı daha da şirnikləndirir”.

Partiya sədri onu da əlavə etdi ki, bu kimi çağırışlar sülhə fayda vermir.

Vidadi ORDAHALLI