Zaxarova Ermənistanın KTMT təlimlərindən imtinasını sadəcə "malaladı"...

Rusiya Xarici İşlər Nazirliyinin (XİN) rəsmi nümayəndəsi Mariya Zaxarova sərhəddəki gərginliyə görə Kollektiv Təhlükəsizlik Müqaviləsi Təşkilatının (KTMT) Ermənistana birbaşa hərbi yardım göndərməməsi, vəziyyəti araşdırma missiyası göndərməsi ilə bağlı suala aydınlıq gətirib.

Zaxarova erməni jurnalistin “Vəziyyət nə qədər gərginləməlidir ki, KTMT əhəmiyyətli müdaxilə eləsin” sualına cavab olaraq KTMT-nin xüsusi missiyasının göndərilməsinin bu təşkilatın əhəmiyyətli müdaxilə imkanı olduğunu vurğulayıb: “İkinci məqam isə, əminəm ki, bu sual Rusiyaya ünvanlanmamalıdır. Ona görə ki, son iki ildə bizim ölkə tərəfindən çoxillik köhnəlmiş böhranı həll etmək üçün çoxlu işlər görülüb. Bunlar kağız üzərində edilməyib, “yerdə” edilib. Başa düşürəm ki, belə ağır vəziyyətlərdə hamı sehrli çubuğun müdaxilə edib problemi həll etməsini istəyir. Lakin bu, ancaq nağıllarda olur”.

Mariya Zaxarova  keçirdiyi brifinqdə həm də deyib ki, ayrı-ayrı siyasi xadimlər tərəfindən KTMT-nin ünvanına səsləndirilən əsassız tənqidlər qarşılıqlı sərfəli qərarların qəbul edilməsinə fayda gətirmir: “Stanislav Zas Ermənistan Baş naziri Paşinyana Ermənistanın təklifi ilə 15-23 sentyabr tarixində baş tutmuş KTMT missiyasının işinin yekun qiymətləndirmələrini təqdim edəcək. KTMT Baş katibinin rəhbərlik etdiyi missiya ekspertlərlə birlikdə Ermənistan-Azərbaycan sərhədində olub, yerdəki vəziyyəti qiymətləndiriblər. O ki qaldı İrəvan tərəfindən KTMT-nin Qazaxıstanda keçirilən hərbi təlimlərinə hərbi kontingent göndərməmək qərarına, düşünürəm ki, bu məsələdə Ermənistan özü və silahlı qüvvələri qarşısında duran vəzifələrdən hazırkı vəziyyəti nəzərə alaraq çıxış edir. Bu onun suveren hüququdur”.

Bəllidir ki, Ermənistanın KTMT təlimlərində iştirak etməməsinin səbəbi heç də Zaxarovanın verdiyi izahatla bağlı deyil. Belə olan təqdirdə, Zaxarova niyə Ermənistanın addımlarını malalamağa çalışır?

Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan  Kollektiv Təhlükəsizlik Müqaviləsi Təşkilatının konfliktə müdaxilə etmək üçün təxribat-zəminlər hazırlasa da, bu nəticə vermədiyi üçün son günlər gah KTMT-dən çıxacağını bəyan edir, gah da təşkilatın fəaliyyətinə maneələr yaradır, təlimlərdə iştirakdan imtina edir:

“Bir sözlə, hər vəchlə KTMT-ni öz tərxribatlarını dəstəkləməyə cəhdlər edir. Müraciətlərdən sonra KTMT 15-23 sentyabr tarixində Ermənistana manitorinq üçün missiya göndərdi. KTMT Baş katibinin rəhbərlik etdiyi missiya ekspertlərlə birlikdə Ermənistan-Azərbaycan sərhədində olub, yerdəki vəziyyəti qiymətləndiriblər. Ermənistan və rəsmilərinin Kollektiv Təhlükəsizlik Müqaviləsi Təşkilatından ölkənin çıxacağı iddiaları, Qazaxıstanda keçirilən hərbi təlimlərdə iştirak etməyəcəyi ilə bağlı fikirləri  işinin yekun qiymətləndirməsini hələ təqdim etməmiş KTMT missiyasına Ermənistanın xeyrinə rəy verməsi üçün təzyiq cəhdlərindən başqa nəsə deyil.

Aydın məsələdir ki, Ermənistan başı onsuz da digər regionlarda ciddi problemlərə qarışan  Rusiyanı KTMT-nin timsalında yeni bir münaqişəyə cəlb etməyə  calışır. Həm də dünayada təklənən Rusiyanı tərəfdaşı Türkiyə ilə münasibətlərini  korlamağa hədəflənmiş addımlar atır.

Zaxarovanın və ümumilikdə Rusiya XİN-in Ermənistanın bu addımlarını görməzdən  gəlməsi isə rəhbəri erməni olan nazirliyin ümümi xətti kimi qəbul edilməlidir.

İstər Zaxarova, istər Rusiya XİN  digər məslələrdə bəzən emosional, çox vaxt sərt təhrikçi mövqelər sərgiləsələr də, Ermənistana mümasibətdə belə mövqe göstərmirlər.

Burada, əlbəttə, Zaxarovanın özünün də erməni sevgisi az rol oynamır.

Nümünə üçün 24 aprel “erməni soyqrımı” qurbanlarının anım günü Zaxarovanın facebook statusunu göstərə bilərik. “Kimsə “soyqırım”ı tanımır, kimsə faciə qurbanlarının sayını şübhə altına alır. Harada olmağımızdan asılı olmayaraq, bu gün bütün ürəyimlə erməni xalqının yanındayam”, - deyə erməni sevgisini ifadə etmişdi. Bu, Zaxarovanın ermənilərə açıq şəkildə sevgisini ifadə etdiyi çoxsaylı açıqlamalarından yalnız biridir”.

Məhəmmədəli QƏRİBLİ