ABŞ Konqresinə Azərbaycan əleyhinə böhtançı erməni qətnaməsi daxil oldu...
Son vaxtlar ABŞ Konqresində Azərbaycana qarşı müxtəlif fəaliyyətlər nəzərəçarpacaq dərəcədə artıb. Xüsusən də Konqresin Nümayəndələr Palatasında bu özünü daha çox göstərir. Əsasən ermənipərəst konqresmənlər Azərbaycanı daha çox ittiham edirlər.
Ermənistanın 13 sentyabrda Azərbaycanla sərhəddə törətdiyi təxribatdan sonra isə bu tendensiya daha da artıb. Bu arada Konqresə 13 sentyabrla bağlı Azərbaycanın məsuliyyətə cəlb olunmasını tələb edən qətnamə təqdim edilib. Bir neçə konqresmen Azərbaycanın erməni hərbçilərinə və mülki şəxslərə qarşı “cinayətlərini” pisləyən qətnaməni rəsmən təqdim ediblər. Sənəddə Azərbaycanın uzun müddətdir ki, erməni hərbçilərinə və mülki şəxslərə qarşı “vəhşiliklər” törətdiyi, hərbçilərinin öldürülən erməni əsgərlərinin meyitlərinin başlarını kəsdiyi, tibb müəssisələrini və dini obyektləri atəşə tutduğu bildirilir.
Aydın məsələdir ki, sənəddə əksini tapan məqamlar iftira xarakterlidir və reallıqla heç bir əlaqəsi yoxdur. O zaman maraqlıdır, Konqresdə Azərbaycana qarşı fəaliyyətin intensivləşməsi nə ilə bağlıdır?
- “Məsələnin ikinci tərəfi onunla bağlıdır ki, ABŞ Cənubi Qafqaz uğrunda geosiyasi mübarizə aparır”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayev hesab edir ki, ermənipərəst konqresmenlərin aşırı canfəşanlığı əsasən qarşıdan gələn seçkilərlə bağlıdır: “Belə qərəzli fəaliyyət birinci növbədə seçkilərlə bağlıdır. Məsələ ondadır ki, bütövlükdə Nümayəndələr Palatası və Senatın üçdə biri noyabrda keçiriləcək seçkilərə hazırlaşır. ABŞ-ın bəzi ştatlarında erməni əsilli seçicilər kompakt yaşayır. Erməni diasporu da bundan maksimum öz məqsədləri üçün istifadə edir. Nəzərə almalıyıq ki, Nensi Pelosi uzun illərdir ermənilərin himayəsi ilə Konqresdə təmsil olunur. Onun Nümayəndələr Palatasına təsir imkanı var. Bu səbəbdən Ermənistandan bir vasitə kimi istifadə edib Azərbaycana qarşı qətnamə qəbul etmək istəyirlər. Məsələnin ikinci tərəfi onunla bağlıdır ki, ABŞ Cənubi Qafqaz uğrunda geosiyasi mübarizə aparır. Məhz bu minvalla Ermənistanı Rusiyadan qoparmaq istəyirlər. Çünki Birləşmiş Ştatlar 10 noyabr razılaşmasından sonra Rusiyanın Azərbaycan və Ermənistan arasında əsas vasitəçi olmasını qəbul etmək istəmir. Yəni konqresmenlərin Azərbaycanla bağlı qərəzli çağırışlarla çıxış etməsinin kökündə geosiyasi faktorların da rolu var. Biz nəzərə almalıyıq ki, dünyada gərginlik artır. Xüsusən də Ukraynada gedən proseslər fonunda bu özünü daha çox göstərir. Ona görə də bu amili də nəzərə almaq lazımdır. Uzun illər demokratiyanın müdafiəçisi kimi özünü göstərən ABŞ indi bir sıra məsələlərdən bir alət kimi istifadə edir. Son aylar Ermənistanın artan təxribatlarının arxasında ABŞ-dakı müəyyən dairələrin də rolu ola bilər”.
İstənilən halda, Əli Mustafayev hesab edir ki, Konqresdə Azərbaycana qarşı çağırışlar qəbuledilməzdir.
Vidadi ORDAHALLI
