Ermənistandan müharibə anonsu - "...əmr almışıq…”
Ermənistan Silahlı Qüvvələrinin Baş Qərargah rəisinin müavini, general-mayor Arakel Martikyan açıqlama verərək absurd fikirlər səsləndirib.
Martikyan Ermənistan Ordusunun yeni hücum gözlədiyini, Azərbaycan Ordusu ilə qarşı-qarşıya gəlib qələbə qazanmağa hazırlaşdığını deyib: “Ermənistan Silahlı Qüvvələri yeni hücum gözləyir və Azərbaycan qüvvələri ilə üz-üzə gəlməyə və onları məğlub etməyə hazırlaşır".
Arakel Martikyan daha sonra bunları deyib: “Azərbaycan Vardenis istiqamətində strateji baxımdan önəmli olan bir neçə döyüş mövqeyini ələ keçirə bilib. Ən böyük ərazi itkiləri Cermuk istiqamətində olub. İtirdiyimiz ərazilər taktiki baxımdan o qədər də vacib deyil, amma strateji baxımdan önəmlidir: onlar düz bizim yaşayış məntəqələrimizin üstündə yerləşir. Hazırki vəziyyətdə düşmən yollarımıza, marşrutlarımıza müəyyən nəzarət yarada bilib.
Göründüyü kimi, Ermənistan hərbi rəhbərliyi Azərbaycanı yeni müharibə ilə hədələyir. Bu, Ermənistanın regionda sülhə təhdid yaratdığının, sülhdən boyun qaçırdığının ən bariz nümunəsi sayıla bilərmi?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Ermənistan nə etdiyini bilmir, ard-arda səhvlər buraxır: “Həyatda da belədir. Əvvəl etdiyin səhvləri sonra nə qədər etsən də düzəldə bilmirsən. Oyunu uduzmaq məcburiyyətində qalırsan. Ermənistan hansı gücünə, ordusuna arxayındır? Ancaq xaricdən gələn vədlərə arxayın olur. Unudublar ki, 2016-cı ildə böyük zərbə aldılar. 2020-ci ildə isə Ermənistan ordusu darmadağın edildi. Hər etdiyi təxribatlarda da böyük itkilər verir. Hazırda Ermənistan gülünc vəziyyətdədir. Onlarda ağıl, məntiq yoxdur. Onların birinci prezidentinin zamanında bizim torpaqlarımız işğal olunub. Bəziləri deyir ki, o humanistdir. Amma qətiyyən belə deyil. Ermənistan prezidentlərinin hər biri cinayətkardır. Deyirlər ki, Türkiyə və Azərbaycanla münasibətlər normallaşmasa Ermənistan dövlətçiliyi sual altında olar. Zamanında Amerikaya, Rusiyaya, Fransaya arxayın olub nə edə bildilər? Heç nə! İndi isə Azərbaycanın ən güclü zamanında Ermənistan heç bir şey edə bilməz. Azərbaycanın Türkiyə, Pakistan kimi müttəfiqləri var. Dünya dövlətlərinin əksəriyyəti bizi dəstəkləyir. Bunların hamısı ona görədir ki, hələ də ermənilər öz xam xəyallarından əl çəkə bilmirlər. Bu vəziyyətin reallığını görə bilmirlər. Amma Azərbaycan ordusu onların gözlərini açacaq. Bu xəstə təxəyyülün müalicəsinin yolu Azərbaycan əsgərinin gücündən keçir. Zaman-zaman da dəmir yumruq onların başına dəyir”.
Arakel Martikyanın açıqlamasından belə məlum olur ki, Ermənistan Azərbaycan ordusunu sərhəddə əvvəlki mövqelərə qaytarmaq üçün hücuma hazırlaşır. Qeyd edək ki, hakim “Mülki müqavilə” fraksiyasının deputatı, parlamentin müdafiə və təhlükəsizlik məsələləri üzrə komissiyanın rəhbəri Andranik Köçəryan bugünkü açılqlamasında bildirib ki, Ermənistan bütün mümkün ölkələrdə ehtiyaclarını ödəyə biləcək silahlar axtarır. Xatırladaq ki, Ermənistan-Azərbaycan sərhədində son insident sentyabrın 28-də baş verib. Ermənistan hərbi birləşmələri Kəlbəcər istiqamətində təxribata əl atıb. Nəticədə Azərbaycan tərəfi düşmənə layiqli cavab verib. Bu insident zamanı Azərbaycan tərəfdən bir əsgər yaralanıb. Ermənistanın isə 3 hərbi qulluqçusu ölüb.
Məhəmmədəli QƏRİBLİ
