“Müttəfiq ölkələr Ermənistana silah tədarükü ilə bağlı öhdəliklərini yerinə yetirmirlər”. Bu barədə Ermənistanın baş naziri Nikol Paşinyan hökumətin iclasında bildirib.
Paşinyanın sözlərinə görə, Azərbaycan silah və sursatın Ermənistana çatdırılmaması üçün əlindən gələni edir. Azərbaycan imkan daxilində bütün istiqamətlərdə, o cümlədən müttəfiqlər tərəfindən silah tədarükünün qarşısını alır: “Yüz milyonlarla dollar ödənilib, lakin Ermənistana silah tədarükü ilə bağlı öhdəliklər, o cümlədən müttəfiq ölkələr tərəfindən öhdəliklər yerinə yetirilmir. Bu sırada müttəfiq ölkələr də var. Bu, şübhəsiz ki, ağrılı reallıqdır, biz bu vəziyyəti dərindən təhlil etməliyik. Azərbaycanın Ermənistanın müttəfiqlərilə daha yaxşı münasibətləri var. Onlar elə etməyə çalışırlar ki, Ermənistana silah və sursat göndərilməsin. Bu, əlbəttə ki, acı reallıqdır. Və biz bu vəziyyəti dərindən təhlil etməliyik”.
Paşinyan iddia edib ki, bu, “erməni tərəfinin öz dövlətçiliyindən, öz suverenliyindən əl çəkməsi, ərazi bütövlüyü məsələlərində güzəştə getməsi” məqsədilə edilir.
Qeyd edək ki, Ermənistanın əsas silah təchizatçısı Rusiyadır. Bu, Paşinyanın Moskvaya qarşı ittihamlar səsləndirdiyi ikinci açıq bəyanatdır. Bütün hallarda, Azərbaycanın Ermənistanın hətta müttəfiqlərini bu ölkəyə silah satmaqdan çəkindirdiyi barədə deyilənləri ekspertlər necə dəyərləndirir?
“Elə dövlətlər var ki, məsələyə məhz bu kontekstdən yanaşır”
Məsələyə münasibət bildirən hərbi ekspert İbrahim Rüstəmli buna bir neçə aspektdən yanaşdı: “Əvvəla, Azərbaycan həm yerli, həm də beynəlxalq hüququn təminatçısı rolunda çıxış edir. Azərbaycan əməkdaşlıq etdiyi ölkələrlə ciddi tərəfdaşdır. Ölkəmiz hərbi müstəvidə Ermənistandan üstün səviyyədədir. Bəli, Azərbaycan Ermənistanla müttəfiq olan dövlətlərlə çox yaxşı əlaqələrə malikdir. Elə dövlətlər var ki, məsələyə məhz bu konteksdən yanaşırlar. Yəni həmin dövlətlər üçün hansı ölkəyə silah satmağın önəmi çox böyükdür. Bu mənada ölkəmizə üstünlük verilməsi əslində Azərbaycanın beynəlxalq hüququn təminatçısı qismində çıxış etməsi ilə əlaqədardır. Azərbaycan zaman-zaman beynəlxalq tribunalarda Ermənistanın işğalçı ölkə olmasını qabardıb. Sözügedən məsələlərdə prinsipial mövqedən çıxış edib. Fakt ondan ibarətdir ki, Ermənistan təcavüzkar ölkə olduğu üçün bir sıra ölkələr ona silah satmaq istəmir. Ona görə də sözügedən amili görməzdən gəlmək olmaz. Üstəlik, Ermənistanın elə bir iqtisadi imkanları da yoxdur ki, müasir silah sistemlərini əldə edə bilsin. Digər tərəfdən, Ermənistanın silah alışı ilə bağlı davamlı, stabil prioritetləri yoxdur”.
Bir sözlə, hərbi ekspert hesab edir ki, Ermənistan bu vəziyyətdən yaxın perspektivdə çıxa bilməyəcək.
Vidadi ORDAHALLI
