Paşinyan "silah ala bilmirik" deyir, Hindistan 20 milyard rupilik silah satır...

Ramil Məmmədli: “Burada mənfi amillərdən biri də odur ki, Hindistan Ermənistana müdafiə deyil, hücum silahlarının satışını həyata keçirir”

img

Hindistan Ermənistana 20 milyard rupi (244,7 milyon dollar) dəyərində silah və sursat partiyası verəcək. Bu  barədə nüfuzlu KİV-lər məlumat yayıb. Silah satışı iki ölkə arasında sentyabrın əvvəlində imzalanmış müqavilələr əsasında həyata keçiriləcək.

Müqaviləyə uyğun olaraq Hindistan Ermənistana xaricə ilk dəfə satılacaq öz dizaynlı Pinaka reaktiv yaylım atəş sistemləri (MLRS), həmçinin tank əleyhinə raketlər və sursat partiyası verəcək.

Qeyd edək ki, bu, Hindistanın Ermənistana ilk silah partiyası deyil - 2020-ci ildə Hindistan Ermənistana dörd Svati artilleriya kəşfiyyat qurğusu təhvil verib.

Narendra Modinin hökuməti hakimiyyətə gəldiyi 2014-cü ildən bəri Hindistandan silah tədarükünün həcmi yeddi dəfədən çox artıb. Ölkənin Müdafiə Nazirliyinin məlumatına görə, silah-sursat ixracı 2014-2015-ci maliyyə ilindəki 256 milyon dollardan 2021-2022-ci maliyyə ilində 1,528 milyard dollara yüksəlib. Bu rəqəmləri nəzərə alanda, Hindistanın xaricə ixrac etdiyi silah-sursatın 6-da biri Ermənistana verilib.

Hindistanın bu addımını necə dəyərləndirmək olar?

Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Ermənistanla Hindistan arasında hərbi texniki əməkdaşlığın, silah və sursat vasitələrinin satın alınması istiqamətində əməkdaşlığın mövcud olmasının səbəbi Cənubi Qafqazda Hindistanın özünə hərbi-strateji müttəfiq axtarması ilə bağlıdır. Bilirik ki, son illərdə bu sahədə Hindistan sürətlə inkişaf edən ölkədir. Hərbi təyinat vasitələrinin istehsalı, modelləşdirilməsi istiqamətində bir sıra addımlar atıb. Əlbəttə, Ermənistan Azərbaycanla münasibəti o qədər normal olmayan ölkələrlə əməkdaşlıqda həmişə maraqlı olub. Və bu istiqamətdə də müəyyən addımlar atır. Hindistanla əməkdaşlıqda məhz Azərbaycanın Pakistanla dərin münasibətlərinin olması hərbi strateji müttəfiq olması ilə bağlıdır. Hindistanla Pakistan arasında uzun illərdir Kəşmir məsələsinə görə ciddi problem mövcuddur. Hindistanın da Cənubi Qafqazda özünün düşməni ilə müttəfiq olan bir ölkəyə qarşı belə bir addım atması normal haldır. Hər halda, məsələnin başqa bir tərəfi də var. Hindistan anlamalıdır ki, Ermənistan işğalçı bir ölkədir və belə olan təqdirdə Ermənistanla işğala məruz qalan ölkəyə qarşı hərbi-texniki sahədə əməkdaşlıq etmək beynəlxalq qaydalara uyğun deyil. Belə başa düşülür ki, Hindistan da bu işğalı dəstəkləyir. Azərbaycan alternativ olaraq Hindistana təzyiq vasitələrini əsas götürməlidir. Bu istiqamətdə Hindistana təzyiq edə biləcək ölkə hazırda Rusiyadır. Rusiya ilə bu məsələlər müzakirə olunmalıdır. Digər tərəfdən burada mənfi amillərdən biri də odur ki, Hindistan Ermənistana müdafiə silahları deyil, hücum silahlarının satışını həyata keçirir. Bu isə, bir daha qeyd edirəm ki, Hindistanın riyakar mövqeyini nümayiş etdirir. Bu, Azərbaycanın Pakistanla olan hərbi-siyasi, hərbi-texniki əməkdaşlığı ilə bağlıdır. Belə bir vəziyyətdə Pakistan Azərbaycana daha effektiv silah və texnikaların təminatını həyata keçirməlidir. Çünki Azərbaycanın Hindistanla diplomatik münasibətlərinin korlanmasının səbəbkarı Pakistanla olan əməkdaşlıqdır. Pakistan çox ciddi olaraq sözdə yox, əməldə  bunu nəzərə almalıdır”.

Məhəmmədəli QƏRİBLİ

Peşə etikası

Son xəbərlər