Köçəryandan məcburi şok etiraf – Qarabağın müstəqilliyi mümkünsüzdür...

Afsəddin Nəbiyev: “Onun etiraf çıxışı Azərbaycanın hərbi-siyasi uğurlarının nəticəsində ortaya çıxdı”

img

Ermənistanın ikinci prezidenti Robert Köçəryan keçirdiyi mətbuat konfransında işarə edib ki, separatçılar Bakı ilə birbaşa dialoqa çalışmalıdır. O eyham vurub ki, hazırkı şərtlər altında Qarabağın “müstəqilliyi” mümkünsüzdür.

Köçəryan arqumentlərini belə əsaslandırıb: “Əgər hər şey belə davam edərsə, sonrakı danışıqlar prosesi aşağıdakı formatda olacaq: “Bakı-Xankəndi və müəyyən mənada Moskva. Belə formatın gələcək nəticələrini qiymətləndirmək üçün ekspertlərimizi və jurnalistlərimizi dəvət edəcəyəm. Qarabağın Azərbaycandan asılılığı artıb. Azərbaycan Ermənistanla Qarabağı birləşdirən yeni yol çəkib, ancaq kommunikasiya xətləri köhnə yoldan keçir və onlara Azərbaycan nəzarət edir. Yeni yolla paralel olaraq Xankəndiyə qaz xəttinin çəkilməməsi, elektrik dirəklərinin yerinin dəyişməməsi, əvvəlki rabitə kabellərinin köhnə yolda qalması elə bir asılılıq yaradır ki, Azərbaycan hər an Qarabağdakı erməniləri dalana dirəyə bilər. Buna görə Qarabağı idarə edənlərin Bakı ilə əməkdaşlığa ehtiyacı var”.

Görünən odur ki, Köçəryan acı reallıqla barışmaq zorunda qalıb.

  • “Mövcud reallıqlar ondan ibarətdir ki, heç bir perspektivi olmayan Ermənistan hansısa bir dövlətə gərəkli deyil”

Məsələyə münasibət bildirən AMİP-in sədr müavini Afsəddin Nəbiyevin fikrincə, bir sıra faktorlar Köçəryanı belə bir etirafa məcbur edib: “Robert Köçəryanın son məğlubiyyət çıxışı Azərbaycanın hərbi-siyasi uğurlarının nəticəsində ortaya çıxdı. Qısaca olaraq tarixə nəzər salsaq, Robert Köçəryan 1990-cı illərdə Azərbaycanın dinc əhalisinə qarşı törədilmiş cinayətlərə birbaşa rəhbərlik etmiş şəxsdir. Köçəryan Rusiyaya böyük ümüd bağlayırdı. Düşünürdü ki, Rusiya Ermənistanı nə olursa-olsun xilas edəcək. Ancaq mövcud reallıqlar ondan ibarətdir ki, heç bir perspektivi olmayan Ermənistan hansısa bir dövlətə gərəkli deyil. Bunu anlayan Köçəryan 30 ildən sonra etiraf etdi ki, indiyədək apardığı siyasət əslində Ermənistanı uçurumun dibinə sürükləyib. Nəhayət anlamağa başlayıb ki, Nikol Paşinyanın sülh təşəbbüslərinə dəstək verəcəyi halda bəlkə öz mövcudluğunu qoruyub saxlaya bilər. Bəs nə baş verdi ki, Robert Köçəryan reallıqları qəbul etmək məcburiyyətində qaldı? Bu sualın cavabı çox sadədir. Ermənistan siyasətçilərinin uzun illər apardığı yanlış siyasət nəticəsində iqtidarlı-müxalifətli onlar ağır məğlubiyyətə düçar oldular. İndiki vəziyyətdə dərk etməyə başlayıblar ki, Ermənistanın Azərbaycanın təqdim etdiyi sülh danışıqlarını qəbul etməkdən başqa heç bir yolu qalmayıb. Ona görə də Köçəryan Paşinyanın sülh təşəbbüslərini dəstəkləmək məcburiyyətində qalıb. Hesab edirəm ki, Azərbaycan dövləti indiyədək apardığı incə uğurlu siyasətini davam etdirməlidir. Məhz belə də olacaq. Çünki Ermənistan dilemma qarşısındadır. Ya Azərbaycanın təqdim etdiyi sülh üçün prinsipial 5 prinsipi qəbul etməlidir, ya da dövlət statusunu itirməli olacaq”.

Vidadi ORDAHALLI

Peşə etikası

Son xəbərlər