Bölgəmizdə uzunmüddətli gərginliyi saxlamaqda Ermənistanın əsas hədəfi - beynəlxalq rəyi Bakıya qarşı çevirmək planı...

Xəyal Bəşirov: “Ermənistan öhdəliklərindən yayınaraq regionda davamlı gərginlikdə maraqlıdır”

img

Ermənistan müharibədən sonra 10 noyabr 2020-ci ildə imzalanan sənədin demək olar heç bir müddəasını icra etməməklə bu bölgədə gərginliyin uzun müddət saxlanılmasında maraqlı olduğunu göstərir. Ermənistanın atdığı addımlar bunu deməyə əsas verir.

Əvvəla, ölkədə revanşist qüvvələrin fəaliyyətini gücləndirir. İstər hakimiyyətdə, istərsə də müxalifətdə revanşizm meylləri sönmək bilmir. Sərhədlərdə təxribatlar törədilir və bu, davamlı hal alıb. 10 noyabr sənədinin demək olar heç bir bəndi yerinə yetirilməyib. Kommunikasiyalar açılmayıb. Ən əsası odur ki, Qarabağdan qanunsuz silahlı dəstələrin çıxarılması ilə bağlı verilən müddətlər başa çatsa da, bu öhdəliyə əməl olunmayıb. Bundan əvvəl demişdilər ki, Ermənistan ordusu sentyabra qədər Qarabağdan tam çıxarılacaq. Ancaq bu baş vermədi. Halbuki, Azərbaycan nə qədər öhdəlik yerinə yetirib və digər məsələlərlə bağlı səy göstərir. Bütün bunlar onu göstərir ki, Ermənistan bölgədə gərginliyin uzun müddət saxlanılmasında maraqlıdır. Bu gərginliyin saxlanılmasında Ermənistanın əsas hədəfi beynəlxalq ictimai rəyi manipulyasiya etmək və dünyaya göstərməkdir ki, Azərbaycan regionda sabitliyin, sülhün bərqərar olmasını istəmir. Beləliklə, Ermənistanın bölgədə uzunmüddətli gərginliyi saxlamaqda əsas hədəfi, məqsədi Azərbaycanla bağlı beynəlxalq ictimai rəyi dəyişmək, onu ölkəmizə qarşı yönəltmək və özünün gələcək revanşist planlarının həyata keçirilməsi üçün əlverişli şərait yaratmaqdır.

Maraqlıdır, bütün bunlarla bağlı ekspertlər nə düşünür?

  • “Erməni diasporu bundan öz məqsədləri üçün istifadə edir”

Məsələyə münasibət bildirən siyasi ekspert Xəyal Bəşirovun fikrincə, bütün bunlarda Ermənistanın bir neçə məqsədi var: “Ermənistan və Azərbaycan 10 noyabrda üzərinə bir sıra öhdəliklər götürüb. Azərbaycan onlardan bir çoxunu yerinə yetirib. Elə öhdəlik var ki, Azərbaycan onu vaxtından əvvəl yerinə yetirib. Məsələn, yeni Laçın yolunu vaxtından əvvəl təhvil verdi. Bütün hərbi əsirləri, daha sonra bir çox diversantları qarşı tərəfə təhvil verdi. Ancaq Ermənistanın bunun müqabilində verdiyi mina xəritələri düz çıxmadı. Ermənistan öhdəliklərindən yayınaraq regionda davamlı gərginlikdə maraqlıdır. Bunda təkcə hazırkı hakimiyyət deyil, diaspor təşkilatları da maraqlıdır. Çünki erməni diasporu bundan öz məqsədləri üçün istifadə edir. Belə bir rəy yaradırlar ki, Qarabağ münaqişəsi hələ də həll olunmayıb. Erməni diasporu ölü Minsk Qrupunu yenidən diriltmək istəyir. Diaspor anlayır ki, Ermənistanı sülhə məcbur etməyin yekun mərhələsindəyik. O üzdən, bunu pozmağa səy göstərirlər. Çünki bilirlər ki, sülh sazişi imzalansa, Ermənistanın Türkiyə ilə münasibətləri düzələcək. Nəticədə qondarma “soyqırım” tarixin arxivinə gedəcək və erməni lobbisi kiməsə lazım olmayacaq. Məhz buna görə lobbi Paşinyana təzyiq edir ki, proses uzansın”.

Vidadi ORDAHALLI

Peşə etikası

Son xəbərlər