Ermənistanın keçmiş prezidenti Robert Köçəryan bir neçə gün əvvəl vəd verdiyi kimi İrəvanda mətbuat konfransı keçirib. Köçəryan hazırki vəziyyətin Ermənistan və Qarabağ erməniləri üçün ağır olduğunu etiraf edib.
Keçmiş prezident onu da etiraf edib ki, bölgədə Ermənistanın rolu xeyli azalıb, əsas söz sahibi Türkiyə və Azərbaycandır. Köçəryanın bir başqa etirafı Rusiyanın və Kollektiv Təhlükəsizlik Müqaviləsi Təşkilatının bölgədə rolunun və Azərbaycana təsir imkanlarının azalmasıyla bağlıdır. O bildirib ki, Rusiya Ermənistanla Azərbaycan arasında toqquşmalara yol verməmək üçün əlindən gələni edir və edəcək: “Amma Rusiya yalnız diplomatiyadan istfadə edə bilər. Bakıya qarşı Kremlin Ermənistan maraqlarına görə hərbi müdaxilə edəcəyinə inanmaq absurddur. Moskva ilə Bakının müttəfiq münasibətləri var və Rusiyanın bu vəziyyətdə Azərbaycana qarşı hərbi əməliyyatlara başlaya biləcəyini iddia etmək absurddur”.
Köçəryan ABŞ və Fransanın Azərbaycana təsir rıçaqlarına malik olmadığını da söyləyib:
“Ərdoğan ölkəsinin milli maraqlarının qorunması üzrə master-klass nümayiş etdirir – heç bir təzyiqə məhəl qoymur. O buna imkan verməz”.
Köçəryanın bu açıqlamasından onun tam depressiyada olduğu qənaətinə gəlmək olarmı?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, nəinki Köçəryan, Levon Ter-Petrosyanın da son müsahibəsində gərginlik və isterika hiss edilirdi: “İstər Ermənistanda müxalifətdə olanlar, istər revanşistlər, istərsə də Ermənistanın hərbi-siyasi rəhbərliyi birmənalı olaraq qəbul etməlidir ki, Azərbaycan Rusiya ilə müttəfiq ölkədir. Bununla bağlı hər iki ölkə prezidenti Moskva bəyənnaməsini imzalayıb. Bu isə o deməkdir ki, hər iki ölkə bir-birinin sərhədlərinin toxunulmazlığını, süverenliyini, müstəqilliyini, təhlükəsizliyini birmənalı olaraq dəstəkləməlidir. Burdan belə bir nəticəyə gəlmək olar ki, Rusiyanın Azərbaycana qarşı hər hansı hərbi müdaxiləsi heç cür mümkün olan məsələ deyil. Heç bir halda müttəfiqliyə də uyğun gələn məsələ deyil. Ermənistanda Köçəryanın verdiyi bəyənat artıq sübut edir ki, onlar bunu başa düşürlər, bu reallığı görürlər. Sadəcə, bu reallığı digər revanşist qüvvələrin də, Ermənistanın hərbi siyasi rəhbərliyinin də görməsi lazımdır. Bu gün Azərbaycan dövləti heç bir ölkəyə ərazi iddiasında olmadığı kimi, Ermənistana da ərazi iddiasında deyil. Bu gün Azərbaycan dövləti hərbi qarşıdurmanın həll olmasına çalışır. Bölgədə təhlükəsizliyin və sülhün uzunmüddətli olması üçün əlindən gələni edir. Təəssüf ki, Ermənistan qeyri-konstruktiv əməlləri ilə, danışıqlar masasına gəlməməklə, sülh müqaviləsini imzalamaqdan boyun qaçırmaqla bu prosesi məqsədli olaraq ləngidir. Azərbaycana qarşı son aylarda, əsas da Brüssel görüşündən sonra atdığı addımlarda bunun şahidi olduq. Ermənistan silahlı qüvvələri Azərbaycanın mövqelərini genişmiqyaslı atəş altında saxlayırlar. Bir neçə gün bundan əvvəl Ermənistan silahlı qüvvələri Azərbaycan ordusuna qarşı bütün sərhəd boyu genişmiqyaslı hərbi əməliyyatlara başladı və anındaca susduruldu, düşmənə ağır zərbələr endirildi. Bütün bunlar onu deməyə əsas verir ki, Azərbaycan özünü mudafiə edir, heç bir ölkənin ərazinə təcavüz etmir. Biz öz sərhədlərimizi qoruyuruq. Və bu hər zaman da belə olacaq. Bir müddət bundan əvvəl Azərbaycan Prezidenti bəyənatlarında qətiyyətli bir fikir səsləndirdi. O bildirdi ki, Azərbaycanı heç bir qüvvə, heç bir zəng və heç bir xahiş dayandıra bilməz. Çünki biz haqq-ədalət uğrunda hərbi əməliyatlarımızı aparırıq və sərhədlərimizi qoruyuruq. Heç bir qüvvə dedikdə bölgədə yerləşən dövlətlər, Qərb ölkələri nəzərdə tutulur. Bizim Rusiya ilə müttəfiqliyimiz var. Bunu gec-tez Ermənistandakı bütün qüvvələr anlamalıdır”.
Məhəmmədəli QƏRİBLİ
