Rusiyanın Ukraynada apardığı xüsusi əməliyyat uzadıqca, ölkə daxilində bununla bağlı narazılıqlar artır. Əvvəlki dövrlərə baxanda, Rusiyada əməliyyatın gedişi ilə bağlı tənqidi fikirlər xeyli artıb.
Çox maraqlıdır ki, Rusiyanın əsas təbliğatçıları belə, artıq hakimiyyəti sərt tənqid etməyə başlayıblar. Bu arada Vladimir Solovyov Rusiya hakimiyyətini və ona yaxın oliqarxları Ukraynada xüsusi əməliyyatlar aparılması nöqteyi-nəzərindən sərt tənqid edib: “Biz NATO kimi çox bacarıqlı, məkrli, nəhəng hərbi-sənaye kompleksi olan düşmənlə üz-üzəyik. Yeddi aydır xüsusi əməliyyat gedir, aydın olur ki, dronlarımız, hərbi peyklərimiz çatışmır. Bir milyon 150 minlik ordu haradadır? Bağışlayın, indi qismən səfərbər edilən 300 min adam üçün zirehli gödəkçələr və kaskalar varmı, yoxsa Çindən almaq lazım gələcək?”.
Solovyov əzəldən hakimiyyətin bir nömrəli təbliğat ruporu rolunda çıxış edib. İndiyədək Rusiya təbliğatçılarının dilindən hərbi əməliyyatların idarə edilməsi baxımından bu qədər sərt tənqid səslənməyib. Nə baş verir?
Məsələyə münasibət bildirən media eksperti Azər Həsrət hesab edir ki, belə vəziyyətin yaranması Ukrayna ilə bağlı proseslərin kritik olmasından xəbər verir: “Bu, Rusiyanın kəskin reallıqlarla üzləşməsi deməkdir. Məsələ ondadır ki, uzun illərdir Rusiyanın mütərəqqi kəsimi ölkədə baş verənlərə tənqidi yanaşır. İnsan haqları, demokratiya ilə bağlı hakimiyyəti ciddi tənqid edirlər. Uzun illərdir çağırışlar olurdu ki, normal vətəndaş cəmiyyəti yaradılsın. Ancaq təəssüflər olsun ki, bu kimi çağırışlara məhəl qoyulmadı. Korrupsiyaya, insan haqları pozuntularına göz yumuldu. Nəticədə Ukraynada aparılan xüsusi əməliyyat zamanı həmin problemlər Rusiyanın qabağına çıxdı. Ona görə Solovyov soruşur ki, səfərbər edilən 300 min adam üçün zirehli gödəkçələr varmı? Yəni bu gün Rusiya özünün yaratdığı gerçəkliklərlə üz-üzə qalıb. Nəticədə dövlətin ən öndə gedən təbliğatçıları belə, reallığı dilə gətirməyə məcbur olurlar. O baxımdan hesab edirəm ki, Rusiya bütün bunlardan ciddi dərs çıxarmalıdır. Xüsusən də qonşularına münasibətdə daha diqqətli olmalıdır. Elə bir münasibətlər sistemi qurmalıdır ki, qonşu ölkələrdə ona qarşı nifrət yaranmasın. Bu gün Rusiyanın Ukraynada apardığı əməlyatları dəstəkləyən bir dövlət belə yoxdur. Hətta Rusiyaya yaxın Belarus xalqı belə, buna qarşıdır”.
Bütün bunlardan çıxış edən ekspert hesab edir ki, Rusiya bundan nəticə çıxarmalıdır.
Vidadi ORDAHALLI
