Azərbaycan Ordusunun Təlim və Tədris Mərkəzinin Maliyyə xidmətinin rəisi Rəşad Məlikzadə həbs edilib. Bildirilir ki, Dövlət Təhlükəsizliyi Xidmətində istintaqı davam edən cinayət işi üzrə Rəşad Məlikzadə 9 milyon manata yaxın mənimsəmədə təqsirləndirilir.
Onun barəsində Cinayət Məcəlləsinin 179.4-cü (xüsusilə külli miqdara mənimsəmə) maddəsi ilə ittiham verilib.
Bakı Hərbi Məhkəməsində Rəşad Məlikzadə barəsində həbs qətimkan tədbirinin seçilməsi ilə bağlı istintaq orqanının vəsatətinə baxılıb.
Məhkəmə vəsatəti təmin edib və onun barəsində 4 aylıq həbs qətimkan tədbiri seçilib.
Ordudakı maliyyə mənimsəmələri ilə bağlı artıq necənci yüksək rütbəli zabit həbs edilir. Mənimsənilən məbləğlər milyonlarla ölçülür. Uzun illər idi ki, “mediaya ordudan yazmaq olmaz” kimi qeyri-rəsmi qadağalar tətbiq edilirdi. Səbəbi “düşmən bizi izləyir” kimi amillərlə izah olunurdu. Müdafiə Nazirliyində korrupsiyanın bu şəkildə çiçəklənməsi həm də ordunun ictimai nəzarətdən kənarda qalması amili ilə izah edilə bilərmi?
“Cümhüriyyət” qəzetinin və “Cəbhə.info” saytının baş redaktoru Rəfail Becanov “Bakı-Xəbər”ə açıqlamasında bildirdi ki, müdafiə nazirliyində olan həbslər çox təəssüf doğurur: “Amma bu kimi halların ordumuzun nüfuzuna zərər gətirəcəyinə inanmıram. Azərbaycan ordusu tarixdə qalacaq bir ordudur. Ölkənin 20 faiz ərazisini 30 il işğal altında saxlayan düşməni 44 günə darmadağın etdi və işğala son qoydu. Biz bununla fəxr edirik. Orduda neqativ hallar, korrupsiya faktları kimi məlumatlar isə həmişə bizi narahat edib. Kimlərsə ordunun şan-şöhrətini uca tutmaq əvazinə öz maraqlarını düşünür və çirkli yollarla var-dövlət qazanmağa çalışıblar. Təbii ki, müvafiq orqanlar bu prosesi nəzarətdə saxlayır və faktlar aşkar edildikdə dərhal lazımi tədbirlər görülür. Müdafiə Nazirliyində aparılan həbslər məhz həmin nəzarətin və aşkar edilən faktların nəticəsidir. Sonuncu həbs edilən Azərbaycan ordusunun təlim və tədris mərkəzinin maliyyə xidmətinin rəisi Rəşad Məlikzadə olub. Məlumatlarda bildirilir ki, o, Dövlət Təhlükəsizlik Xidmətində istintaqı davam edən cinayət işi üzrə 9 milyon manata yaxın mənimsəmədə təqsirləndirilir. Bu da onu göstərir ki, kimin hansı mənfi əməli olacaqsa o adamlar üzə çıxarılacaq və cəzalarını alacaqlar. Amma dövlət nəzarətindən əlavə ictimai nəzarət də olmalıdı dövlət qurumlarında. Düzdü, ordu spesifik sahədir. Orda ictimai nəzarət digər dövlət qurumları, mərkəzi və yaxud yerli icra hakimiyyətləri yanında olan nəzarətdən fərqli olmalıdır. Məsələn, bu gün müxtəlif dövlət qurumları, yerli və mərkəzi icra hakimiyyəti orqanları yanında vətəndaş cəmiyyətinin təmsilçilərindən ibarət ictimai şuralar fəaliyyət göstərir. Bu şuralar hansısa formada ictimai nəzarət mexanizminin formatını yarada bilib və onu icra edirlər. Media belə qurumlardan istədiyi formada həm informasiya alır, yayır, həm də əldə edilən informasiyaları dərc edir, ictimailəşdirir. Amma hərbi sahə tam fərqlidir. Məsələn, büdcə xərclərində hər hansı bir şəffaflıq kimi məsələləri nəzarətdə saxlamaq olmur. Çünki bunlar hərbi xərclərdir. Hansısa bir ictimai sektor nümayəndəsi və o cümlədən media bu xərcləri görməlidirmi? Qətiyyən, bu mümkünsüzdür. Amma “ordudan yazmaq olmaz” kimi fikirlər səhvdir. İctimai nəzarəti ordu üzərində ancaq belə formalaşdırmaq olar. Söz və mətbuat azadlığının hüquqi bazası çərçivəsində media nəsə yazmalıdır, ictimai nəzarət belə formalaşmalıdır. Mediaya “nəsə yazmaq olmaz” demək yolverilməzdir. Təbii ki, uzun müddət mediada “ordudan yazmaq olmaz” kimi qeyri-rəsmi qadağalar tədbiq edənlər, “düşmən bizi izləyir” kimi tezislərlə bunu əllərində bayrağa çevirənlər əslində ictimai nəzarətin qarşısına sədd çəkmiş olublar. Ona görə də hesab edirəm ki, kadr məsələsində olan yanlışlıq qədər, ictimai nəzarətin olmaması da istənilən bir qurumda mənfi halların baş verməsinə səbəb olur”.
Məhəmmədəli QƏRİBLİ
