ABŞ-da ermənipərəst konqresmenlərin Azərbaycana yönəlik aqressiyası dayanmaq bilmir. Gah Azərbaycan qazının Avropada boykot edilməsi çağırışı ilə çıxış edirlər, gah da ABŞ-ın ölkəmizə dövlət yardımlarını dayandırmaq təşəbbüsü qaldırırlar.
İndi də konqresmenlər Azərbaycanı Qarabağda “hərbi cinayətlərdə” ittiham edirlər. Belə ki, bir neçə konqresmen bu dəfə Azərbaycanın Ermənistan və “Artsax”dakı “hərbi cinayətlərə” görə məsuliyyət daşıması üçün qanunvericilik təşəbbüsü ilə çıxış edib. Konqresmenlər Konqresi Azərbaycana qarşı sanksiyalar tətbiq etməyə və Bakının “hərbi cinayətlərini” araşdırmaq üçün beynəlxalq tribunallara müraciət etməyə çağırıb. 40-dan çox konqresmen bunu dəstəkləyib.
Açıq görünür ki, konqresmənlər lap ağ edirlər. Bu qədər ağ yalan olar?
“Yaxşı olardı Xocalı, Ağdaban, Başlıbel və s. soyqırımlarına ədalətli münasibət bildirib, bu qırğınları...”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, bəlli konqresmenlər erməni lobbisinin əlində alətdir: “ABŞ-da fəaliyyət göstərən ermənipərəst dairələrin, xüsusilə erməni lobbisinin təsiri altında fəaliyyət göstərən qurumların növbəti dəfə anti-Azərbaycan xarakterli fikirlər səsləndirmələri, eləcə də sanksiya və s. kimi təşəbbüslərlə çıxış etmələri birinci dəfə deyil ki, baş verir. Bundan heç təəccüb etməyə də dəyməz. Ümumiyyətlə, tez-tez adları çəkilən amerikalı konqresmenlərin apardığı siyasəti “insan haqları uğrunda fəaliyyət” kimi qiymətləndirmək doğru olmazdı. Doğru olan budur ki, onlar erməni lobbisinin korrupsiyalaşmış xidmətçiləridir. Məqsədləri heç də, qeyd olunduğu kimi, insan haqlarının müdafiəsindən ibarət deyil. Onların məqsədi maksimum qaydada ermənilərin ədalətsiz, həyasız maraqlarına xidmət göstərmək, qarşılığında isə maddi imkanlarını artırmaq, o cümlədən, aralıq seçkilərində erməni səslərini qazanmaqdır. Çünki adıçəkilən konqresmenlərin əsas çoxluğu məhz ermənilərin kompakt yaşadığı ştatları təmsil edir. Beləliklə, əvəz-əvəz prinsipi ilə yanlış siyasət yolu tutan həmin amerikalı konqresmenlər əsasən demokratları təmsil edirlər. Nəzərə alsaq ki, bu gün ABŞ-da məhz demokratların iqtidarıdır və bu hökumət qondarma “erməni soyqırımı”nı tanıdı, bu zaman hər şey gün kimi üzə çıxır və ona görə də həmin fəaliyyət davam edir”.
B.Quliyev hesab edir ki, bu kimi konqres üzvləri əslində sülh prosesinin əldə edilməsinə ciddi maneələr törədirlər: “Və söz yox ki, əgər onlar dünyanın heç bir ölkəsində tanınmayan, hətta Ermənistanın özü tərəfindən belə tanınmayan qondarma “artsax” haqqında, oradakı “hərbi cinayətlər barəsində Azərbaycana qarşı çirkablar atmağa cəhd göstərirlərsə, bunun nəticəsi ölkələrimiz arasındakı münasibətlərə heç də səmərə gətirə bilməz. Son günlər ABŞ mövcud məsələdə fəallığını artıraraq təşəbbüsü öz əlinə almağa çalışır və Azərbaycanla Ermənistan XİN başçılarının, digər rəsmilərinin Amerikadakı görüşlərdə iştirak etmələri, Ağ Evin bu məsələdə fəallığı görünür. Bütün bunların müqabilində Konaqresdə paralel olaraq Azərbaycan əleyhinə fəaliyyətlər artırılır. Bir-birinə təzadlar yaradan bu addımlar barəsində isə məhz ABŞ rəsmiləri hesabat verməlidir. Aydınlaşdırmalıdırlar ki, onların gerçək məqsədləri nədir - sülh yaratmaq, yoxsa prosesin üzərinə benzin tökmək? Eyni zamanda, ABŞ Konqresinin Nümayəndələr Palatasının spikerinin Ermənistana səfəri və orada aşkar anti-Azərbaycan mövqeyi sərgiləməsi də belə qənaətə gəlməyə zəmin yaradır ki, artıq ortadakı məqsəd aydındır. Biz sual edə bilərik ki, bəs 30 il boyunca Azərbaycan torpaqlarının işğal altında qalmasına, yüz minlərlə insanımızın terrora, işgəncələrə məruz qalmasına, şəhər və kəndlərimizin dağıdılaraq talan edilməsinə niyə susurdular? Bu illər ərzində itkin düşmüş minlərlə soydaşlarımızın aqibətinə görə həmin konqresmenlər səslərini çıxardılarmı? Çıxıarmayıblar, özü də ATƏT-in Minsk Qrupunun aparıcı həmsədr ölkələrindən biri olaraq ABŞ tərəfinin təmsilçiləri də digərləri kimi, ümumiyyətlə, regiona sadəcə turist səfərləri keçirməklə gəlib-gedirdilər. Niyə onda səsləri çıxmırdı? Bəs indi nə oldu ki, ermənilər həm suçlu, həm də güclü olmağa can atırlar və ermənipərəst konqresmenlər də onların çaldığı havaya rəqs edirlər? Əslində, hərbi cinayətlərlə bağlı tribunala müraciət edən bizik. Azərbaycan xalqı, dövləti və əlbəttə ki, erməni terrorunun, erməni vəhşiliyinin bütün hesablarını da qanun çərçivəsində soruşacağıq. Azərbaycan dövləti, xalqı nəyin-necə olmasından asılı olmayaraq haqlı və ədalətli olduğunu bilir. Bunu bizə dost olan ölkələr də bilir, dərk edirlər. Amerikalı konaqrsmenlər bu qədər ağ etməkdənsə, sözün əsl mənasında yalan və böhtan atmaqdansa həqiqəti desinlər. Xocalı, Ağdaban, Başlıbel və s. soyqırımlarına ədalətli münasibət bildirib, bu qırğınları törədən erməni terrorçularının hərbi cinayətlərini araşdırsınlar. Onları hərbi tribunallara versinlər. Lakin göründüyü kimi, onlar bunu etmirlər və aydındır ki, bütün bunların təməlində, əsasında aşkar ermənipərəstlik mövqeyi dayanır”.
Politoloq sonda onu da əlavə etdi ki, Azərbaycanın müvafiq qurumları həmin konqresmenlərin bu kimi oyunbazlıqlarına layiq olduqları cavabı verəcək.
Vidadi ORDAHALLI
