Prezident İlham Əliyevin imzaladığı Fərmanla Media Reyestrinin aparılması Qaydaları” təsdiqlənib.
Fərmana əsasən, Nazirlər Kabinetinə bu Fərmandan irəli gələn məsələləri həll etmək, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinə “Dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi Qaydaları”nın təsdiq edilməsi və elektron hökumətlə bağlı bəzi tədbirlər haqqında” Azərbaycan Prezidentinin 2018-ci il 12 sentyabr tarixli 263 nömrəli Fərmanına uyğun olaraq, Media Reyestrinin aidiyyəti dövlət informasiya ehtiyatları və sistemləri ilə əlaqələndirilməsini Elektron Hökumət İnformasiya Sistemi vasitəsilə təmin etmək tapşırılıb.
Azərbaycan Respublikasının Medianın İnkişafı Agentliyi Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti ilə birgə Media Reyestrinin təhlükəsizliyinin təmin edilməsi üçün zəruri tədbirlər görməli, bu Fərmandan irəli gələn digər məsələləri həll etməlidir.
Media Reyestrinin tətbiqi media subyektlərinin və jurnalistlərin hüquqlarının daha yüksək səviyyədə müdafiəsi üçün nə kimi yeni perspektivlər vəd edir?
“Bu peşədən, ixtisasdan sui-istifadə etməyən adamlar və onların işlədikləri redaksiyalar, media subyektləri reyestrdə öz yerini alacaq...”
Mətbuat Şurasının İdarə Heyətinin üzvü Azər Həsrət “Bakı-Xəbər”ə şərhində bildirdi ki, Media Reyestrinin tətbiqi olduqca böyük əhəmiyyətə malikdir. “Əslinə qalanda, Media Reyestri bir neçə il bundan öncə Mətbuat Şurasının icra etməyə çalışdığı, amma sonadək edə bilmədiyi bir təşəbbüsün tam rəsmi və ciddi şəkildə reallaşdırılmasına imkan yaradır. Xatırlayırsınızsa, illər öncə Mətbuat Şurası vahid jurnalist vəsiqəsi tətbiq etmək, jurnalistikadan təsadüfi yollarla sui-istifadə etməyə çalışanları aramızadan təmizləmək üçün addımlar atmağa cəhd göstərdi. Amma Mətbuat Şurası qeyri-hökumət təşkilatı olduğuna görə bu işi sona qədər həyata keçirə bilmədi, vahid vəsiqə tətbiq edə bilmədi, təbiidir ki, sui-istifadə halları da yerində qaldı. Yəni qismən təmizlənmə oldusa da, ümumilikdə bu iş sona qədər çözülmədi. Media Reyestrinin tətbiqi isə bu problemin kökündən çözümünə çox böyük töhfə verəcək. Yəni artıq Azərbaycanda gerçək jurnalistika ilə saxta jurnalistika arasında sərhədlər müəyyənləşdiriləcək. Doğrudan doğruya jurnalistikanı həyat tərzi, özünə təminat qaynağı seçən, bu sahədə rəsmən işləyən, eləcə də bu peşədən, ixtisasdan sui-istifadə etməyən adamlar və onların işlədikləri redaksiyalar, media subyektləri reyestrdə öz yerini alacaq, onlara cəmiyyətin münasibəti fərqli olacaq, daha üstün sayğı qazanacaqlar, amma reysterdən bu və ya digər şəkildə yayınmağa çalışan, yaxud da ora düşməmək üçün kreteryalara cavab verməyənlər, təbiidir ki, kənarda qalacaq, cəmiyyət də onlara fərqli yanaşacaq”.
A.Həsrət hesab edir ki, artıq cəmiyyətdə onların jurnalistika ilə məşğul olması, yaxud da real jurnalist olmaları ilə bağlı müəyyən şübhələr yaranacaq. O qeyd etdi ki, bəzi adamlar Reyestrə düşmədən də jurnalistika ilə məşğul olacağını bildirir. “Biz bunları başa düşürük. Amma düşünürük ki, həqiqətən də normal jurnalistika ilə məşğul olan adamlar niyə Reyestrdə qeydiyyatdan keçməsinlər? Orada heç kimdən buna görə rüsum tələb edilmir, kimlərinsə üzərinə hansısa əlavə öhdəliklər qoyulmur. Sadəcə olaraq, reyestrdir. Qeyd olunursunuz ki, mən jurnalist fəaliyyəti ilə məşğulam və rəsmən də bunu təsdiq edəcək sənədləri təqdim edirsiz. Düşünürəm ki, Reyestr ümumilikdə jurnalistikanın keyfiyyətinin yüksəlməsinə, jurnalistlərə cəmiyyətin hörmətinin artmasına gətirib çıxaracaq. Əlbəttə, bu da həmin an olmayacaq və buna müddət lazımdır. Bütövlükdə, Reyestrin tətbiqi redaksiyaların və jurnalistlərin hüquqlarının daha yaxşı şəkildə müdafiəsinə də imkanlar açır”-deyə A.Həsrət vurğuladı.
İradə SARIYEVA
