Ali təhsili olmayan jurnalistlər Media Reyestrinə daxil edilməyəcək. Bu, Prezident İlham Əliyevin Fərmanı ilə təsdiq edilmiş “Media Reyestrinin aparılması Qaydaları”nda əksini tapıb.
Qaydaya əsasən, ali təhsili olmadıqda Media Reyestrinə daxil edilmək üçün müraciət etmiş jurnalistlərin Reyestrə daxil edilməsindən imtina ediləcək.
Bu tələb ətrafında ətraflı müzakirələr aparılır. Bir çoxları elə başa düşür ki, ali təhsili olmayan adama məqalə yazmaq, reportaj hazırlamaq qadağan ediləcək. Qətiyyən belə deyil. Məsələ bundadır ki, Media Reyestrinə daxil olmaq üçün müvafiq tələblər var. Dövlət tərəfindən həmin jurnalistlərə müəyyən imtiyazların verilməsi, xüsusilə onların peşə və ixtisaslarının artırılması ilə bağlı işlərin görülməsi və jurnalistlərin bunlardan ödənişsiz əsaslarla istifadə etməsi üçün reyestrdə olmaq əsas verəcək. Belə olan təqdirdə reyestrə daxil olmaq üçün də müəyyən tələblərin qoyulması təbiidir. Bu, jurnalistika ilə məşğul olmaq üçün tələb deyil, Reyestrdə olmaq üçün qoyulan tələbdir. Yəni ali təhsili olmadan da jurnalistika fəaliyyəti ilə məşğul olsalar, jurnalist sayılacaqlar, istər əmək müqaviləsi, istərsə də fərdi qaydada istənilən redaksiyada çalışan şəxsə çevrilirlər. Bununla bağlı heç bir məhdudiyyət yoxdur. Sadəcə olaraq, reyestrdə olmaq üçün nəinki ali təhsil, stajla bağlı tələblər də var. Dünya təcrübəsində də görmüşük ki, bundan da ciddi tələblər qoyulur.
Mövzu ilə bağlı “Bakı-Xəbər”lə fikirlərini bölüşən Mətbuat Şurası İdarə Heyətinin üzvü Hacıbəy Heydərli hesab edir ki, media reyestrində ali təhsili olmayan şəxslərin olmaması ilə bağlı müddəa Azərbaycan jurnalistikasının daha peşəkar fəaliyyətinə yardımçı olacaq: “Çünki biz də bir çox halda şahidi olurduq ki, təsadüfi adamlar mediaya ayaq açırdılar, bir domen alaraq sayt rəhbəri olurdular, cəmiyyətdə də məhz bu səbəbdən Azərbaycan mətbuatına inamsızlıq yaranırdı. Məncə, bu məsələdə ilk növbədə jurnalistlər özləri maraqlı olmalıdırlar ki, mətbuat qeyri-peşəkarlardan təmizlənsin. Jurnalistika ali təhsil tələb edən peşələrdəndir, bu sahənin çox böyük məsuliyyəti, etik prinsipləri, davranış qaydaları var. Bu baxımdan, Media reyestrində də vacibdir ki, ali təhsil şərt kimi qoyulsun, mən bu təklifi dəstəkləyirəm. Ali təhsilli insan jurnalistikanı şüurlu şəkildə seçir, bu sahəyə töhfə vermək üçün gəlir. Ancaq o da ola bilər ki, kimsə hazırda tələbədir və çox uğurlu layihə ortaya qoyub, məncə o adamlarla bağlı istisnalar ola bilər.
Düşünürəm ki, jurnalistika sahəsində çalışmaq üçün mütləq jurnalistika təhsili olmaq şərt deyil. Bu gün bizim çox uğurlu media kapitanları, peşəkar jurnalistlərimiz var ki, onlar jurnalist təhsilli deyillər. Jurnalistika yaradıcı və praktik sahədir, burada vacib məqam peşə etikasına riayət etməkdir. Onu da qeyd edim ki, media reyestri Azərbaycan mətbuatının, jurnalistikasının saflaşmasına, şəffaflaşmasına yardımçı olacaq. Bu sahəyə yeni nəfəs gətirəcək. Jurnalistlər cəmiyyətdə nüfuzunu bərpa edəcək, mətbuata təsadüfi gələn adamlar zamanla buradan uzaqlaşacaq. Məncə, bu məsələdə böyük yük peşəkar jurnalistlərin üzərinə düşür, ən çox onlar özləri maraqlı olmalıdırlar ki, mətbuatımıza şəffaflıq gəlsin, kənar amillər bu sahədə "at oynatmasın". Əminəm ki, bunun faydasını hiss edəcəyik”.
Məhəmmədəli QƏRİBLİ
