“ABŞ Azərbaycana qarşı özünü müdafiə etmək üçün Ermənistana silah satmağı nəzərdən keçrir”. Bu barədə ABŞ Erməni Milli Komitəsi (ANCA) facebook hesabında məlumat paylaşıb.
Sözügedən məlumatda qeyd olunur ki, 1991-ci ildə Ermənistan müstəqilliyini bərpa etdikdən sonra ilk dəfə olaraq amerikalı siyasətçilər - Konqresdəki hər iki partiyanın daimi təzyiqi altında Ermənistana özünü müdafiə etmək üçün Amerika silahlarını satmağı düşünürlər.
O da məlumdur ki, ABŞ Konqresinin sədri Nensi Pelosinin Ermənistana səfəri və orada reallıqlardan kənar açıqlamaları ilə yanaşı bir məqam xüsusi olaraq qabardıldı. Vaşinqtonun Ermənistanı silahlandırması ilə bağlı bəyanatlar artıq ABŞ siyasi dairələrində müzakirəyə çıxarılır. Əsasən də bu məsələdə Amerikadakı erməni lobbisi xüsusi canfəşanlıq göstərir. Bütün vasitələrlə çalışırlar ki, buna nail olsunlar.
Maraqlıdır, doğrudanmı ABŞ indiki vəziyyətdə və üstəlik də Kollektiv Təhlükəsizlik Müqaviləsi Təşkilatı (KTMT) üzvü olan Ermənistana silah satacaq?
“Qarşı tərəfin silahlandırılması regionda eskalasiya risqlərini artıracaq, bu da Avropanın maraqlarına uyğun deyil”
Məsələyə münasibət bildirən hərbi ekspert Ramil Məmmədli hesab edir ki, prinsipcə, indiki məqamda bu real görünmür: “Əvvəla, ABŞ-ın Ermənistana silah satmasını ən çox oradakı erməni lobbisi arzulayır. Uzun illər pərdəarxası bu istiqamətdə səy göstərirlər. Ancaq müxtəlif səbəblərdən bu baş tutmayıb. Uzun illər ABŞ Qarabağ məsələsinə görə nə Azərbaycana, nə də Ermənistana silah satmayacağını bəyan edib. Bir sıra aparıcı Avropa İttifaqı ölkələri də həmin mövqedən çıxış edirlər. Üstəlik, biz nəzərə almalıyıq ki, Ermənistan Rusiyanın patronu olduğu KTMT-də təmsil olunur. Ermənistan ordusunun silah arsenalı əsasən Rusiya hərbi sənaye məhsuludur. O üzdən, yaxın perspektivdə ABŞ-ın Ermənistana silah satması real görünmür. Bu o zaman ola bilər ki, Ermənistan KTMT və Avrasiya İqtisadi İttifaqından çıxıb birmənalı olaraq Qərbə inteqrasiya yolunu tutsun. Ermənistanın belə bir addım atması isə ölkə üçün fəlakətli nəticələrə səbəb olacaq. Çünki Rusiya belə halları bağışlamır. Hər halda, Ukraynada baş verənlər bütün bunları əyani şəkildə ortaya qoyur. Başqa bir tərəfdən, Azərbaycan Avropa İttifaqının enerji təchizatına töhvə verir. Vaşinqton bu amili nəzərə almaya bilməz. Ona görə ki, Ermənistanın silahlandırılması regionda eskalasiya risqlərini artıracaq və bu da Avropanın maraqlarına uyğun deyil. Birləşmiş Ştatlar da Avropa dövlətlərinin maraqlarını gözardı edə bilməz. Erməni lobbisi çox şey istəyə bilər. Əsas ABŞ-ın dövlət maraqlarının nəyi tələb etməsidir”.
Bir sözlə, hərbi ekspert ABŞ-ın belə bir addım atacağını real hesab etmir.
Vidadi ORDAHALLI
