Ermənistan sentyabrın 26-dan oktyabrın 8-dək Qazaxıstanda keçiriləcək KTMT təlimlərində iştirak etməyəcək.
Bu barədə Ermənistan Müdafiə Nazirliyi məlumat yayıb. Məlumatda bildirilir ki, Ermənistan Qazaxıstanda KTMT təlimlərində iştirakdan imtina edib. Ermənistan sərhəd bölgələrindəki vəziyyətə görə inciyib: “Ermənistan-Azərbaycan sərhədində mövcud vəziyyəti nəzərə alaraq, Ermənistan Müdafiə Nazirliyi Silahlı Qüvvələr KTMT çərçivəsində Qazaxıstanda keçirilən təlimlərdə Ermənistan Silahlı Qüvvələrində iştirakdan çəkinmək qərarına gəlib”.
Bundan başqa, sentyabrın 20-də KTMT-nin baş katibi Stanislav Zasın başçılıq etdiyi nümayəndə heyəti Ermənistana gələndən sonra baş nazir Nikol Paşinyan ona qarşı hörmətsizlik sərgiləyib. Paşinyan KTMT-nin baş katibini qəbul etməli imiş. Lakin hər şey gözlənilənlərin əksinə olub. Paşinyan KTMT-nin baş katibini qəbul etməyib. Zas İrəvana gələndən 2 gün sonra Paşinyan Nyu-Yorka uçub. Baş nazir orada BMT Baş Assambleyasının sessiyası çərçivəsində KTMT-nin və Rusiyanın bir nömrəli düşməni olan NATO-nun baş katibi Yens Stoltenberqlə görüşüb.
Ən nəhayət maraqlı məqam odur ki, Paşinyan ABŞ və Fransaya səfər etdikdən sonra Ermənistan KTMT təlimlərində iştirak etməkdən imtina edir. Bütün bunlar təsadüfdürmü?
“Paşinyan bununla Vaşinqton və Parisə göstərmək istəyir ki, Ermənistan Rusiya ilə bağları yavaş-yavaş qoparır”
Məsələyə münasibət bildirən Böyük Azərbaycan Partiyasının sədri Elşad Musayevin fikrincə, indiki məqamda Ermənistanın KTMT təlimlərindən imtina etməsi əsla təsadüf deyil: “Zaman gəldi, Ermənistan rəhbərliyi Rusiyanıın çətin vəziyyətindən istifadə edib onu satmağa başladı. Faktiki olaraq Rusiyanı başqa ağalara dəyişmək istəyir. Bunlar da ABŞ və Fransadır. Məhz onlardan dəstək alaraq Ermənistan KTMT təlimlərindən imtina etdi. Paşinyan bununla Vaşinqton və Parisə göstərmək istəyir ki, Ermənistan Rusiya ilə bağları yavaş-yavaş qoparır. Qərbyönümlü siyasətə başlayır. Erməni mətbuatı açıq-aşkar Paşinyanın bu mövqeyini dəstəkləyir. Bu o deməkdir ki, Rusiyanın Ukraynada əməliyyatlar aparması tamamilə yeni geosiyasi şərait yaradır. O üzdən, Azərbaycan maksimum bundan istifadə etməlidir. Çox güman ki, Ermənistanın məlum addımı Kremldə narazılıq doğuracaq. Hesab eirəm, yaranmış vəziyyətdən istifadə edib Qarabağda addım-addım irəliləməliyik. Ermənistanda vəziyyət gör nə qədər kritikdir ki, birinci prezident Levon Ter-Petrosyan ölkəni çətin və ağrılı qərarlar gözlədiyini deyir. Bəyan edir ki, Ermənistan həm Azərbaycan, həm də Türkiyə ilə müqavilələr imzalamalı olacaq. Bu baxımdan hesab edirəm ki, təsadüfi heç nə yoxdu. Onsuz da 2018-ci ildə Paşinyan hakimiyyətə gələndə ona Corc Soros himayədarlıq edirdi. Ona zaman lazım idi ki, Qərbə doğru reveranslar etsin. Əminəm ki, Ermənistanın belə gedişləri ölkəyə xeyir verməyəcək. Çünki ABŞ və Fransanın regionda elə də təsir gücü yoxdu. Ən azından ona görə ki, Ermənistanın açıq dənizə çıxışı yoxdu. Rusiya da heç vaxt xoşluqla Ermənistanı Qərbə güzəştə getməyəcək”.
Bu baxımdan partiya sədri hesab edir ki, Azərbaycan Ermənistanın buraxdığı səhvdən maksimum öz xeyrinə istifadə etməlidir.
Vidadi ORDAHALLI
