Ermənistanın ictimai televiziyasına müsahibəsində həmin ölkənin birinci prezidenti Levon Ter-Petrosyan deyib ki, ölkəsini çətin və ağrılı qərarlar gözləyir, həm Azərbaycan, həm də Türkiyə ilə müqavilələr imzalamalı olacaq:
“Bu heç kimə xoş gəlmir, lakin elə an gələcək ki, başqa seçim olmayacaq”.
Onun daha sonrakı açıqlamaları belə olub:
“Alternativ yoxdur. Əgər sənəd imzalanmasa, bu iki qonşu ilə sülh bağlanmasa, biz artıq Sovet İttifaqının 70 illik reallıqlarını bərpa edə bilmərik. Biz yenidən dövlət qurmalıyıq. Müxalifət hesab edir ki, Paşinyanı hakimiyyətdən kənarlaşdırmaqla ağrılı qərarların qarşısını almaq olar. Bu sadəlövhlükdür. Kim gəlsə, daha pis sənədə imza atacaq. Onların Ermənistandan nə istədiklərini anlamaq və daha ağrısız həll yolunu seçmək lazımdır. Bunu isə yalnız Paşinyanla danışmaqla başa düşmək olar, çünki o, tam məlumatı olan yeganə şəxsdir. Üstəlik, Paşinyan da sənədi imzalamaqdan qorxur, çünki nəyə imza atsa da, onu “satqın” adlandıracaqlar. Bu yolla biz də Paşinyana əlimizi uzadırıq, bu müqavilələrin imzalanmasının məsuliyyətini öz üzərimizə götürürük. Mən də öz növbəmdə bu məsuliyyətə hazıram. Digərləri, bilmirəm, görünür, hazır deyildilər, ona görə də təxirə saldılar. Uğur qazanmaq üçün bütün tərəflərdən mütləq səmimiyyət tələb olunur. Bütün ambisiyaları bir kənara atmaq lazımdır”.
Ermənistanın sabiq prezidentinin bu açıqlamasını Azərbaycanın yaratdığı reallıqlarla hesablaşmaq kimi qiymətləndirmək olarmı?
Politoloq Rəşad Bayramov "Bakı-Xəbər"- ə açıqlamasında bildirdi ki, Ter-Petrosiyanın açıqlamaları ilə tanışdır: “O öz açıqlamalarında bildirib ki, indiki Ermənistanın düşdüyü vəziyyət nə qədər xoşagəlməz olsa da, elə bir an gələcək ki, artıq alternativ də olmayacaq. Onu da qeyd edib ki, Bakı və Ankara ilə problemlər həll olunmasa Ermənistan dövlətçiliyinin mövcudluğu artıq təhlükə altına düşəcək. Ter-Petrosyan bir məsələyə də düzgün toxunub ki, bu gün sülh müqaviləsinin imzalanmasından sonra Ermənistan faktiki olaraq kapitulyasiya aktına imza atacaq. Əgər Paşinyan getsə, onun yerinə başqa biri gəlsə belə daha ağır şərtlərlə sənədlərə imza atılmalı olacaq. Əslində Ter-Petrosyanın dediklərində müəyyən həqiqət payı var. Bugünlərdə Ermənistanın düşdüyü durum onu tez bir zamanda Bakı və Ankara ilə problemləri həll etməyə məcbur edir. Bu gün aktiv şəkildə Rusiyadan uzaqlaşan, KTMT-nin Qazaxıstanda keçiriləcək toplantısında iştirakdan imtina edən, KTMT baş katibi ilə görüşdən imtina edən Paşinyan bununla bir növ Rusiyadan narazılığını büruzə verirsə, ikinci bir tərəfdən də ABŞ - a və onun müttəfiqlərinə onlarla birgə hərəkət edəcəyi mesajlarını çatdırır. Amma bir məsələ də var, Ermənistan Rusiyadan o qədər ağır şərtlərlə asılıdır ki, Rusiyaya arxa çevirməsi onun üçün çox ağır bir durum yaradacaq. Bu gün Ermənistanın iqtisadiyyatı, dəmir yolları, enerji təhlükəsizliyi, sərhədlərinin qorunması və adi qida təhlükəsizliyi hamısı birbaşa Rusiya ilə bağlıdır. Təsəvvür edin, əgər növbəti ildən etibarən Rusiya Ermənistana dünya bazarında olan qiymətlərlə qaz satışına başlasa, o zaman Ermənistanın durumu hansı səviyyədə olar? Paşinyan düşünür ki, ABŞ və ya hansısa Avropa dövləti, əsasən də Fransa Ermənistana imkan yaradacaq ki, Rusiyanın regiondan çıxarılmasından sonra öz yaşamını kompensasiya etsin. Ter-Petrosyan da Bakı və Ankara problemlərinin həll olmasının vacibliyinə toxunanda məhz bu məsələni nəzərdə tutur. Ancaq bu fikrində yanılır. Bu gun Rusiyanı əvəz edə biləcək yeganə güc İran və ya hansısa Qərb ölkəsi deyil, Türkiyədir. Türkiyə ilə problemlərin həll olunması isə birbaşa Azərbaycanla sülh müqaviləsindən keçir. Ter-Petrosyan əslində indiki Ermənistan hakimiyyətinə yeganə çıxış yolunu göstərib. Bu da Bakı ilə sülh müqaviləsinin bağlanması və Ankara ilə problemlərin həllinə nail olmaqdır”.
Məhəmmədəli QƏRİBLİ
