Heç bir xalq müharibə istəmir, heç bir ana arzulamır ki, minbir əziyyətlə böyüdüb boya-başa çatdırdığı övladının ömrü yarıda qırılsın. Bu təbiidir. Azərbaycan xalqı bəlkə də yeganə xalqıdır ki, 27 sentyabr 2020-ci il tarixində müharibənin başlanmasına sevinib.
Bu mənada sevinib ki, torpaqlarımız işğaldan azad ediləcək, 30 ildir alnımıza sürülən qara ləkə təmizlənəcək. Xalqımız bu günü düz 30 il gözlədi və nəhayət Ali Baş Komandanın əmri ilə Zəfər yürüşünə qoşuldu. Müzəffər Ordumuzun şücaəti əsrlər keçsə də, dillərdə dastan olacaq. Heç şübhəsiz ki, 27 sentyabr uşaq və gənclərimizin mənəvi inkişafında xüsusi rol oynayır. 27 sentyabr 2020-ci ilə qədər olan müddətdə analar, atalar, cəmiyyət çox güclü vətənpərvərlik hissinə malik olan böyük bir nəsil yetişdirib və torpaqlarımızı gənc nəsil azad etdi. Heç şübhəsiz ki, uşaq və gənclərin fiziki və mənəvi inkişafında, tərbiyəsində, hər birinin şəxsiyyət kimi formalaşmasında 27 sentyabr tarixinin önəmli rolu danılmazdır. Hər bir şəhidin, qazinin həyatı, döyüş yolu gəncliyə bir nümunədir, örnəkdir.
“Qarabağ bizimdir, bizim olacaq!”
27 sentyabr Zəfər yürüşünün, torpaqlarımızın azad olunması hadisəsinin uşaq və gənclərin tərbiyəsində roluna şərh verən ekspertlər qeyd edir ki, bu tarixdə uşaqlarımız da silaha sarılıb düşmənə qarşı döyüşmək, şanlı ordumuzun yanında olmaq istəyirdi.
“Qarabağ bizimdir, bizim olacaq!” Şüarı uşaqların dilinin əzbərinə çevirildi. Biz uşaqdan böyüyə həm fiziki, həm də mənəvi baxımdan düşmənə qarşı döyüşdük. Nifrətimizi yağıya güllə kimi yağıdırdıq.
Zəfər tariximizdən, torpaqlarımızın düşmən təcavüzündən azad edilməsində misilsiz qəhrəmanlıq göstərən Vətən müharibəsi şəhidi və qazilərinin göstərdikləri şücaət və fədakarlıqlar unudulmazdır, onlar hər zaman yaşayır. 44 gün davam edən Vətən müharibəsinin Ali Baş Komandan İlham Əliyevin rəhbərliyi, xalq-ordu birliyinin möhtəşəm Qələbə ilə başa çatmasının hər bir Azərbaycan vətəndaşının qəlbində böyük qürur və iftixar hissi yaratdığı məlumdur.
Qeyd edək ki, Azərbaycan hər zaman mübariz oğul və qızlarının şücaətini yüksək qiymətləndirir, bütün şəhidlərimizin ruhuna ehtiram göstərir, xatirəsini uca tutur. Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilməsi qərara alınıb. 27 sentyabr Zəfər təntənəmizin başlandığı gün olmaqla yanaşı həm də rəsmən Anım Günüdür.
“...Bu tarix uşaq və gənclərimizin qürur mənbəyidir”
Müasir İnkişaf Birliyinin sədri, Yeni Media Qrupun rəhbəri Mübariz Göyüşlü bizimlə söhbətində bildirdi ki, təbii, Azərbaycanda hər zaman uşaq və gənclərin fiziki-mənəvi tərbiyəsinə, inkişafına hər zaman böyük diqqət göstərilib. “Azərbaycanda uşaq və gənclərin fiziki və mənəvi tərbiyəsi hər zaman diqqət mərkəzində olub. İstər aidiyyatı qurumlar tərəfindən, istərsə də, ailədə həmişə bu məsələyə çox böyük əhəmiyyət verilib, diqqət göstərilib. Sadəcə olaraq biz 2020-ci ilin 27 sentyabrına qədər vətənpərvərlik tərbiyəsi işini aparırdıq, təbliğatımız geniş idi. Amma bununla yanaşı içimizdə bir qırıqlıq vardı. Çünki torpaqlarımız işğal altında idi, bundan başqa ermənilər tərəfindən xalqımıza qarşı törədilən çoxsaylı faciələrin ağrısını yaşayırdıq. Biz hər dəfə bu barədə danışmaq məcburiyyətində qalırdıq, bu da daxilimizdə narahatlıq yaradırdı. Sirr deyil ki, Birinci Vətən Müharibəsində bizim müharibədə uğursuzluğa düçar olmağımız uşaq və gənclərdə suallar yaradırdı ki, heç bizim xalqımızın qəhrəmanlıq salnamələri olmayıb, ermənilər üzərində qələbəsi olmayıb? Amma 27 sentyabrda başlayan 44 günlük Vətən Müharibəsi bizim başımızı həm öz övladlarımızın, uşaqlarımızın, gənclərimizin qarşısında dikəltdi, həm də dünyada bizim nüfuzumuzu artırdı. Bu savaş uşaq və gənclərimizin mənəvi-psixoloji baxımdan həyatında, vətənpərvərlik tərbiyəsində çox böyük rol oynayır. Hələ bundan sonrakı əsrlərdə rol oyanayacaq. 27 sentyabr Zəfər yürüşün başlandığı gündür və bu tarix uşaq və gənclərimizin qürur mənbəyidir”.
“Bu bir vətənpərvərlik salnaməsidir”
M.Göyüşlü vurğuladı ki, 30 il işğalda qalan torpaqlarımızı 44 günə işğaldan azad etdik və xeyli yaşı olan erməniçilik ideologiyasını darmadağın etdik, “Böyük Ermənistan” xülyasını məhv etdik. Ermənilər Azərbaycanın başqa ərazilərini də işğal etmək haqda düşündüklərini qeyd edən birlik sədri bildirdi ki, Ermənistan hökuməti tərəfindən bəyan edilirdi. “Azərbaycan ordusu əks-hücum əməliyyatı ilə ermənilərə böyük zərbə vurdu. Bu müharibədə ermənilərə, Ermənistana vurduğumuz zərbə ilə bu məsələni həll etdik. Bu istiqamətdə aparılacaq tərbiyə işində şəhidlərimizin qəhrəmanlıqlarını, qazilərimizin, xalqımızın, dövlətimizin, şanlı ordumuzun qəhrəmanlığını, şücaətini biz böyük məmnuniyyətlə övladlarımıza təlqin edirik, bundan sonra da edəcəyik. Zəfər yürüşü nəinki Azərbaycan xalqının övladlarının, gənclərinin, vətəndaşlarının vətənpərvərlik tərbiyəsində böyük rol oynayacaq, o eyni zamanda Azərbaycanı sevən, onunla bir yerdə olan, obrazlı desək, nəfəs alan, onun ən yaxın müttəfiq rolunda çıxış edən qardaş dövlətlərin, xalqların da həyatına müsbət təsir edir, edəcək də. Bu bir vətənpərvərlik salnamasidir. Biz burada yalnız nəzəri cəhətdən övladlarımıza vətənpərvərliyi öyrətmiş olmadıq, həm də praktik baxımdan bunu göstərdik, sübut etdik”-deyə M.Göyüşlü qeyd etdi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
