Ermənistanın ərazi bütövlüyünə hörmət İran prezidentinin indi yadına düşür - bəs 30 il əvvəl?

Məhərrəm Zülfüqarlı: “İran heç vaxt maraqlı olmaz ki, Azərbaycan güclü dövlət olsun”

img

Ermənistanın baş nazir Nikol Paşinyan Nyu-Yorkda BMT Baş Assambleyasının 77-ci sessiyası çərçivəsində İran İslam Respublikasının Prezidenti İbrahim Rəisi ilə görüşüb.

Paşinyan görüşdə Rəisiyə Azərbaycandan şikayətlənib. Eyni zamanda, İran tərəfinin aydın qiymətləndirmələrindən məmnunluğunu ifadə edib və hazırkı vəziyyətdə sıx ikitərəfli əməkdaşlığı vurğulayıb.

Öz növbəsində İbrahim Rəisi İranın hadisələri diqqətlə izlədiyini qeyd edib və əlavə edib ki, regiondakı bütün problemlər yalnız sülh yolu ilə həll edilməlidir. İran prezidentinin sözlərinə görə, İranın dövlətlərin ərazi bütövlüyü və regionda sərhədlərin dəyişdirilməsinin yolverilməzliyi ilə bağlı mövqeyi aydındır və iki ölkənin əlaqəsi təhlükə altına düşməməlidir. İbrahim Rəisi ölkəsinin regionda sülhün bərqərar olmasına dəstək verməyə hazır olduğunu vurğulayaraq, Ermənistanın təhlükəsizliyi məsələsinin İran üçün vacib olduğunu bildirib.  

Maraqlıdır, İran ərazi bütövlüyü məsələsinə bu qədər həssas yanaşırsa, o zaman niyə bənzər mövqeyi Azərbaycan əraziləri 30 il işğal altında olanda sərgiləmədi? Niyə o zaman bütün bunlar İranın yadına düşmədi?

Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı İranın belə mövqe sərgiləməsini bir sıra amillərlə əlaqələndirdi: “Əvvəla, İran heç vaxt maraqlı olmaz ki, Azərbaycan güclü dövlət olsun. Məhz bu səbəbdən 30 il ərazilərimizin işğal altında olmasını görməzdən gəldi. Formal mövqe sərgiləməklə ötüşdürdü. Digər tərəfdən, bir sıra dövlətlər daxili böhran olanda problemi xaricdə axtarır. Son vaxtlar İran daxilində böhran kəskinləşib, əhalinin həyat səviyyəsi pisləşib. İran cəmiyyəti mövcud rejimdən, onun idarəçiliyindən razı deyil. Belə bir vəziyyətdə Tehran ictimai rəyi yayındırmaq üçün məsələni başqa tərəfə yönəldir. Guya Azərbaycan Zəngəzuru işğal etmək istəyir. Həmçinin, dəhlizin açılmasına qarşı çıxır. Halbuki, yol məsələsində Azərbaycanın İranla müqaviləsi var. Söhbət Ağbənd qəsəbəsindən İrana keçməklə Naxçıvanla quru əlaqəsinin yaradılmasından gedir. Maraqlıdır ki, İran buna qarşı deyil. Ancaq Zəngəzur dəhlizi mövzu olan kimi, İran narahat olur. Halbuki, 10 noyabr razılaşmasında Zəngəzur üzərindən Naxçıvana maneəsiz gediş-gəliş bəndi var. İran daha çox qazanc amilinə görə dəhliz məsələsinə qarşı çıxır. Çünki Zəngəzur dəhlizi açılsa İran üzərindən daşımalar azalacaq. Yox əgər Zəngəzur dəhlizi açılmasa, o zaman bütün daşımalar İran üzərindən həyata keçiriləcək. Ona görə də İran tərəfi Azərbaycana müxtəlif iftiralar atmaqla münasibətlərə xələl gətirir”.

Bir sözlə, professor hesab edir ki, İranın yeritdiyi siyasət ədalətə söykənmir.

Vidadi ORDAHALLI

Peşə etikası

Son xəbərlər