Beynəlxalq aləmdə hələ də ermənilərin başına sığal çəkənlərin olması səbəbindən nə Ermənistan hökuməti, nə bu ölkənin müxalifəti, nə də ki, Qarbağdakı separatçılar durmaq, dayanmaq bilmir, ya əl altdan, ya da aşkar şəkildə təxribatla məşğul olurlar.
Separatçılar Qarabağda gündə bir “təşkilat” yaradırlar. Yayılan məlumata görə, indi də
“Artsaxın müdafiəsi uğrunda” adlı yeni qondarma hərəkat yaradılıb. Bu haqda “Hraparak” məlumat yayıb. Bildirilir ki, hərəkat yeni “Qarabağ komitəsi” və ya “Artsax hərəkatı-2" olmaq və bütün erməniləri yenidən birləşdirmək məqsədi daşıyır. ”Əsas məqsəd istənilən şəraitdə Qarabağın Azərbaycana birləşdirilməsinin qarşısını almaqdır". Məlumata görə, qondarma hərəkatın koordinasiya şurasının üzvlərindən biri də separatçı-terrorçu rejimin qanunsuz “təhsil və mədəniyyət nazirliyi”nin nümayəndəsi Armen Petrosyandır. O, hərəkatın genişləndirilməsi işində fəal iştirak edir.
“Əgər Xankəndidə belə bir qondarma hərəkat yaradılıbsa Azərbaycanın tam ixtiyarı var ki, həm hərbi qüvvənin, həm də daxili qoşunların gücü ilə Xankəndinə daxil olsun”
Məsələyə şərh verən Azad Vətən Partiyasının sədri Akif Nağı “Bakı-Xəbər”ə bildirdi ki, ermənilər müxtəlif oyunlardan çıxırlar: “Onlar saman çöpündən yapışmış vəziyyətdədirlər. O qədər acınacaqlı vəziyyətdədirlər ki, yenidən 1988-ci ildəki hallarına qayıdırlar. Yenidən “komitə”, “müdafiə təşkilatı”, “hərəkat” yaratmağa cəhdlər edirlər. Ermənilər başa düşmürlər ki, 30 il ərzində qurduqları xam xəyalları yerinə yetmədi. Düzdür, separatçılar Ermənistan dövləti və cəmiyyəti tərəfindən ciddi şəkildə dəstəklənirdilər, amma cəhdlərinin nəticəsi olmadı. Ermənilər Azərbaycanın gücü, eyni zamanda da beynəlxalq hüquq qarşısında geri çəkilməli oldular və Azərbaycan öz ərazi bütövlüyünü təmin etmək üçün ciddi addımlar atdı və o addımlar da davam edir. Onlar Xankəndidə kiçik bir uazis, meydança saxlamaq istəyirlər, bunda da Rusiya da, Ermənistan da maraqlıdır. Heç kəsə sirr deyil ki, Qarabağdakı bir ovuc erməni nə “hərəkat” yaradan deyil, nə də hər hansı bir müqavimət göstərmək əzimindədir. Bu qondarma “hərəkat” da Ermənistan rəhbərliyinin oyunlarıdır. Baxmayaraq ki, özlərini sülhpərvər kimi qələmə verməyə çalışırlar. Bu həmçinin Rusiyanın da oyunu sayılır. Rusiya da istəyir ki, orada hansısa formada qalsın, öz mövcudluğunun təsir imkanlarını saxlasın. Orada qondarma bir qurum yaratsın və o qurum vasitəsilə də Rusiyanın sülhməramlı kontingenti orada qalsın, o həm Azərbaycana, həm də Ermənistana təsir imkanlarını saxlasın. Məqsəd bundan ibarətdir. Vəziyyət elə gətirib ki, Rusiya da artıq elə də güclü deyil. Rusiya həm İkinci Qarabağ Müharibəsinin gedişində Azərbaycanla Türkiyənin birgə gücü ilə hesablaşmalı oldu. Eyni zamanda Ukraynada ciddi problemlərlə üzləşib. İnformasiyalar gəlir və o informasiyaları təhlil edəndə görürük ki, Rusiya vəziyyətdən çıxmağa çalışır. Yəni ciddi uğursuzluğa düçar olub...
Bu baxımdan inandırıcı deyil ki, separatçılar nəyəsə nail olsunlar, amma cəhd edirlər”.
A.Nağının sözlərinə görə, Ermənistan trəhbərliyi anlamalıdır ki, yanlış yoldadır, onlar 30 il bundan əvvəl Azərbaycana qarşı yanlış addım atdılar: “Əgər Azərbaycana qarşı yanlış addım atdıqlarını dərk etmirlərsə yenə də başlarına böyük müsibətlər gələcək, Azərbaycanın zərbələrinə hədəf olacaqlar. Bunu başa düşməlidirlər. Qarabağdakı bir ovuc erməni əgər orada qalmaq istəyirlərsə bu cür hərəkətlərdən, təxribatlardan əl çəkməlidirlər. Azərbaycan vətəndaşları kimi yaşamaq istəyirlərsə Azərbaycan qanunlarına tabe olmalıdırlar. Qondarma “müdafiə” təşkilatları yaratmaqla ermənilər həmin ərzidə yaşamaq hüquqlarını itirirlər. Əgər hansısa təxribata əl atacaqlarsa artıq Azərbaycan beynəlxalq hüquq və dünya ictimaiyyəti qarşısında tam şəkildə ermənilərin oradan çıxarılması xəttini götürə bilər. Günah da onların özündə olacaq. Azərbaycan bu qədər güzəştə gedir. Ermənilərin Xocalı, Malıbəyli, Quşçular, Qaradağlı, Ballıqaya, Ağdaban soyqırımları törətməsinə baxmayaraq Azərbaycanın onlara güzəştə getməsi, yenə də onların bizim ərazilərdə Azərbaycan vətəndaşı kimi yaşamalarına icazə verməsi dövlətimizin humanistlindən irəli gəlir. Azərbaycan humanistlik edir. Bunu onlar başa düşmürlərsə, bu onların problemidir. Əgər təxribata yol verəcəklərsə onlar birdəfəlik bizim ərazilərdə yaşamaq hüququnun üstündən xətt çəkməli olacaqlar. Azərbaycan tərəfi prosesləri ciddi izləməlidir, ləngimədən addımlar atmalıdır, bu barədə beynəlxalq təşkilatları məlumatlandırmalıdır və hərəkətə keçməlidir. Necə ki, Fərrux yüksəkliyi, Laçın şəhəri, Sus və Zabux kəndləri istiqamətində hərəkət etdi həmin formada Xankəndi istiqamətində də hərəkət etməlidir. Əgər Xankəndidə belə bir qondarma hərəkat yaradılıbsa Azərbaycanın tam ixtiyarı var ki, həm hərbi qüvvənin, həm də daxili qoşunların gücü ilə Xankəndinə daxil olsun və Azərbaycan hakimiyyətini orada bərqərar etsin, oradakı qanunsuz hərəkətlərin qarşısını alısın. Azərbaycan artıq bu addımı atmalıdır”.
İradə SARIYEVA
