Ermənistanda Arazdəyən-Mehri-Horadiz dəmiryolu xəttinin inşası dondurulub. Bu barədə erməni mediası məlumat yayıb.
Qeyd olunur ki, əgər müharibədən sonra Ermənistanla Azərbaycan arasında nəqliyyat kommunikasiyalarının açılması ilk növbədə sovet dövründəki marşrut üzrə dəmir yolu əlaqəsinin bərpası demək idisə, son zamanlar diqqət avtomobil hərəkətinin açılmasına yönəlib. Dəmir yolunun açılması məsələsi gündəmdən düşüb. Bildirilir ki, ən azı 4 aydır layihənin həyata keçirilməsində heç bir irəliləyiş yoxdur.
Onu da qeyd edək ki, Ermənistan və Azərbaycan liderlərinin Soçi və Brüsseldə keçirilən görüşlərində Arazdəyən-Mehri-Horadiz dəmir yolunun tikintisi üzrə işləmək barədə razılıq əldə olunub. Ancaq son dövrlər Ermənistan dəmir yolunun çəkilməsindən yayınmaq üçün müxtəlif pozucu addımlar atır. Ən son ötən həftə Vladivastokda erməni lobbisinin nümayəndələri ilə görüşdə Ermənistanın baş naziri Nikol Paşinyan bəyan etdi ki, ölkə ərazisində dəhliz olmayacaq. Bundan əvvəl dəmir yolunun tikintisi ilə bağlı işlərin dondurulması və digər məsələlər Ermənistanın bunda maraqlı olmamasından xəbər verir.
Maraqlıdır, bəs ekspertlər baş verənləri necə dəyərləndirir? Ermənistan niyə dəmir yolundan bu qədər ehtiyat edir?
“Ermənistan nəqliyyat dəhlizlərinə icazə verməsə bundan itirəcək”
Məsələyə münasibət bildirən AMİP funksioneri Əli Orucovun fikrincə, Ermənistan tərəfinin Arazdəyən-Mehri-Horadiz dəmiryolu ilə bağlı belə fəaliyyəti Zəngəzur dəhlizinə qarşı olan mövqeyi ilə əlaqədardır: “Məqsəd odur ki, həmin xətt üzrə dəhliz olmasın. Çünki Mehridən keçən yol həm Naxçıvanla, həm də Türkiyə ilə əlaqə qurmaq baxımından məsafəcə ən qısa yoldur. Azərbaycan Horadiz-Ağbənd dəmir yolunun tikintisini sürətlə həyata keçirir. Gələn ilin sonuna qədər işlərin yekunlaşacağı bildirilir. Təbii ki, Ermənistan Mehridən dəmir yolu çəkməsə, o zaman İran üzərindən Naxçıvan və Türkiyə ilə əlaqə qurulacaq. Düzdür, yol İrandan keçərsə, bu, dəhliz statusunda olmayacaq. Ancaq yenə də heç olmamaqdan yaxşıdır. Yəni, Azərbaycan üçün alternativ variant var. Lakin əlbəttə ki, biz istərdik ki, Arazdəyən-Mehri-Horadiz dəmiryolu olsun. Rusiya həmin yola nəzarət edəcəyi üçün onun reallaşmasında maraqlıdır. Fikrimcə, Qərbdə bəzi dairələr bunda maraqlı olmadığı üçün Paşinyan prosesi yubatmağa çalışır. Yoxsa Ermənistan hakimiyyəti buna cəsarət etməzdi. Ancaq hər halda biz istənilən alternativ varianta hazır olmaqla yanaşı, Ermənistana bu yöndə siyasi-hərbi təzyiqləri artırmalıyıq. Çünki Ermənistan yalnız güclə hesablaşır”.
Partiya funksioneri onu da əlavə etdi ki, Ermənistan nəqliyyat dəhlizlərinə icazə verməsə bundan itirəcək.
Vidadi ORDAHALLI
