Rusiyanın erməniəsilli jurnalisti Marqarita Simonyan rusları və ukraynalıları birləşməyə çağırıb. Simonyan Teleqram səhifəsindəki paylaşımında hər iki xalqın bir yerdə olduğunu, Qələbə gününü qeyd etdiyini, paradlar keçirdiyini, rus və Ukrayna dillərini öyrəndiyini xatırladıb:
“Hamı birlikdə, xoşbəxt, sakit və bir yerdə olduğu üçün fəxr edir. Əla tablo idi. Əminəm ki, tarixi perspektivdə başqa variant mümkün deyil”.
Qeyd edək ki, Simonyan Ukrayna xalqına qarşı ən sərt mövqedə olan jurnalistlərdən biridir. Onun birdən-birə "birləşmədən" bəhs etməsi birmənalı qarşılanmayıb. Simonyan hər zaman həqiqətdən uzaq mövqe sərgiləyib. Xüsusilə də Qarabağla bağlı məsələdə qərəzli olaraq öz milli kimliyini, ədalətdən ön plana çıxarıb. İndi görün, belə bir adamın humanizmdən danışmağa haqqı varmı və onun bu təşəbbüsü nə dərəcədə səmimi qəbul olunacaq?
Əməkdar jurnalist, media eksperti Azər Həsrət “Bakı-Xəbər”ə açıqlamasında bildirdi ki, Marqarita Simonyanın bu yöndə olan davranışalarını onun özü də neçə gündür müşahidə edir: “Onun bu yanaşması ilə bağlı fərqli münasibətlər ortaya qoyulur. Ancaq bir fikir qırmızı xətlə keçir. Əksəriyyət bu mövqeyə şübhə ilə yanaşır. Heç kim Simonyanın dediklərini səmimi qəbul etmir. Onun xalqları dostluğa çağıran bu möqeyinə inanan yoxdur. Çünki Simonyan ara qarışdıran , xalqları qarşı-qarşıya qoyan, Rusiyanın özünün bəlalarına səbəb olan şəxsdir. Üzdə özünü rusiyayönümlü kimi aparır, güya Rusiyanın təbliğatının aparıb, həmin ölkəyə fayda verdiyi kimi təsəvvür yaradır. Ancaq mahiyyətə vardıqda görürük ki, onun bütün fəaliyyəti anti-Rusiyadır. Azərbaycan, Orta Asiya ölkələri, Baltikyanı dövlətlər, Ukraynanın özünə münasibətdə biz bunu açıq-aydın müşahidə edirik. Belə adamın birdən-birə Ukrayna ilə bağlı məlum paylaşımı etməsində bir məqsədin olduğu mütləqdir. Kreml Ukrayna bataqlığından çıxa bilmir. Ukraynaya təcavüz etsə də, müharibəni uduzub. Bilirlər ki, çox da uzağa gedə bilməyəcəklər. Yəqin ki, Kremldən tapşırıq gəlib. İstəyillər xoş meyilləri gücləndirsinlər. Bunu müharibəni saxlamaq üçün əldə əsas etmək istəyirlər. Simonyanın paylaşımını sırf bununla əlaqələndirirəm. Bütün bunlar Simonyanın əsl mahiyyətini dəyişə bilməz”.
Məhəmmədəli QƏRİBLİ
