Rusiya-Ukrayna müharibəsində ciddi dönüşün olduğu bildirilir. Ukraynanın İzyum şəhərini azad etdiyinə dair kadrlar paylaşılır.
Rusiya tərəfi Ukraynanın Xerson və Zaporojye vilayətlərinin işğal olunmuş ərazilərində “referendum”ların təşkili tarixini sentyabrın 11-dən noyabrın 4-nə keçirib. Bu barədə Melitopol meri İvan Fedorov məlumat verib.
Onun sözlərinə görə, yerli sakinlərin yalnız 10%-ə qədəri “referendumda” iştiraka razılıq verib:
“Digər tərəfdən də, Ukrayna Silahlı Qüvvələri və partizanların uğurlu fəaliyyətindən sonra “referendum”u təşkil etməli olan seçki komissiyalarında iştirak etmək istəyənlər yoxdur”.
Rusiya rəhbərliyi cəbhədəki yeni məğlubiyyətlərə cavab olaraq Silahlı Qüvvələrinin Qərb qruplaşmasının komandanlığını yenidən dəyişib.
Bu barədə Ukrayna SQ Baş kəşfiyyat idarəsi məlumat yayıb:
"RF Silahlı Qüvvələrinin qərb qruplaşmasının rəhbərliyi komandanlıqdan uzaqlaşdırılıb. Bu qərara səbəb Ukrayna Müdafiə Qüvvələrinin hücumu nəticəsində alınan sarsıdıcı məğlubiyyətlərdir". Bildirilir ki, “Mərkəz” ordu qruplaşmasına rəhbərlik edən general-leytenant Aleksandr Lapin qərargahı ilə Qərb cəbhəsinə təyin olunub. Yeni komandanlıq döyüşləri Luqanskdakı mərkəzdən idarə edəcək.
Aleksandr Lapin bu postda general-leytenant Roman Berdnikovu əvəz edib. O, 2022-ci il avqustun 26-da Qərb Hərbi Dairəsinin komandiri vəzifəsinə təyin edilib.
Hadisələrin bu cür gedişi nə vəd edir?
Azərbaycan Naminə Alyans Partiyasının rəhbəri Abutalıb Səmədov “Bakı-Xəbər”ə açıqlamasında bildirdi ki, Ukrayna ordusunun sentyabr ayında qazandığı qələbələr hamımızı sevindirir: “Rusiyanın bu müharibədə daha çox yara alması, daha da zəifləməsi həm dünyanın, həm də Azərbaycanın maraqlarına uyğundur. Dəfələrlə demişik ki, müstəqilliyimiz üçün ən böyük təhlükə Rusiyadır. Həmin ölkə rəsmilərinin verdikləri bəyanatlar bizi narahat edir, müstəqilliyimiz üçün təhlükənin azalmadığını göstərir. Ukraynanın son uğurlarının nəticəsi nə ola bilər? Görünən budur ki, müharibə get-gedə sərtləşir. Aydındır ki, Rusiya Ukraynanın bu uğurlarını gözləmirdi. Rusiyanın belə yaxalanıb, qısa müddətdə bu qədər ərazini geri verməsi çox şübhəlidir. Son iki ayda 15 km irəliləyən ruslar birdən - birə geri çəkilmək məcburiyyətində qaldılar. Gecədən bəri rusların başlatdığı raket hücumları göstərir ki, onlar daha qəddar hücumlara əl atmağa hazırdılar. ABŞ kəşfiyyatı xəbərdarlıq edib ki, rus ordusunun məğlubiyyətinin başlandığı andan Moskvanın taktik nüvə silahından istifafə etmə ehtimalı artır. Rusiya öz məğlub taleyi ilə barışmayacaq. Moskva məğlub duruma düşərsə, dünyada çox böyük dəyişikliklər baş verəcək ki, şimal qonşumuzun bunu həzm edə bilməsi mümkün deyil. Narahatçılığımız artır ki, Rusiya daha qəddar üsullara əl ata bilər”.
Məhəmmədəli QƏRİBLİ
