Azərbaycan Ordusunun hər hansı fəaliyyəti bu gün Ermənistanda, Qarabağda qalan ermənilər arasında böyük dəhşət və qorxu ilə qarşılanır. Hətta ordumuzda hər hansı bölmənin adi yerdəyişməsi belə erməniləri çox qorxudur. Elə bunun nəticəsidir ki, indi ermənilər Qarabağda vəziyyətin “gərginləşdiyini” iddia edir.
Erməni tərəfinin məlumatına əsasən, səbəb də odur ki, Qarabağda, Rusiya sülhməramlılarının nəzarətində olan ərazilərdə Azərbaycan silahlı qüvvələri “təmas xəttini keçib”, bir erməni hərbçisi yaralanıb. Ancaq Azərbaycan Müdafiə Nazirliyi ordumuzun atəş açmadığını bildirib.
Qurumdan bildirilib ki, Azərbaycan Ordusu bölmələrinin Rusiya sülhməramlılarının müvəqqəti yerləşdiyi Azərbaycan ərazisindəki qanunsuz erməni silahlı birləşmələri istiqamətində guya atəş açması barədə erməni mətbuatında yayılan məlumat yalandır, təxribatşı və çaşdırıcı məqsəd daşıyır. Ekspertlər isə qeyd edir ki, bir müddətdir, Azərbaycanın Qarabağda hərbi əməliyyatlara başlayacağı iddia olunur. Hərbi ekspertlər bunun antiterror əməliyyatı ola biləcəyinə işarə edib. Bundan əvvəl Prezident İlham Əliyev 10 noyabr üçtərəfıi razılaşmasını xatırladaraq, Qarabağda Rusiya sülhməramlılarının müvəqqəti nəzarətində olan ərazilərimizdən erməni silahlılarının hələ də çıxarılmamasından narazılığını bildirmişdi. Ermənistan bundan sonra bəyan edib ki, öz qoşunlarını Qarabağdan çıxaracaq və bu proses sentyabra qədər başa çatacaq. Ermənistan onu da bildirib ki, Qarabağ onlar üçün ərazi məsələsi deyil, hüquqi məsələdir. Azərbaycan isə məsələnin yenidən uzanmasına qarşıdır. Elə bu günlərdə müdafiə naziri Zakir Həsənov Mərkəzi Komanda Məntəqəsində nazirliyin yüksək rütbəli işçiləri və ordu komandanlığı ilə geniş tərkibli xidməti müşavirə keçirib. Nazir Azərbaycan-Ermənistan dövlət sərhədindəki, eləcə də Rusiya sülhməramlı kontingentinin müvəqqəti yerləşdiyi Qarabağ iqtisadi zonasındakı əməliyyat şəraitini və mövcud vəziyyəti geniş təhlil edib və qarşı tərəfin törədə biləcəyi istənilən təxribatın qarşısının dərhal və qətiyyətlə alınmasına daim hazır olmağı əmr edib. Bunun ardınca Müdafiə Nazirliyi bildirib ki, sosial mediada “Vətən müharibəsi və təlimlər zamanı” Azərbaycan ordusunun fəaliyyətini, hərbi kolonların, eləcə də döyüş texnikalarının hərəkətini əks etdirən foto və video görüntülər “yeni məlumat kimi” paylaşılır və bundan çəkinməyə çağırıb. Qurum bildirib ki, xidməti fəaliyyətlə bağlı Azərbaycan Ordusunun şəxsi heyəti və döyüş texnikası təlim mərkəzlərinə, ümumqoşun poliqonlarına mütəmadi olaraq hərəkət edir. İndi isə Qarabağda “gərginlik” yaşanması ilə bağlı məlumatların yayıldığı bir vaxtda ABŞ dövlət katibinin Avropa və Avrasiya məsələləri üzrə köməkçisi Karen Donfried Azərbaycan və Ermənistan xarici işlər nazirləri ilə telefonla danışıb. Azərbaycan XİN-in məlumatına görə, nazir Ceyhun Bayramov erməni silahlı birləşmələrinin Azərbaycan ərazilərindən tam çıxarılmadığını və bunun qəbuledilməzliyini bildirib. Ermənistan XİN-in yaydığı xəbərdə deyilir ki, telefon danışığı zamanı tərəflər regionda mövcud təhlükəsizlik mühiti ilə bağlı fikir mübadiləsi aparıblar.
Bunlar fonunda “Qraparak” nəşri yazır ki, Azərbaycan Qarabağda hər hansı əməliyyata başlasa, buna ABŞ və digərləri, o cümlədən Rusiya etiraz etməyəcək. Qeyd edilir ki, 2020-ci il 10 noyabr bəyanatı da buna imkan yaradır: “Azərbaycan o sənədi ona görə imzaladı ki, artıq bir çox əraziyə nəzarəti ələ almışdı. Bu, Rusiyaya da sərfəli idi, çünki nəticədə Qəbələ RLS-i itirdikdən sonra Azərbaycanda hərbi kontingent saxlaya bilməyən Rusiya Qarabağda sülməramlı qüvvələrini yerləşdirdi. Qarabağ məsələsi Rusiyanın Azərbaycanla münasibətlərində faktor olmaqdan çıxdı. Bu isə o deməkdir ki, Ermənistan Rusiya-Azərbaycan münasibətlərində mühüm aktor olmaqdan çıxıb. 44 günlük müharibədən sonra Rusiya Qarabağ danışıqlarının oyun kartından istifadə etmədən Azərbaycanla problemləri öz adından müzakirə etməyə başladı. Rusiya elan edilmiş 5 illik müddət bitdikdən sonra qoşunlarını Qarabağdan çıxarmalı olsa, Putinin planı necə olacaq? Bu barədə narahat olmağa dəyməz. Birincisi ona görə ki, bu, Rusiyanın problemidir, sonra isə bu, Paşinyanın fəaliyyəti nəticəsində Azərbaycanın daxili işidir, Azərbaycanın daxili işlərinə qarışmağa haqqımız yoxdur. Onu da deyim ki, Rusiya ordusu bu gün Qarabağdadır və açıqlanan məqsədlə deyil. Super güclər belə xırda məsələlərlə məşğul olmurlar. Onların planları adətən kiçik ölkələrin hesablamasından gec bəlli olur. Kiçik ölkələr bəzən başlarına gələnləri belə başa düşmürlər və yalnız hər şey bitəndən sonra özlərinə gəlirlər. Gürcüstan, Ukrayna və Ermənistan buna əyani sübutdur. Gürcüstan bilsəydi ki, Rusiya hərbi bazası Axalkalakidən çıxarılandan sonra onların başına nə gələcək, qətiliklə bu addımı atmazdı. Bundan ruhlanan gürcülər Abxaziya və Cənubi Osetiyanı itirdilər. Ukraynada “Maydan”dan sonra onların başına nə gələcəyini bilsəydilər, Yanukoviçlə yaxşı dolanardılar və bu gün eyni kökdən olan Ukrayna və rus xalqları arasında Krım və ya Donbas məsələsi olmazdı. Amma hər kəsin, o cümlədən supergüclərin də səhv etmək hüququ var. Paşinyan məsələsində hamı yanılırdı. Paşinyan qlobal səhvin nəticəsidir və onun hamının başına əsl bəlaya çevrilməsinin səbəbi budur. Supergüclərin heç biri öz səhvini etiraf etmək istəmir, Paşinyan da bundan istifadə edir. 44 günlük müharibədən sonra vəzifəsini davam etdirməməli, kamerasında milçəkləri saymalı idi. O, 44 günlük müharibəni qızışdırmaqla ABŞ, Böyük Britaniya, Türkiyə, Aİ-dən tutmuş Rusiya, İran və Çinə kimi hamının planlarını alt-üst etdi. Paşinyan, iradəsindən asılı olmayaraq, Qərbin Mərkəzi Asiyanın enerji daşıyıcılarını ələ keçirməklə bağlı uzunmüddətli planlarını alt-üst etdi, Rusiya qoşunlarının Azərbaycana yeridilməsinə, ikinci Rusiya-Ukrayna müharibəsinə səbəb oldu. Bütün bunlara nə Qərb, nə də Rusiya hazır idi. Dünya əhalisinin yarısı aclıq təhlükəsi ilə üz-üzədir, bütün Qərb dünyası Rusiyaya qarşı çıxıb, onu aradan qaldırmağa çalışırlar. Bütün bunlarda bizim üçün ən vacib olan budur: bu böyük döyüşün nədən ibarət olduğu heç kimin vecinə deyil. Fövqəldövlətlər bu suala cavab tapa bilmirlər, lakin Nikolla bəzi razılaşmalar sayəsində bu mühüm regionda öz mövqelərini möhkəmləndirmək ümidlərini hələ də saxlayırlar. Bir sözlə, Nikolun dəyişməsinə, Ermənistanın suverenliyini bərpa etməyə vaxt yoxdur”. Bildirilir ki, bu vəziyyətdən məharətlə istifadə edən Azərbaycan həm Qarabağda tam nəzarəti ələ keçirəcək, həm də rus sülhməramlləlarını 2025-ci ildə buradan çıxaracaq.
Nahid SALAYEV
