Avropa Komissarları Kollegiyası Ukrayna və Moldovaya AB-yə namizəd statusunun verilməsi ilə bağlı tövsiyə qərarını təsdiqləyib.
Bu məlumatı Avropanın nüfuzlu KİV-ləri yayıb. Həmin məlumatda bildirilir: “Avropa Komissarları Kollegiyasının iclası başa çatdı. Ukrayna və Moldovaya namizədlik statusunun verilməsi ilə bağlı müsbət rəy təsdiqləndi. Gürcüstan isə bu statusu almaq üçün şərtləri yerinə yetirməlidir”.
Qeyd edək ki, Aİ dövlət və hökumət başçıları 23-24 iyun tarixlərində keçiriləcək sammitdə Ukraynanın quruma üzvlük məsələsini müzakirə edəcəklər.
Bundan əvvəl Kiyevə səfərdə olan Almaniya, Fransa, İtaliya və Rumuniya liderləri Ukraynaya Avropa Birliyinə üzvlüyə namizəd statusu verilməsinə razı olduqlarını bildirdilər. Sonrakı prosedurda Avropa Birliyi hökumət başçıları Şurası bu ölkələrə rəsmən Avropa Birliyi üzvlüyünə namizəd statusu verəcək. Göründüyü kimi, uzun illərdi Avropaya inteqrasiya yolunda ciddi işlər görən, hətta buna görə sarsıdıcı zərbələr alan Gürcüstanı prosesdən kənarda saxlayıblar.
Deyiblər ki, Gürcüstan bu statusu almaq üçün bəzi şərtləri yerinə yetirməlidir. Bunu Avropa İttifaqının ikili standartı saymaq olarmı?
Avropa qurumları ilə iş təcrübəsi olan politoliq Yeganə Hacıyeva “ Bakı-Xəbər”ə açıqlamasında bildirdi ki, 2008-ci ildə “Şərq Tərəfdaşlığı” Proqramı formalaşanda ümumi yanaşma bundan ibarətiydi ki, ora keçən ölkələr sonrakı mərhələdə təşbüskar olarlarsa, Avropa Birliyi üzvlüyünə namizəd və üzv kimi qəbul edilərlər: “Buna əsas kimi keçmiş SSRİ-nin orbitində olan bəzi ölkələrin quruma üzvlük proseduru götürülürdü. AB-nin bu prosesi uzatması keçmiş SSRİ-yə üzv olan bəzi ölkələri ciddi zərbə altına qoydu. Bu proqram elan ediləndən sonra, 2008-ci ildə Rusiya Gürcüstana açıq müdaxilə etdi. Onun ərazisində olan iki separatçı rejimə dəstək verdi. Avropanın addımlarından hiss edilir ki, elan olunan məqsədlərlə onun atdığı addımlar arasında ciddi dizbalans var. Saakaşvilinin hakimiyyətdən getdiyi dönəmdə Gürcüstanda fərqli bir tendensiya yaşandı. Onun tərəfdarlarının çoxu ölkəni tərk etdi. Görünən bu oldu ki, Avropa dəyərləri özünü həmin coğrafiyada çox da doğrultmur. Post-sovet ölkələri arasında cinsi azlıqlara qarşı ən total etiraz məhz Gürcüstanda oldu. Bu çirkli mövzular Avropa dəyərlərini gözdən salmış olur. Bu gün Gürcüstanın özü üçün də Avropa Birliyinə üzvlük məsələsi heç prioritet sayılmır. Həmin ölkə təhlükəsizliyi və iqtisadiyyatı ilə bağlı daha ciddi problemlərin öhdəsindən gəlməyə çalışır. Rusiya bu aqresiv vaxtında AB üzvlüyünə namizəd olub, özünü hədəfə gətirmək istəmir. Ukrayna nümunəsi göstərdi ki, Qərb üçün ölkələrin dağılması narahatedici deyil. Heç kim demir ki, gün ərzində Ukrayna 1000-ə yaxın əsgərini itirir. Yəni Gürcüstanın bu proseslərdən kənarda qalmasının başlıca səbəbi həmin ölkənin özünün lazımi təşəbbüs göstərməməsidir. Çünki indiki məqamda bu Gürcüstana yaxşı nəsə vəd etmir”.
Məhəmmədəli QƏRİBLİ
