Ermənistan parlamentinin vitse-spikeri, Daşnaksütyun partiyasının funksioneri İşxan Saqatelyan çətin situasiya qarşısında qalıb. 1 aydan çoxdur ki, ölkədə mitinqlər təşkil edən müxalifət lideri xalqa vətənpərvər çağırışlar edir, hakimiyyəti satqınlıqda, qorxaqlıqda suçlayır.
Məlum olub ki, onun özü ilə yanaşı atası da elə ölkənin ən böyük qorxaqlarından, fərarilərindən biridir. Sən demə, 44 günlük müharibə zamanı İşxan Saqatelyanın atası Vaçik Saqatelyan cəbhə bölgəsinə getməkdən boyun qaçırıb.
Bu faktı ifşa edən deputat Narek Qriqoryan parlamentin iclasında diqqət çəkən və maraqlı fikirlər səsləndirib. O, “Müqavimət” hərəkatının koordinatoru İşxan Saqatelyana müraciət edərək məlum fakta aydınlıq gətirməsini tələb edib:
“İcazə verin sizə bir məlumat verim. Bu, 44 günlük müharibə zamanı baş verib. Oktyabrın 20-də mənim Geqarkunik dəstəsinə Saqatelyan familiyalı bir adam gətirildi. O, İşxan Saqatelyanın atası Vaçik Saqatelyan idi. Həmin şəxs xəstələndiyini dedi və xahiş etdi ki, "evə gedim, oğlanlarım gəlib mənim əvəzimə döyüşlərdə iştirak edəcəklər". Vaçik getdi və uşaqlarından heç biri dəstəmizə qoşulmadı. Heç onun oğlanlarının 44 günlük müharibədə bir gün belə iştirak etdiyini də düşünmürəm”.
Qeyd edək ki, radikal daşnak olan İşxan Saqatelyan iqtidarla yanaşı Azərbaycana qarşı da sərt çağırışları ilə seçilir. O, dəfələrlə revanşist fikirlər və bəyanatlar səsləndirib, Azərbaycana ərazi iddialarından əl çəkməycəklərini deyib.
Bu ifşanın özü Ermənistanda fərariliyin çox yüksək səviyyədə olduğuna əlavə dəlil sayıla bilərmi?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Ermənistan ordusunda fərarilik müharibədən əvvəl də olub: “Ancaq müharibənin gedişi və ondan sonrakı dönəmdə bu daha da artdı. Təsadüfi deyil ki, hazırda 12 min Ermənistan vətəndaşı ordudan fərarilik etdiyi səbəbindən axtarışdadır. Azərbaycanın 44 günlük Vətən müharibəsində Ermənistana vurduğu ziyanın miqdarı əhəmiyyətli dərəcədə böyükdür. Bura Ermənistan ordusunun məhv edilməsi, iqtisadiyyatının işğalçı siyasətin nəticəsi olaraq çökməsi və əhalinin acınacaqlı vəziyyətə düşməsi daxildir. Milli Ordumuz şanlı qələbə sayəsində işğal altında olan torpaqlarımızın azad edilməsindən əlavə, Ermənistanın ordusunu çarəsiz qoyub. Ermənistan ordusunun tərkibində işğal altındakı torpaqlarda xidmət apararkən əsgərlər ən pis halda zərərsizləşdirilir, ən yaxşı halda isə fərariliyi seçirdilər.
Rəsmi məlumatlar onu göstərir ki, Ermənistanda fərarilik faktları ilə əlaqədar açılan cinayət işlərinin sayı 10 mini keçib. Bu onu göstərir ki, Ermənistan ordusu ətrafında yaradılan “güclü” və “məğlubedilməz” ifadəsi sadəcə mif və yalandan başqa bir şey olmayıb. 44 gün ərzində Azərbaycan Ordusu qarşısında ağ bayraq qaldıran və dabanına tüpürərək qaçmağı seçən Ermənistan ordusu yaratdığı mifin yalan olmasını bununla təsdiq etmiş olub. Vəziyyət o həddə çatıb ki, Ermənistan Parlamenti Cinayət Məcəlləsinə müharibə dövründə bəzi hərəkətlərə görə cəzaların sərtləşdirilməsini nəzərdə tutan dəyişiklik layihəsini birinci oxunuşda qəbul edib. Belə ki, hərbi xidmətdən, təlimlərdən və səfərbərlikdən yayınmaya görə ermənilər 6 ildən 12 ilədək həbs ediləcəklər. Daha əvvəl sözügedən əməllərə görə həbs cəzası 4 ildən 8 ilədək nəzərdə tutulurdu. Qərarın ilk oxunuşdan qəbul olunması ölkədəki hərbi vəziyyətlə bağlıdır. Belə ki, sosial şəbəkələrdə yayılan videolarda erməni hərbi qulluqçular hərbi xidmətdən yayınır, könüllülər isə cəbhəyə yollanmaqdan imtina edirlər. Belə bir fakt ölkənin tanınmış siyasətçiləri və onların ailələri ilə bağlı da baş verirsə, deməli vəziyyət təxmin ediləndən də kritikdir”.
Məhəmmədəli QƏRİBLİ
