Rusiya xarici işlər naziri Sergey Lavrov İrəvanda keçirilən mətbuat konfransında bildirib ki, Qarabağın Fərrux kəndindəki vəziyyət Rusiya sülhməramlılarının diqqət mərkəzindədir:
“Fərruxdakı vəziyyətə gəlincə, bu, Rusiya hərbçiləri üçün prioritet məsələdir və erməni dostlar bundan xəbərdardırlar. Artıq vəziyyətin sabitləşməsi baxımından müəyyən nəticələr var. Delimitasiya ilə bağlı əsaslı işlərin bir hissəsi kimi bu məsələlərə baxılacaq və həll olunacaq”.
Qeyd edək ki, Lavrovun bu açıqlaması olduqca təəccüblü və qarışıqdır. Belə görünür ki, erməni jurnalistin sualına cavab verən Lavrov ya Fərruxun harada yerləşdiyini unudub, ya da Serbiyaya gedə bilmədiyi üçün aldığı ağır psixoloji zərbənin təsiri altındadır.
Fərrux – Azərbaycanın Qarabağ inzibati ərazisində yerləşən kiçik bir kənddir və Ordumuzun nəzarəti altındadır. Rus sülhməramlıları hazırda o kənddə yerləşir. Bu kəndin delimitasiyaya, sərhəd müəyyənləşməsinə nə aidiyyəti var?
Azərbaycan Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva Rusiya xarici işlər naziri Sergey Lavrovun Ermənistana səfəri çərçivəsində keçirilən mətbuat konfransında Xocalı rayonunun Fərrux kəndi ilə əlaqəli vəziyyətin Azərbaycan və Ermənistan arasında sərhədlərin delimitasiyası kontekstində nəzərdən keçiriləcəyinə dair fikrini şərh edərkən bildirib ki, Azərbaycan və Ermənistan tərəfindən təsis edilmiş delimitasiya komissiyalarının fəaliyyəti, əvvəlcədən nəzərdə tutulduğu kimi, məhz iki ölkənin dövlət sərhədinin delimitasiyası məqsədini güdür:
"Bu proses çərçivəsində Azərbaycan-Ermənistan dövlət sərhədindən kənar hər hansı bir məsələyə, o cümlədən Azərbaycan Respublikasının Rusiya sülhməramlı kontingentinin müvəqqəti yerləşdiyi ərazilərlə bağlı məsələyə baxılması nəzərdə tutulmur".
Bundan sonra Rusiya Xarici İşlər Nazirliyinin rəsmi saytında Sergey Lavrovun İrəvanda erməni həmkarı Ararat Mirzoyanla birgə mətbuat konfransında Xocalının Fərrux kəndi ətrafındakı vəziyyətlə bağlı səsləndirdiyi fikirlərə düzəliş edilib.
Lavrovun Fərrux kəndi ilə bağlı ünvanlanan suala cavabı bu cür verilib:
"Qarabağda vəziyyətin deeskalasiyası baxımından müəyyən nəticələr var. Ümid edirik ki, Ermənistan-Azərbaycan sərhədinin delimitasiyası prosesinin başlanması Bakı ilə İrəvan arasında etimadın artmasına və Rusiya sülhməramlı kontingentinin məsuliyyət zonasında Fərrux kimi insidentlərin qarşısını almağa kömək edəcək".
Əslində Lavrovun düzəlişi də heç nəyi dəyişmir. Yenə də prosesi delimitasiya və demorkasiya prosesinə bağlayır. Azərbaycanın ərazi vahidinə aid olan Fərruxla bağlı Rusiyanın bu ziddiyyətli mövqeyindən hansı nəticə çıxa bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Lavrovun bu açıqlamasından maraqlı nəticələr çıxarmaq olar: “Rusiyalı nazir bununla ölkəmizə qarşı separatçı fikirlərə üstüörtülü dəstəkmi ifadə edir, yoxsa ermənilərə özünü sevdirmək üçün bilərəkdən İrəvanda Ermənistan XİN-in binasında onların könlünü oxşayacaq fikirlər səsləndirir? Hər iki halda da Sergey Lavrov aşkar şəkildə öz tribunasından təxribat üçün istifadə etmiş sayılmalıdır. Çünki Lavrovun sözləri ilk növbədə Rusiyanın müttəfiqi olan bir ölkənin ərazi bütövlüyünə aşkar şəkildə hörmətsizlikdir. Əgər Sergey Lavrov şüurlu şəkildə belə bir cümlə qurmaq ixtiyarını özündə görübsə, demək ki, məsələnin arxasında tamam fərqli mətləblər dayanıb. İstənilən halda, Sergey Lavrov İrəvanda Rusiya diplomatiyasına xələl gətirən fikir səsləndirib. S.Lavrovun bu cür duruma düşməsindən çıxış yolunu düzəliş etməkdə görüblər. Ancaq necə deyərlər, üzrü qəbahətindən betər olub. Yenə də prosesi sərhədlərin dəqiqləşməsi, Risiya sülhməramlıları ilə bağlayıblar. Halbuki, Fərruxun sərhədə heç bir aidiyyəti yoxdur. Hər halda, XİN rəhbəri vəzifəsini daşıyan bir diplomatın olduqca həssas prosesləri şərh edərkən məlumatsız olması və ya aşkar təxribata əl atması ilk növbədə onun təmsil etdiyi dövlətin maraqlarına xələl gətirir. Odur ki, S.Lavrov şüurlu və ya şüursuz şəkildə, ən yumşaq şəkildə desək, səhvə yol verib. Sanki demək istəyir ki, Fərrux Azərbaycanın nəzarətində olmamalıdır. Lavrovun bəhs etdiyi bölgədə heç bir delimitasiya prosesindən söhbət belə gedə bilməz”.
Məhəmmədəli QƏRİBLİ
