Məlumdur ki, Ermənistanda hökumət orduda dəyişikliklər etməyi planlaşdırır, bunun nəticəsində Baş Qərargah rəisi müdafiə nazirinə tabe olacaq. Ermənistanın İctimai Televiziyasına müsahibəsində müdafiə naziri Suren Papikyan faktı təsdiq edib: “İndi mən daha bir qanunvericilik təşəbbüsü haqqında danışacağam.
Söhbət Müdafiə Nazirliyinin strukturunda dəyişikliklərdən gedir. Bizim yeni modelimiz olacaq, ona görə Baş Qərargah rəisi müdafiə nazirinin birinci müavini olacaq. Silahlı qüvvələr yalnız ölkənin müdafiəsi, döyüş hazırlığı ilə məşğul olacaq”.
Ermənistan Konstitusiyasına görə, Silahlı Qüvvələrin ən yüksək hərbi vəzifəli şəxsi Baş Qərargah rəisidir. Bu fonda iddia edilir ki, təklif olunan dəyişiklik Konstitusiyaya ziddir. Lakin ölkənin Ədliyyə Nazirliyi burada heç bir ziddiyyət görmədiklərini bildirib. Papikyanın qeyd etdiyi qanunvericilik təşəbbüsü isə yaxın vaxtlarda parlamentə göndəriləcək. Qeyd edək ki, həm parlament müxalifəti, həm də digər qüvvələr hakimiyyəti Ermənistanda hələ də Baş Qərargah rəisinin olmamasına görə tənqid edir. Silahlı Qüvvələrin Baş Qərargahının sonuncu rəisi Artak Davtyan olub, o, bu ilin fevralında tutduğu vəzifədən azad edilib. Bundan sonra Baş Qərargah rəisinin birinci müavini Kamo Koçunts Baş Qərargah rəisinin səlahiyyətlərini icra etməyə başlayıb. Bir il əvvəl Baş Qərargah rəisi Onik Qasparyan və digər 40 yüksək rütbəli hərbçi baş nazirin istefasını tələb etdikdə işdən çıxarılmışdı. O vaxt Nikol Paşinyan bunu silahlı çevrilişə cəhd hesab edirdi. Hakimiyyətin Baş Qərargah rəisi ilə bağlı indiki yanaşmasını müxalifət qəbul etmir. Ermənistan parlamentinin “Şərəf duyuram” fraksiyasının deputatı Tiqran Abrahamyan bu xüsusda qeyd edir: “Müdafiə naziri deyir ki, orduda islahatlar aparılacaq, bunun nəticəsində Silahlı Qüvvələr ölkənin müdafiəsi, döyüş hazırlığı, məşğul olmalı olduğu işlə məşğul olacaq”. Onun sözlərinə görə, Ermənistan hakimiyyəti buna nail olmaq üçün Baş Qərargah rəisinə müdafiə nazirinin birinci müavini statusunun verilməsi barədə qərar qəbul edib: “Müdafiə naziri indiyədək xəbərdar deyil ki, qoşunların döyüş qabiliyyəti, döyüş hazırlığı ilə bağlı məsələ “islahat”dan əvvəl Silahlı Qüvvələrin Baş Qərargahının əsas vəzifəsi olub. İkincisi, hökumət Baş Qərargah rəisini müdafiə nazirinin tabeliyinə verməklə keçmiş Baş Qərargah rəisi Onik Qasparyanın dövründə verilən bəyanatların qarşısını alacağını düşünür. Belə çıxır ki, baş nazirə tabe olan keçmiş Baş Qərargah rəisi hökumət üçün arzuolunmaz bəyanat verib və hökumətin fikrincə, Baş Qərargah rəisi müdafiə nazirinin birinci müavini olsaydı, bu baş verməyəcəkdi. Absurddur. Üçüncüsü, Baş Qərargah və Müdafiə Nazirliyində eyni funksiyaları yerinə yetirən bölmələr var ki, onlar struktur dəyişiklikləri yolu ilə yenidən təşkil edilməlidir, lakin bunun üçün Baş Qərargah rəisini müdafiə nazirinin birinci müavini təyin etməyin mənası yoxdur. Üstəlik bu, həll yollarından daha çox, problemlərə səbəb olur. Baş Qərargahın yalnız döyüş hazırlığı ilə məşğul olmasından danışırlar, amma onu nazirliyin tabeliyinə daxil edirlər, hər şeyi qarışdırırlar”.
Erməni politoloq Armen Baqdasaryan isə qeyd edir ki, Silahlı Qüvvələrin Baş Qərargah rəisinin Ermənistanın müdafiə nazirinə tabe olması orduya siyasi nəzarəti gücləndirəcək: “Söhbət ordunun bilavasitə siyasi rəhbərliyə tabeliyindən gedir. Mənə elə gəlir ki, gələcəkdə ordunun, lazım gələrsə, siyasi proseslərə cəlb edilməsi və ya istənilən müstəqil ordu üzərində siyasi nəzarəti ələ keçirmək vəzifəsi qarşıya qoyulur”. Onun sözlərinə görə, regionun bir sıra ölkələrində ordu çox ciddi siyasi rol oynayır: “Ola bilsin ki, bu amilləri nəzərə alaraq Paşinyan belə bir qərar verib”. Suren Papikyan isə bunları yanlış hesab edir: “Ordu siyasətdən uzaqdır. Nəzərdə tutulan dəyişikliklərə əsasən, Silahlı Qüvvələrin Baş Qərargahı bundan sonra tədarük və maddi-texniki təchizatla məşğul olmayacaq. Halbuki, qüvvədə olan qanuna əsasən, Silahlı Qüvvələrin Baş Qərargahı “Silahlı Qüvvələrin əməliyyat, texniki və maddi-texniki təminatını” təşkil edir. Bütün bunlarla Müdafiə Nazirliyinin tərkibində olan digər idarələr məşğul olmalıdır. Yəni logistikadan başlayaraq bütün bunları qeyri-hərbi qurum həyata keçirməlidir”. Papikyan opponentlərin müharibədən sonra orduda gözlənilən dəyişikliklərin baş verməməsi ilə bağlı iddialarına cavab verib və bunu yanlış adlandırıb. Ermənistanın “Yerevan.Today” nəşri isə nazirin yalan danışdığını yazır: “Məlum olur ki, müharibə bitdikdən təxminən 2 il sonra 3 dəfə böyük sərhədyanı bölgələrə tam təhlükəsiz şəraitdə nəzarət olunmur, bəzi yerlərdə sərhəd qoşunları tikililərdə deyil, bərbad çadır şəraitində yerləşdirilib. Ermənistanda saxta sülh dövrünü açanlar Azərbaycan ordusunun nişangahı altında çadırların olmasını normal hesab edirlər. Buna görə də mütəmadi olaraq itkilər, əsirlər olur, müharibədən 1 il 7 ay keçsə də, ordu hələ də silahlandırılmır. Müharibədən az qala iki il keçməsinə baxmayaraq, erməni sərhədçisi hələ də çadırda pis vəziyyətdədir”.
Samirə SƏFƏROVA
