İkinci Qarabağ müharibəsindən sonra Azərbaycanın regionda yaratdığı yeni reallıq Ermənistanın təhlükəsizliyinin əhəmiyyətli dərəcədə ölkəmizdən asılı vəziyyətə düşdüyünü göstərir. Artıq bu faktın etirafı Ermənistanın özündə belə tez-tez dilə gətirilir.
Məsələ ilə bağlı erməni mediası diqqəti ona yönəldir ki, Bakı yaranmış vəziyyətdə İrəvanı istədiyi şərtlərə razı salmaq imkanı qazanıb. Ermənistanın “Past” nəşri bununla bağlı qeyd edir: “Bu yaxınlarda Nikol Paşinyan “Ermənistanın 2021-ci il büdcəsinin icrası barədə” hesabatın müzakirələrində iştirak edərək bir-birinin ardınca ideyalar irəli sürürdü. Paşinyanın sözlərinə görə, onlar nəinki əvvəllər proqnozlaşdırılandan daha yüksək iqtisadi artım templərinə nail olublar, həm də büdcə gəlirlərinin təmin edilməsi hissəsini üstələyiblər. Bir sözlə, Paşinyan özünün ürəyincə və görünməmiş nəticələr əldə etdiklərini göstərməyə çalışırdı. Aydın məsələdir ki, bu, növbəti manipulyasiya, açıq-aşkar yalan bəyanat və cəmiyyətimizi ələ salmaqdır. Mütəxəssislər də bu barədə danışdılar, lakin bütün bunları başa düşmək üçün mütəxəssis olmaq lazım deyil, sadəcə olaraq Ermənistanda yaşamaq və astronomik gəlirləri olan hakim fraksiya üzvü olmamaq kifayətdir. Bu fonda isə bu hakimiyyətin hansı uğursuzluqlarla üzləşdiyini, Ermənistana hansı görünməmiş ziyanı vurduğunu anlamaq heç də az əhəmiyyət kəsb etmir. Əvvəla, açıq-aşkar görünür ki, Nikol Paşinyanın Qarabağ müharibəsində məğlub olması nəticəsində biz əhəmiyyətli bir hissəni itirdik. Onun “yüngül əli” ilə Qarabağ ərazisinin təxminən 75%-i, yəni keçmiş DQMV-nin tərkibində olan Şuşa və Hadrut da daxil olmaqla 9 rayon Azərbaycanın nəzarətinə qayıtdı. Ermənistan isə, faktiki olaraq, əhali üçün lazım olan yaşayış sahəsindən məhrum edilib və hər tərəfdən Azərbaycan qüvvələri ilə mühasirəyə alınmış anklav görünüşü alıb. Ermənistanla Qarabağ arasında yeganə əlaqə olan Laçın dəhlizi də Azərbaycanın müşahidəsi altındadır. Əgər keçmişdə Ermənistan Qarabağın təhlükəsizliyinin təminatçısı idisə, indi Paşinyanın hakimiyyəti sayəsində Ermənistan hətta öz təhlükəsizliyini belə təmin edə bilmir”. Nəşr bildirir ki, məhz bu vəziyyətdə regionda şərtləri Azərbaycan diqtə edir, Ermənistan da bununla razılaşır.
Bununla yanaşı diqqət ona yönəldilir ki, müxalifətin 1 aydan çoxdur davam edən etiraz aksiyası fonunda ictimai-siyasi vəziyyətin gərginləşməsi, ziddiyyətlərin böyüməsi ilə Ermənistan daha zəif duruma düşür və bunu Azərbaycanda da yaxşı görürlər. “Suveren Ermənistan” partiyasının rəhbəri David Sanasaryan da məsələyə məhz bu prizmadan yanaşır: “Mən əvvəllər də deyirdim ki, bu hərəkatın arxasında duran insanlar dinc mitinqlər keçirə bilməyəcəklər. Çünki 27 oktyabr və 1 mart hadisələrinə görə məsuliyyət daşıyanlar öz təbiətlərinə görə dinc və demokratik ola bilməzlər. Halbuki, bugünkü mübarizə üsulu “dinc” olmalı idi”. O qeyd edib ki, müxalifətin təşkil etdiyi hərəkatın arxasında duranlar ölkədə xaos yaratmağa çalışacaqlar. Bu isə Kollektiv Təhlükəsizlik Müqaviləsi Təşkilatının (KTMT) sülhməramlı qüvvələrinin Ermənistanın suveren ərazisinə soxulmasına gətirib çıxaracaq: “Nəticədə biz dövlətçiliyimizi və suverenliyimizi itirəcəyik. Əvvəllər də deyirdim ki, müxaliflər sülhün yaxınlaşdığını görəndə, özlərinin “köhnəldiyini” anlayacaqlar və aqressiv davranışlara keçəcəklər. Mitinqlərdə son zorakılıqlar bunun əyani təsdiqinə çevrildi”. Qeyd edək ki, apreldən başlayan vətəndaş itaətsizliyi aksiyaları zamanı ilk dəfə olaraq polis iyunun 4-də aksiyanı dağıtmaq üçün səs-işıq qumbaralarından istifadə edib. Ermənistan Səhiyyə Nazirliyinin yaydığı məlumata görə, mitinqdən sonra tibb məntəqələrinə 60 nəfər müraciət edib. Onlardan 39-u polis əməkdaşı olub.
Xatırladaq ki, müxalifət aprelin 25-dən başlayaraq baş nazir Nikol Paşinyanın istefası tələbi ilə etiraz aksiyaları keçirir. Müxalifətçilər etirazlarına əsas kimi hakimiyyətin yürütdüyü uğursuz siyasəti göstərirlər. Onlar baş nazirin xarici siyasətinin ölkəni uçuruma sürüklədiyini, xalqı dövlətçiliyin itirilməsi ilə üz-üzə qoyduğunu iddia edirlər. Radikal müxalifətçilər aksiya və yürüşlərində Azərbaycan əraziləri ilə bağlı təxribatçı çağırışlar da edirlər. David Sanasaryan qeyd edir ki, müxalifətin mitinqləri Ermənistanı daha da zəiflədir. O qeyd edir ki, belə vəziyyətdə Ermənistan Azərbaycanın dediklərinə əməl etməyə məcburdur və müxalifət də bunu nəzərə almalıdır. Ermənistanda hakimiyyət tərəfindən Qarabağla bağlı müzakirələrin aparılmasına dair təklifin rədd edilməsi bunun konkret təsdiqi hesab olunur. Belə ki, “Hayastan” və “Şərəf duyuram” fraksiyaları parlamentin növbədənkənar iclasını çağıraraq, Ermənistan-Azərbaycan və Ermənistan-Türkiyə əlaqələrinin hazırkı durumu ilə bağlı hesabat tələb edib. Həmçinin Qarabağın Azərbaycanın ərazi bütövlüyü daxilində tanınacağı ilə bağlı hakimiyyətin qəti təkzib verməsini istəyib. Qanunvericiliyə görə, müxalifət partiyalarının parlamentin iclasını çağırmaq üçün deputat sayı kifayət qədərdir. Ancaq yetərsay olması və iclasın baş tutması üçün mütləq hakim partiya deputatlarına ehtiyac var. Hakim partiyadan deputatlar qatılmadığı üçün yetərsay alınmayıb və iclas ləğv olunub. Parlamentdə çoxluğa malik olan “Vətəndaş müqaviləsi” fraksiyası belə bir iclasın keçirilməsinə imkan verməyəcəyini əvvəlcədən elan edib. Növbədənkənar iclasa hakim partiyanın deputatlarından yalnız parlament sədri Alen Simonyan qatılıb. Beləliklə, müxalifət 4 saat parlamentdə gözləyəndən sonra iclas ləğv edilib.
Samirə SƏFƏROVA
