Ermənistanın baş naziri Nikol Paşinyan Avropa İttifaqının Cənubi Qafqaz üzrə xüsusi nümayəndəsi Toivo Klaarı qəbul edib. Görüş zamanı tərəflər bir sıra məsələləri müzakirə ediblər.
Belə ki, görüş zamanı baş nazir Ermənistan və Avropa İttifaqı arasında tərəfdaşlığın əhəmiyyətini qeyd edib, Avropa Şurasının sədri Şarl Mişelin regional sabitliyə yönəlmiş səylərini yüksək qiymətləndirib. Görüşdə diqqəti çəkən məqam o olub ki, Paşinyan Qarabağ probleminin həlli üçün ATƏT-in Minsk Qrupu həmsədrlərinin fəaliyyətinin vacibliyini vurğulasa da, qarşı tərəfdən bununla bağlı dəstək ala bilməyib. Öz növbəsində T.Klaar qeyd edib ki, Aİ Ermənistanla əməkdaşlığın dərinləşdirilməsinə önəm verir, amma regional dialoqu təşviq edir. Həmsöhbətlər Brüssel görüşlərinin yekunları üzrə əldə olunmuş razılaşmaların həyata keçirilməsi ilə bağlı fikir mübadiləsi aparıblar. Delimitasiya və sərhəd təhlükəsizliyi komissiyasının işi, o cümlədən infrastrukturların blokdan çıxarılması ilə bağlı məsələlər qaldırılıb.
Görünən odur ki, Paşinyan nə qədər çalışsa da Klaarı Minsk Qrupu məsələsində təxribata çəkə bilməyib.
AMİP funksioneri Əli Orucovun fikrincə, Klaarın Paşinyanla görüşdə sərgilədiyi mövqe təsadüfü deyil: “Bütün bunlar, 44 günlük Vətən müharibəsindən sonra yaranan reallıqlardan irəli gəlir. Həmin reallıqları da şərtləndirən amil Azərbaycan Ordusunun möhtəşəm zəfəri olub. Avroittifaq görür ki, ATƏT-in Minsk Qrupu fiaskoya uğrayıb. Rəsmən Minsk Qrupu buraxılmasa da, praktiki olaraq qurumun ölü olması bütün tərəflərə bəlli olan bir reallıqdır. Belə olan halda ölü bir qurumu necə diriltmək olar? İkinci Qarabağ müharibəsindən sonra Avropa İttifaqı tərəflər arasında vasitəçilik missiyasını həyata keçirir. Aİ-nin təşəbbüsü ilə tərəflər diversantlarla mina xəritələrinin mübadiləsini həyata keçirib. Ən önəmlisi isə Avropa İttifaqı Şurası Prezidenti Şarl Mişelin vasitəçiliyi ilə Azərbaycan və Ermənistan dövlət başçıları arasında indiyə qədər 3 dəfə görüş keçirilib. Sözügedən görüşlərdə də praktiki olaraq bir sıra razılaşmalar əldə olunub. Hansı ki, Minsk Qrupu 30 ilə yaxın fəaliyyəti dövründə heç bir razılaşmanın əldə olunmasına nail ola bilmədi. İşləri ancaq turist səfərindən o tərəfə keçmədi. Paşinyan “bəlkə də qaytardılar” prinsipindən çıxış edərək Minsk Qrupunu yenidən fəallaşdırmaq istəyir. Hansı ki, bu, mümkün olan iş deyil. Ən azından ona görə ki, Azərbaycan bununla heç vaxt razı olmayacaq. Belə olan halda real olmayan bir təşəbbüsə Aİ niyə şərik olsun ki? Bu baxımdan hesab edirəm ki, rəsmi İrəvanın həmsədrlik formatı ilə bağlı istəkləri fiaskoya məhkumdur”.
Partiya funksioneri onu da qeyd etdi ki, Azərbaycan sözügedən məsələdə daha da qətiyyətli mövqedən çıxış etməlidir.
Vidadi ORDAHALLI
