Ermənistanın baş naziri Nikol Paşinyan parlamentdə çıxışı zamanı bəyan edib ki, Ermənistan və Azərbaycan ötən həftənin sonunda Brüsseldə keçirilən danışıqlardan sonra birgə bəyanatın mətni ilə bağlı razılığa gələ bilməyib.
Daha sonra Paşinyan 19 apreldə Rusiya ilə imzalanan ikitərəfli bəyanata əsaslanaraq qeyd edib ki, ATƏT-in Minsk Qrupu təcrübəsindən istifadə olunmalıdır və Dağlıq Qarabağ münaqişəsi nizamlanmalıdır: “Təbii ki, Brüsseldə Qarabağ münaqişəsi ilə bağlı çox ciddi müzakirələr aparılıb. Və bu müzakirələr nəticəsində Ermənistan və Azərbaycanın mövqelərində fikir ayrılıqları qeydə alınıb”.
Daha sonra Paşinyan bunları deyib: “Hazırda Azərbaycanla sülh danışıqlarının iki formatı müzakirə olunur. Ermənistanla Azərbaycan arasında münasibətlərin nizamlanmasına Qarabağ məsələsi də daxildir, yoxsa buna ayrıca baxılmalıdır? Azərbaycan təkid edir ki, tərəflər bir-birinə ərazi iddialarının olmadığını bəyan etsinlər. Biz deyirik ki, bu məqbuldur, çünki bizim üçün Dağlıq Qarabağ məsələsi ərazi məsələsi deyildi. Biz deyirik ki, bu, hüquqla bağlı məsələdir”.
Paşinyanın açıqlamasında diqqəti çəkən məqam odur ki, o, Putinlə əldə etdiyi razılaşmadan sitat gətirir. Deyir ki, Dağlıq Qarabağ münaqişəsinin tənzimlənməsində Minsk Qrupunun təcrübəsindən istifadə edilməlidir. Bununla Paşinyan bir növ Putinin ona verdiyi dillə danışır. Ona istinad edərək münaqişənin həll olunmadığını deyir. O üzdən, münaqişənin həllində MQ formatından istifadə olunmalıdır. Görünən odur ki, Putinlə Paşinyanın əməkdaşlığı, birliyi sayəsində əldə olunan razılaşmalar Brüssel razılaşmasının əleyhinə konkret şəkildə işləməyə başlayıb.
“Bunun nəticəsidir ki, 22 mayda Brüsseldə keçirilən görüşdə hər hansı sənəd imzalanmadı”
Məsələyə münasibət bildirən Azərbaycan Dirçəliş və Tərəqqi Partiyasının sədri Ramil Hüseynovun fikrincə, Paşinyanın belə pozucu mövqedən çıxış edəcəyi gözlənilən idi: “Məsələ ondadır ki, 6 apreldə keçirilən ikinci Brüssel görüşündən sonra Paşinyan nisbətən pozitiv mesajlar verdi. Parlamentdə bəyan etdi ki, dünya Ermənistanın Dağlıq Qarabağın statusu ilə bağlı tələblərinin aşağı salınmasını istəyir. Bu o demək idi ki, Ermənistan Qarabağın Azərbaycanın tərkibində olması ilə razılaşmalıdır. Bu açıqlamadan dərhal sonra Kremlə bağlı müxalifət etiraz aksiyalarına start verdi. Revanşistlər bütün resurslarını səfərbər etdilər. Aydın məsələ idi ki, onların arxasında Rusiya dayanır. Daha sonra Paşinyanın Rusiyaya rəsmi səfəri oldu və iki ölkə arasında 30 maddədən ibarət sənəd imzalandı. Paşinyan Moskva səfərindən qayıdan kimi 180 dərəcə mövqeyini dəyişdi. Dedi ki, Qarabağda olan ermənilərin status məsələsi nəzərə alınmadan sülh ola bilməz və s. Bütün bunlar onu göstərir ki, Kremldə Paşinyan bir növ tənbeh edilib. Rusiya rəhbərliyi Paşinyanı hədələyir ki, onların dediyi olmasa hakimiyyətdən zorla devriləcək. Ermənistanda səngiməyən etiraz aksiyaları da buna hesablanıb. Bunun nəticəsidir ki, 22 mayda Brüsseldə keçirilən görüşdə hər hansı sənəd imzalanmadı. Bəli, Paşinyan Rusiyanın təlimatı ilə Brüssel görüşünün nəticələrini heçə endirməyə çalışır. Onun patlamentdə səsləndirdiyi məlum fikirlər buna əyani sübutdur”.
Partiya sədri onu da qeyd etdi ki, Avroittifaq Ermənistana təzyiqləri artırmalıdır.
Vidadi ORDAHALLI
