Avropa İttifaqı (Aİ) Şurasının Prezidenti Şarl Mişel Rusiyanı dezinformasiya yaymamağa çağırıb. Bu barədə Şarl Mişel tviterdə paylaşım edib:
“Dezinformasiyanı dayandırın! Sanksiyalar deyil, Ukraynadakı müharibəniz daşımaların qarşısını alır və ərzaq təhlükəsizliyini təhlükə altına alır. 20 milyon tondan çox taxıl ixracını sizin minalarınız və müharibəniz bloklayıb. Müharibəni dayandırmalı və qlobal ərzaq təchizatı zəncirlərini bərpa etməliyik”.
“Bu gün göründüyü kimi, daha çox ərzaq qıtlığı Rusiyaya tətbiq edilən sanksiyalardan dolayı deyil, bu əslində Rusiyanın Ukraynaya qarşı başladığı müharibədən qaynaqlanır”
Liberal İqtisadçılar Mərkəzinin rəgbəri Akif Nəsirli “Bakı-Xəbər”ə şərhində bildirdi ki, qlobal ərzaq zəncirinin qırılmasında bütün dünya Rusiyanı ittiham edir. “Rusiya isə öz növbəsində ona sanksiya tətbiq edən Avropa ölkələrini, ABŞ-ı, NATO dövlətlərini günahlandırır. Deyir ki, guya Rusiyaya qarşı sankisiyalar qoyulmasaydı o sərbəst şəkildə ixrac əməliyyatları aparardı və dünyada sürətlə gedən qida bahalaşmasının qarşısını bu yolla ala bilərdi. Lakin məsələ burasındadır ki, Rusiyanın dünyaya buğda icracatının qarşısını sanksiyalar alamayıb. Əslində, Rusiya özü buğda ixracını dayandırıb, məhdudlaşdırıb. Ona görə məhdudlaşdırıb ki, əslində Rusiya öz əhalisinin tələbatı qədər ərzaq buğdası istehsal edir. Bu ərzaq buğdasının da 10 milyon tona yaxınını ixrac edir. O ixrac potensialı da onunla əlaqədar yaranır ki, əvvəllər Rusiyaya xaricdən müəyyən un məhsulları gəlirdi, bu un məhsullarını daxildə Rusiya istehsal etmirdi, onun əvəzində dünyaya ərzaq buğdası ixrac edirdi. Bu gün Rusiya görür ki, sanksiyalarlardan dolayı onun ölkəsinə un məhsulları idxal edilmir, ona görə də ərzaq buğdasının ixracatını minumuma qədər məhdudlaşdırıb. Məsələ burasındadır ki, Rusiyanın ixracatı bəlkə də dünya üçün o qədər önəmli deyil. Rusiya bir qrup ölkələr üçün önəmlidir. Bu gün Rusiyanın ərazilərinə təcavüz etdiyi Ukrayna ərazində buğda ixracatının kəskin məhdudlaşdırılmasın əsas səbəbi bu ölkənin Ukraynanı Qara dənizdən təcrid etməsidir. Müharibə ilə əlaqədar Rusiya Qara dənizə minalar buraxıb, bu da mövcud problemin yaranmasına səbəb olub. Qara dənizin sahillərində yerləşən Ukraynanın bir çox liman şəhərləri artıq bu ölkənin nəzarətində deyil. Hazırda işğal etdiyi limanlarda Ukraynaya məxsus ərzaq buğdasını Rusiya öz məhsulu kimi ixrac edir. Halbuki, buna da heç kim mane olmur. Qeyd edim ki, o limanlardakından əlavə Ukraynanın daxili anbarlarında da külli miqdarda ərzaq buğdası var. Ukraynanın hazırkı ehtiyatları təxminən 30 milyon tona yaxındır, 27 milyon tondur. Bu gün Ukraynada bu miqdarda ixracat üçün qurudulmuş, hazır taxıl var...”
A.Nəsirlinin sözlərinə görə, Rusiya Krımı işğal etməklə Sevastopol tərəfdə limanı bağlamışdı, indi də digər liman ərazilərini işğal edib və bu da problemin yaranmasına səbəb olub. Bu səbəbdən də Ukraynanın ərzaq buğdası, o cümlədən duru yağlar ixracatı minimuma enib: “Detallara ona görə vardım ki, həqiqətən də Şarl Mişelin iddiaları doğrudur. Bu gün, göründüyü kimi, daha çox ərzaq qıtlığı Rusiyaya tətbiq edilən sanksiyalardan dolayı deyil, bu əslində Rusiyanın Ukraynaya qarşı başladığı müharibədən qaynaqlanır. Bu, müharibənin nəticəsində baş verib. Belə götürəndə, lap sanksiyalar səbəbindən Rusiyanın 10 milyon ton ərzaq buğdası dünya bazarına çıxmır. Digər tərəfdən də, Rusiyanın Ukraynaya qarşı müharibə aparması Ukraynanın 30 milyon ton buğda ixracatını əngəlləyir. O biri tərəfdən Rusiya ilə həmrəylik nümayiş etdirən Hindistan isti hava şəraitini bəhanə edib, təxminən 30 milyon tona yaxın ərzaq buğdasının ixracatını dayandırıb. Hazırda Hindistanın da anbarlarında 30 milyon tona yaxın ərzaq buğdası var”.
Hindistanın da bəhanələrlə ərzaq buğdasının ixracını dayandırmaqla ərzaq böhranına rəvac verdiyini deyən A.Nəsirli qeyd etdi ki, Hindistanın addımlarına görə Avropa Şurası, BMT-də, ABŞ-da müxtəlif araşdırmalar aparırlar. “Müəyyənləşdirmək istəyirlər ki, doğrudanmı Hindistan iqlim şəraiti ilə bağlı bu addımı atıb, yoxsa Rusiya ilə həmrəylik nümayiş etdirmək məqsədilə belə edib. Bu məsələ araşdırılacaq. Daha çox ehtimallar ondan ibarətdir ki, Hindistan Rusiyanı dəstəkləmək məqsədilə ərzaq buğdasının ixracatını dayandırıb. Bilirsiz ki, Rusiya, İran və Çin müəyyən mənada müxtəlif vaxtlarda çox asan bir araya gələ, eyni mövqedən çıxış edə bilirlər. Indi də, görünür, Rusiyaya dəstək məqsədilə buğda ixracatını dayandırıblar...”
A.Nəsirli deyir ki, göründüyü kimi, problem sanksiyalarla bağlı deyil və Rusiyanın müharibə aparması səbəbindən və bəzi ölkələrin Rusiyaya dəstək məqsədilə buğda ixracatını dayandırması nəticəsində dünya 6o milyon ton ərzaq buğdasından məhrum olub. “Bu baxımdan Şarl Mişel haqlıdır”- deyə A.Nəsirli vurğuladı.
İradə SARIYEVA
