“Rusiya-Ukrayna müharibəsi səbəbindən ATƏT-in Minsk Qrupunun həmsədrliyinin fəaliyyəti, yumşaq desək, qeyri-aktivdir”. Bunu Ermənistanın xarici işlər naziri Ararat Mirzoyan parlamentdə çıxışı zamanı deyib.
Erməni nazir iddia edib ki, həmsədr dövlətlər danışıqların Minsk Qrupu formatında davam etdirilməsini dəstəkləyib: “Ukrayna müharibəsindən sonra həmsədrlər arasında müəyyən fikir ayrılıqları var. Amma biz ATƏT-in Minsk qrupunun həmsədrliyi çərçivəsində Dağlıq Qarabağ münaqişəsinin həlli ilə bağlı danışıqların yerini və formatını görməkdə davam edirik. Biz bu barədə bütün beynəlxalq tərəfdaşlarla və ilk növbədə həmsədrlərlə daim danışırıq. Məmnuniyyətlə qeyd etməliyəm ki, həmsədr ölkələr bu yaxınlarda bu formatda işi davam etdirmək öhdəliyini bir daha təsdiqləyiblər”.
A.Mirzoyan onu da qeyd edib ki, ATƏT-in Minsk Qrupunun həmsədrliyində konsensusdan danışmaq mübaliğə olardı, lakin bu formatın “ölməsi” ilə bağlı şayiələr də bir qədər şişirdilir.
Göründüyü kimi, Ermənistan Minsk Qrupundan əl çəkmək istəmir. Üstəlik, belə təəssürat yaratmağa çalışırlar ki, həmsədr dövlətlər onların yanaşmasını birmənalı dəstəkləyir.
Maraqlıdır, deyilənlər nə dərəcədə realdır?
“Mirzoyanın fikirləri hazırkı Ermənistan hakimiyyətinin xam xəyallarını bir növ ehtiva edir”
Məsələyə münasibət bildirən politoloq Tural İsmayılovun fikrincə, erməni tərəfi prosesləri təhrif etməklə özlərini üstün tərəf kimi göstərmək istəyir: “Ermənistan 44 günlük Vətən müharibəsindən sonra daim ATƏT-in Minsk Qrupunu diriltməyə çalışıb. Müxtəlif dövrlərdə erməni siyasi elitasında təmsil olunan şəxslər Minsk Qrupunun yenidən fəallaşdırılması ilə bağlı müxtəlif çağırışlarla çıxış ediblər. Bununla belə, Ermənistan siyasi hakimiyyətindən başqa zaman-zaman Rusiya tərəfindən də Minsk Qrupu ilə bağlı müxtəlif açıqlamalar verilib. Lakin Azərbaycan hər zaman qeyd edib ki, 30 il ərzində münaqişənin həllində heç bir rol oynamayan, sadəcə olaraq regiona boş-boş səfərlər edən Minsk Qrupu formatının bərpasına ehtiyac yoxdur. Səbəb də çox sadədir, Minsk Qrupu formatı özünü doğrultmayıb. Üstəlik, ATƏT-in Minsk Qrupunun bundan sonra məşğul olacağı məsələlər də yoxdur. Çünki hansısa uğura imza atmayan bir təşkilatın vasitəçiliyinə yenidən ümid bəsləmək sadəcə absurddur. Üstəlik, Azərbaycan qalib tərəf olduğu üçün bununla razılaşmaq qətiyyən olmaz. Azərbaycan sülhün, sabitliyin qurulması ilə bağlı müxtəlif platformalarda Ermənistanla danışıqları davam etdirir. Biz nəzərə almalıyıq ki, Rusiya xarici işlər naziri Sergey Lavrov Ukrayna müharibəsindən sonra Minsk Qrupunun, faktiki olaraq, qüvvədən düşdüyünü bəyan etdi. Açıq dedi ki, digər həmsədr dövlətlər Rusiya ilə əməkdaşlıq etmək istəmir. Belə olan halda hər üç həmsədr hansı əsasla Minsk Qrupu çərçivəsində əməkdaşlıq edə bilər? O üzdən, Mirzoyanın fikirləri hazırkı Ermənistan hakimiyyətinin xam xəyallarını bir növ ehtiva edir. Reallıq onun dediyi kimi deyil. Nəzərə almaq lazımdır ki, bu format Azərbaycan üçün qəbuledilməzdir. Hətta Avropa İttifaqı Şurasının moderatorluğu ilə keçirilən görüşlərdə də Minsk Qrupunun adı bir dəfə də olsun çəkilmədi”.
Bu baxımdan politoloq hesab edir ki, Ermənistanın tez-tez Minsk Qrupunu xatırlamasının heç bir əhəmiyyəti yoxdur. Çünki Minsk Qrupu faktiki olaraq mövcud deyil.
Vidadi ORDAHALLI
