Paşinyan Azərbaycanı “aqressiv siyasətdə” suçlarkən faktlar gözünə girdi...

Məhəmməd Əsədullazadə: “Bununla o, daxili auditoriyaya göstərmək istəyir ki, radikal mövqedədir”

img

Ermənistanın baş naziri Nikol Paşinyanın beynəlxalq hüquq və diplomatiya baxımından icra etməli olduğu bir razılaşma var. Bu da Azərbaycan və Rusiya ilə imzalanan üçtərəfli bəyənnamədir. Burada qeyd edilən müddəalar ora imza atan liderlərin rəhbərlik etdiyi dövlətlərin öhdəliyidir və Paşinyan da bu razılşamaya əməl etməyə məcburdur.

Lakin son günlər N.Paşinyanın müsahibəsində irəli sürdüyü fikirlər onun ikili oyun oynadığnı, bir sıra məsələlərdən yayınmaq istədiyini göstərir. Məğlub ölkənin baş naziri siyasi spekulyasiyalarla öz imzası ilə altına girdiyi öhdəliklərdən yayınmağa çalışır. Məsələn, gah kommunikasiyaların açılmasının müsbət nəticələri olacağından danışan Nikol Paşinyan, gah da qəti şəkildə Ermənistan ərazisi boyunca nəqliyyat dəhlizlərinin açılmasının əleyhinə çıxış edir. Paşinyan öz çıxışlarında Azərbaycanı Ermənistana münasibətdə aqressiv siyasət yürütməkdə və ya cəngəllik siyasəti aparmaqda ittiham edir. Bəs 30 il Ermənistanın Azərbaycana qarşı apardığı siyasətin adı nədir? Hələ bu gün də Rusiya sülhməramlılarının müvəqqəti yerləşdirildiyi Azərbaycan ərazilərində Ermənistan silahlı qüvvələrinin ünsürləri qalmaqdadır. Azərbaycan Qazax rayonunun kəndləri və Naxçıvanın Kərki kəndi Ermənistanın işğalı altındadır. Paşinyan hökumətinin parlamentə çıxardığı və təsdiq olunduğu sənəddə Ermənistanın Azərbaycana qarşı ərazi iddiaları növbəti dəfə təsdiq olunub.

O baxımdan bütün bunları ekspertlər necə dəyərləndirir?

  • “Bu bir daha onu göstərir ki, Ermənistan nə qədər aqressivdir”

Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Paşinyanın belə aqressiv mövqe sərgiləməsi bir sıra məsələlərdən irəli gəlir: “Müşahidələr göstərir ki, Ermənistan Baş naziri Nikol Paşinyan ənənəvi xəstə ideoloji xətti davam etdirir. Bununla o, daxili auditoriyaya göstərmək istəyir ki, radikal mövqedədir. Ancaq imzalanan sənədlər var ki, onları yerinə yetirməlidir. Məsələ ondadır ki, Azərbaycan sənəddə əksini tapan bütün punktları yerinə yetirib. N.Pasinyan həm də vaxt qazanmağa çalışır və bu minvalla manevr edir. Ancaq bu yolu tutmaqla qarşıya qoyulan hədəflərə çatmaq mümkün deyil. Hesab edirəm ki, üçtərəfli görüş ərəfəsində belə bəyanatlar vermək və reallıqdan uzaq fikirlər səsləndirmək tamamilə absurddur. Bu, bir daha onu göstərir ki, Ermənistan nə qədər aqressivdir. Ermənistan hələ də Azərbaycan kəndlərini işğada saxlayır. Hesab edirəm ki, bu məsələdə danışıqlarda gündəliyə çıxarılmalıdır”.

Politoloq onu da qeyd etdi ki, Ermənistana təzyiqlər artırılmalıdır.

Vidadi ORDAHALLI

Son xəbərlər