Tərlan Eyvazov: “Ehtimal etmək olar ki, 102-ci bazanın komandiri ilə Karapetyan arasında hansısa bir söhbət olub və bu söhbət də Paşinyanı qıcıqlandırıb”
Ermənistanda anti-Rusiya meylləri get-gedə daha geniş vüsət alır, günü-gündən bu ölkədə Rusiya əleyhinə çağırışlar genişlənir. Ermənistanda anti-Rusiya meyllərinin alovlanması aksiyanın başında birbaşa Paşinyan hökümətinin, şəxsən baş nazirin özünün dayandığı gizlin deyil.
Noyabrın ortalarında baş nazir Paşinyan tərəfindən Arşak Karapetyanın Ermənistanın müdafiə naziri vəzifəsindən qovulmasının da anti-Rusiya əhvalı ilə bağlı olduğu bildirilir. Onun vəzifədən uzaqlaşdırılması ilə bağlı gizlinləri elə Ermənistan mediası özü açır. Ermənistanın “Hraparak” qəzetinin yazdığına görə, Rusiyanın Ermənistandakı 102-ci hərbi bazasının komandiri Aleksandr Petrov bu günlərdə şəxsi söhbət əsnasında şikayət edib ki, Ermənistanın müdafiə naziri Karapetyan ilə görüşəndən 4 gün sonra onu işdən qovdular: “Ya mənə nifrət edirlər, ya da çox mürəkkəb proseslər gedir, heç nə başa düşmürəm. Biz Ermənistanın təhlükəsizliyini təmin etmək üçün böyük bazayıq, amma bizdən uzaqlaşırlar və bizimlə əlaqə qurmaq istəmirlər. Yaxşı, dialoqdan yayınırsınız, öz işinizdir. Buna baxmayaraq, Ermənistana dəstək əlaməti olaraq bu günlərdə İrəvan səmasında aviaşou təşkil etdik, xüsusi olaraq müdafiə naziri Suren Papikyanı dəvət etdik, amma o, gəlmədi və hətta idarəsindən adam da göndərmədi. Bu nədir, müttəfiqlərimiz bizə nəyi anlatmağa çalışırlar?”.
Ekspertlər hesab edir ki, Rusiyanın Ermənistandakı 102-ci hərbi bazasının komandiri Aleksandr Petrov bu fikirləri ifadə etməklə açıq-aşkar Ermənistanda Rusiyaya olan antipatik münasibətin göstəricisini çatdırmaq istəyib. Komandir demək istəyir ki, Ermənistan hökməti mənim Karapetyanla görüşümdən də qıcıqlandılar, biz bunlara hər şey edirik, amma ermənilər bizim qədir-qiymərtimizi yenə də bilmirlər.
Karapetyanın Rusiyanın Ermənistandakı 102-ci bazanın rəhbəri ilə görüşü faktoru Paşinyanı niyə qıcıqlandıra bilərdi? Bu nə dərəcədə əsaslıdır ki, məhz o görüşdən sonra Karapetyan işdən çıxarılıb? Burada məqsəd Karapetyanın Rusiya ilə yaxınlaşmağa meyl göstərməsinin qarşını almaq olub?
“Paşinyan özünün anti-Rusiya mövqeyini pərdələmək məqsədilə də Karapetyanı qurban verə bilərdi”
Hərbi ekspert Tərlan Eyvazov bizimlə söhbətində bildirdi ki, son dövrlər Ermənistanda baş verənlərin proseslərin əksəriyyətində anti-Rusiya meyilləri özünü göstərir. T.Eyvazov qeyd etdi ki, Paşinyanın Karapetyanı müdafiə naziri vəzifəsindən qovması səbəbi ilə bağlı çox mülahizələr var, o mülahizələrdən biri də onun son zamanlar Rusiyaya meyl etməsi şübhəsi ilə bağlıdır. “İlk baxışdan Karapetyanı başqa generallardan fərqləndirən cəhətlərdən biri onun Rusiya meyilli olması olub, o özünü əsasən anti-Rusiyaçı kimi qələmə verib. Hətta bu adam Rusiyanın adamı olan Köçəryanın əleyhinə belə məhkəmədə ifadə vermişdi... O heç zaman özünü Rusiya tərəfdarı kimi göstərməmişdi, əksinə Qərbpərəst olaraq özünü tanıdırdı. Amma indi 102-ci bazanın komandiri deyir ki, onunla görüşdən dörd gün sonra Karapetyanı Paşinyan vəzifədən kənarlaşdırdı, demək bu səbəbsiz deyil. Ehtimal etmək olar ki, 102-ci bazanın komandiri ilə Karapetyan arasında hansısa bir söhbət olub və bu söhbət də Paşinyanı qıcıqlandırıb, Paşinyan da onu vəzifəsindən çıxarıb”.
T.Eyvazovun sözlərinə görə, Azərbaycanın Qarabağ zəfərini həm Şuşada, həm də ətraf rayonlarda qeyd etməsi günü A. Karapetyan guya hansısa “jest etmək” istəyib və sərhəddə gələrək mövqelərə baş çəkib. Ekspertə görə, heç şübhəsiz, Karapetyanın “jest”i onun özünə baha başa gəlib. T.Eyvazov deyir ki, Karapetyanın sərhəddə gəlməsinə Azərbaycanın verdiyi sərt reaksiya, eləcə də ölkəmizin Rusiyaya yönəlik tənqidləri də onun vəzifədən uzaqlaşdırılmasına səbəb ola bilərdi. “Bilirsiz ki, 44 günlük Vətən müharibəsində Azərbaycanın qələbə qazanmasından sonra Ermənistanda anti-Rusiya meyilləri qızışıb. Paşinyanın özünü və rəhbərlik etdiyi hökümətin anti-Rusiyaçı olduğu aydındır. Hesab etmək olar ki, Paşinyan özünün anti-Rusiya mövqeyini pərdələmək məqsədilə də Karapetyanı qurban verə bilərdi. Yəni Karapetyanın vəzifədən qovulmasının səbəbləri bir deyil, bir neçədir. Bəlkə Karapetyan da Rusiyaya meyl göstərməyə başlayıbmış ona görə Paşinyanın qəzəbinə gəlib. Amma bütün hallarda Karapetyanın vəzifədən qovulmasında 102-ci bazanın komandiri ilə görüşünün rolu istisna edilmir. Amma belə baxanda Karapetyanın ən müxəlif görüşlər keçirməsi təbiidir. Karapetyan 102-ci bazanın komandiri ilə görüşənə qədər vəzifəsi ilə əlaqədar olaraq çox şəxslərlə görüşüb. Karapetyanın niyə məhz Aleksandr Petrovla görüşdən dörd gün sonra qurban verilməsi məsələsi düşündürücüdür”.
T.Eyvazovun sözlərinə görə, Paşinyan Qərbyönümlü şəxsləri öz ətrafına yığır, ruspərəstləri isə uzaqlaşdırır.
İradə SARIYEVA
