Ermənistanın saxtakarlıqları, mənşəyi məlum olmayan şəxslərin “tarixi şəxsiyyət” adı altında piarının aparılması tendensiyası özünü Parisdə keçirilən YUNESKO Baş Konfransının 41-ci sessiyasında da göstərdi. Saxta erməni kampaniyasının böyük ölçüdə davam etdiyinin bir daha şahidi olduq. Qondarma, mənşəyi bilinməyən erməni “patriarxı” Nerses Şnoralinin ölümünün 850-ci ildönümünün YUNESKO-nun təqviminə salınması da bu qəbildəndir. Erməni kilsəsinin yaratdığı mifik obrazları tarixiləşdirib, “tarixi şəxsiyyət”ə çevirib beynəlxalq aləmdə təbliğ edirlər.
Ermənistan Xarici İşlər Nazirliyinin mətbuat xidmətinin yaydığı məlumata görə, Ermənistanın təklifi ilə Nerses Şnoralinin ölümünün 850-ci ildönümünün 2022-2023-cü illər üçün YUNESKO-nun təqviminə daxil edilməsi Kipr, İtaliya, Yunanıstan və Suriya Ərəb Respublikası tərəfindən dəstəklənib.
Qəribədir ki, bizə dost olan, ticarət və digər sahələrdə uğurlu əməkdaşlıq etdiyimiz İtaliya da qondarma Nersesin ölümünün 850 illiyinin YUNESKO təqviminə daxil edilməsinə dəstək verib. İtaliya niyə belə səhvə yol verib? Bu ölkə ki, Ermənistanın, ermənilərin bütün saxtakarlıqlarını, xəyanətlərini bilən, ifşa edən bizə dost ölkədir.
“Mənə elə gəlir ki, dost İtaliya dövləti bu məsələyə hansısa səviyyədə aydınlıq gətirəcək”
Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, YUNESKO-nun özündə Ermənistanın saxtakarlıqlarını yaxından dəstəkləyənlər var. Q.Hacıyev dost İtaliya nümayəndələrinin Ermənistanın növbəti uydurma və cəfəngiyyatlarına səs verməsini təəssüflə qarşıladı. O hesab edir ki, İtaliyanın özündə də ermənipərəstlər olmamış deyil. Q.Hacıyev xatırlatdı ki, hətta bir müddət əvvəl ermənipərəst qüvvələr və erməni lobbisi İtaliya prezidentinin özünü belə tora salmağa nail olaraq, onun dilindən ermənilərin də qədim sivilizasiyaya “aid oluğu” fikrini səsləndirmişdilər. Q.Hacıyev deyir ki, İtaliyanın YUNESCO-nun məlum sessiyasına qatılan nümayəndələri erməni lobbisinin təsiri ilə bu yanlış addımı atıb. “Bizə məlumdur ki, yalançı tarix düzəltmək, qondarma “tarixi şəxsiyyət”lər “istehsal” edib onları təbliğ etmək ermənizm siyasətinin başlıca istiqamətlərindən biridir. Tarixə nəzər salanda xatırlayırıq ki, ermənilər müxtəlif dövrlərdə tarixə saysız saxta, qondarma məsələləri daxil edə biliblər. Özlərinin “vətən”i, “ərazilər”i, “Böyük Ermənistan” və mədəniyyət xadimləri, tarixi şəxsiyyətləri, xristianlığa gətirdikləri “yeniliklər” və sair barədə tarixə çoxlu uydurmalar salıblar. Tarixə yamanan bu yalan və saxtakarlıqlar da vaxtaşırı olaraq beynəlxalq aləmə çıxarılır, erməni lobbisinin, xaricdəki ermənipərəstlərin dəstəyi ilə YUNESKO və digər təşkilatlara daşınır. Qəribədir ki, bu yalanlar bəzi dövlətlər tərəfindən də qəbul edilir. Burada bir məsələ diqqəti cəlb edir. Ermənistanın YUNESKO-ya təqdim etdiyi təkliflərə, yaxud nümunələrə nəzər saldıqda görürük ki, bu təşkilat Ermənistana, ermənilərə çox güzəştlər edir. Məsələn, ermənilərin uydurduğu və bu təşkilata təqdim etdiyi saxta nümunələr qəbul edilir. Niyə?”
Q.Hacıyev deyir ki, ermənilərin tarixə yamaq etdikləri uydurma şəxsiyyətlər, hadisələr erməni lobbisinin pulu gücünə ayaq aça bilib. Q.Hacıyevin sözlərinə görə, erməni əlifbası adlandırılan əlifbanın yaradıcından tutmuş sonrakı dövrlərə qədər erməni tarixinə daxil edilən şəxsiyyətlərin böyük əksəriyyəti başqa xalqların nümayəndələridir, onların ermənilərə heç bir aidiyyəti yoxdur. “O ki qaldı Nersesin ölümünün 850-ci ilinin YUNESKO təqviminə salınmasına dəstək olan ölkələrə, Yunanıstan, yunan Kiprinin, Suriya Ərəb Respublikasının Ermənistana dəstək verməsi qətiyyən təəccüblü gəlmədi. Onların ermənilərə münasibəti məlumdur. Suriyanın yarısı elə ermənilərdir. Elə müsəlman dövlətləri var ki, ermənilərdən də pisdi. Ona heç şübhə yoxdur. Amma İtaliyanın Ermənistanın bu saxtakarlığına dəstək verməsi doğrudan da bizi çox ciddi şəkildə həm təəccübləndirdi, həm də təəssüfləndirdi. Necə ola bilər ki, dost İtaliyanın təmsilçiləri Azərbaycanın maraqlarına zidd addım atsın? İtaliya kimi qədim mədəniyyət beşiyi olan, həmişə obyektiv mövqe tutan bir ölkənin qondarma Nersesin ölümünün 850 illiyinin təqvimə, tarixə salınmasına səs verməsinin arxasında mütləq erməni təsiri durur. Ermənilər YUNESKO-dakı mövqelərindən sui-istifadə edib özlərinin qondarma tarixi şəxsiyyətlərini tarixə salırlar, buna dəstək olanlardan biri də bizə dost ölkədir... Mənə elə gəlir ki, dost İtaliya dövləti bu məsələyə hansısa səviyyədə aydınlıq gətirəcək. Çünki İtaliya təmsilçiləri bu yanlış addımları ilə erməni saxtakarlığına dəstək olublar. Bütün hallarda, yenə də düşünürəm ki, İtaliya nümayəndələri erməni lobbisinin saxta təbliğatının təsiri ilə belə yanlış addım atıblar. Yenə də bu ölkənin rəsmiləri məsələyə aydınlıq gətirməlidir. İtaliya dost ölkədir, dəfələrlə müharibə dövründə də, postmüharibə dövründə də İtaliyanın dəstəyini görmüşük. Azad edilən ərazilərimizdə italyan şirkətlərinə meydan verilir. Bir sözlə, bu ölkə ilə yaxşı münasibətlərə malikik. Görünür, erməni lobbisi və ermənipərəst qüvvələr Azərbaycan-İtaliya münasibətlərini zədələmək məqsədilə bu ölkənin təmsilçilərini öz təxribatlarına şərik etməyi əvvəlcədən planlayıbmış. Çox təəssüf ki, İtailiyanın YUNESKO-dakı təmsilçiləri də erməni toruna düşdü... İtaliyada da ermənipərəstlər var, onlar da gecə-gündüz işləyir”. Q.Hacıyev qeyd edir ki, bütün hallarda burada erməni barmağı var.
İradə SARIYEVA
