Paşinyan, KTMT-də qalmaq hara, sərhəd təxribatlarında ona Qərbdə alternativlər axtarmaq hara?..

Ramil Məmmədli: “Paşinyan bu cür riyakar açıqlamalarla qurumdakı müttəfiqlərini inandıra bilməz”

img

Noyabrın ortalarında sərhəddə vəziyyət gərginləşəndə və növbəti toqquşmalar baş verəndə Ermənistanın hakim dairələrində güclü anti-Rusiya isteriyası müşahidə olunmağa başladı. Təhlükəsizlik Şurasının katibi Armen Qriqoryan isə bildirdi ki, əgər Rusiya və KTMT Azərbaycanla münaqişəni həll etmək imkanları tapmasa Ermənistan “digər beynəlxalq tərəfdaşlara” müraciət etmək haqqını özündə saxlayır.

Bunun ardınca Avropa İttifaqı Şurasının sədri Şarl Mişelin təşəbbüsü ilə Azərbaycan və Ermənistan liderlərinin dekabrın 15-də Brüsseldə “Şərq Tərəfdaşlığı” sammiti çərçivəsində görüşünün razılaşdırıldığı açıqlandı. Və məlum oldu ki, Brüsseldə görüşün keçirilməsi erməni tərəfinin istəyidir. Hansı ki, daha əvvəl baş nazir Paşinyan Rusiyanın vasitəçiliyi ilə üçtərəfli görüşün keçirilməsindən imtina etmişdi.

Ancaq Paşinyan sonuncu mətbuat konfransında riyakarcasına KTMT-dən bəhs edib. Onun sözlərinə görə, Ermənistan KTMT-dən çıxmağı nəzərdən keçirmir.  Həmçinin Paşinyan qeyd edib ki, Rusiya Ermənistanın strateji tərəfdaşıdır və o, Rusiya ilə tərəfdaşlığı əvəzolunmaz hesab edir:“Mən Rusiyanın Ermənistanın təhlükəsizliyinin təmin edilməsində rolunu yüksək qiymətləndirirəm. Xüsusilə qeyd etmək istəyirəm ki, Rusiya sülhməramlılarının Qarabağdakı fəaliyyətini yüksək qiymətləndirirəm”.

Belə idisə, o zaman 16 noyabr təxribatını törədən zaman Ermənistanın rəsmiləri NATO, Avropa İttifaqı və digər qurumlara müraciət edərək məgər Rusiya və KTMT-ni təhqir etmədilər?  O zaman bunun adı nədir?

  • “Nə Vladimir Putin, nə də ölkənin digər rəsmiləri onun səmimiyyətinə inanır”

Məsələyə münasibət bildirən hərbi ekspert Ramil Məmmədlinin fikrincə, Paşinyan nə qədər riyakar xarakterli açıqlamalarla çıxış etsə də Rusiya siyasi isteblişmenti onun səmimiyyətinə inanmır: “Onun bu cür boğazdan yuxarı açıqlamalarla çıxış etməsi düpədüz riyakarlıqdan başqa bir şey deyil. Nə Rusiya prezidenti Vladimir Putin, nə də ölkənin digər rəsmiləri onun səmimiyyətinə inanmır. Əgər doğurdanda Ermənistan hakimiyyəti KTMT ilə münasibətlərdə səmimi olsaydı Nikol Paşinyan baş nazir olandan sonra ikili oyun oynamazdı. Bu həmin Paşinyandır ki, KTMT sədri Yuri Xaçaturovu vəzifəsindən geri çağıraraq həbs etdirdi. Nəticədə KTMT biabırçı formada hörmətdən düşdü. Belarusdan olan Stanislav Zasın sədr olmasını yubatdı. 44 günlük müharibədə Ermənistan KTMT-ni müharibəyə cəlb etməyə çalışdı. Bu alınmadığı üçün hakimiyyətə yaxın olan mətbuat hərbi təşkilata qarşı güclü kampaniyaya başladı. Bu ilin mayında Ermənistan bəyan etdi ki, Azərbaycan Ordusu guya Laçında Qaragöl istiqamətindən ölkə ərazisinə daxil olub. Yenə də KTMT ilə təmaslara keçdilər və hərbi qurumu buna alət etməyə çalışdılar. Ondada alınmadı və Paşinya bundan çox məharətlə Rusiyaya qarşı seçkiqabağı təbliğatda istifadə etdi. Yeri gəlmişkən onu da qeyd edim ki, bu yöndə aparılan təbliğat 20 iyun seçkilərində qalib gəlməyə ona kömək etdi. Ən nəhayət son proseslərdə məlumdur. Bu baxımdan hesab edirəm ki, Paşinyan bu cür riyakar açıqlamalarla qurumdakı müttəfiqlərini inandıra bilməz”.

Hərbi ekspert onu da əlavə etdi ki, KTMT-yə Ermənistanın rəhbərlik etməsi də nəyisə dəyişməyəcək.

Vidadi ORDAHALLI

Son xəbərlər