Azərbaycanın məhv etdiyi erməni ordusunun qalıqları da darmadağın olur…
Vətən müharibəsində Azərbaycan tərəfindən darmadağın edilmiş Ermənistan ordusunun qalıqları hazırda ciddi problemlər məngənəsində boğulur. Burada yenə fərarilik, nizamnamə qaydalarının pozulması, digər müxtəlif cinayət halları geniş vüsət alıb. Bu hal erməni ordusunda yeni itkilərlə müşahidə edilir. Vəziyyətdən çıxış yolu kimi isə Ermənistan Müdafiə Nazirliyi dezinformasiyalara üstünlük verir, insidentlər nəticəsində həyatını itirən erməni hərbçilərinin bəzilərinin guya Azərbaycan tərəfi ilə atışmada ölməsinə dair görüntü yaratmağa çalışır. Bunu Ermənistanın Tavuş regionunda güllələnmiş hərbçi meyitinin aşkar olunması fonunda bir daha görmək mümkündür.
Məlumata əsasən, Azərbaycanla sərhədin şimal-şərq istiqamətindəki döyüş mövqelərindən birində müddətli həqiqi hərbi xidmət keçən 2001-ci il təvəllüdlü əsgər Suren Avetisyanın meyiti aşkarlanıb. Bildirilib ki, əsgər başından aldığı güllə yarasından ölüb. Hadisənin hansı şəraitdə baş verməsi ilə bağlı araşdırma aparılır. Bu durumda maraqlı məqam odur ki, Ermənistan Müdafiə Nazirliyi cəbhədə atışma görüntüsü yaratmağa çalışır. Lakin məlum olur ki, əslində, Ermənistan Müdafiə Nazirliyi cəbhədə yerləşən erməni ordusunda baş verən biabırçı insdentə don geyindirməklə məşğuldur. Aparılan araşdırmalara əsasən, erməni ordusunda silahlı insdent baş verib. Atışma nəticəsində 3 hərbçi ağır yaralanıb,19 yaşlı hərbi qulluqçu Suren Avetisyan isə ölüb. Baş verən hadisənin zorlama olduğunu isə erməni hərbi ekspert Geqam Sarkisyan üzə çıxarıb. Hərbi ekspert bildirib ki, könüllülər gənc əsgərlərə cinsi zorakılıq edib: “Məhz bu qalmaqaldan sonra 19 yaşlı hərbi qulluqçu Suren Avetisyan silaha əl atıb və 3 könüllünü güllələyib. Suren Avetisyaı güllələyən isə öz komandiridir“. Bu fakt bir daha erməni ordusunda zorlama hallarının hələ də davam etdiyini göstərir. Ümumiyyətlə, Ermənistan Silahlı Qüvvələrində baş verən fərarilik, ölüm, zorlama, döyülmə, rüşvət alma, korrupsiya, intihara cəhd etmə, intihar, təcavüz və digər nizamnamədənkənar halların sayı müharibədən sonra da azalmayıb. Bunu postmüharibə dövründə qeydə alınan çoxsaylı faktlar da təsdiq edir. Ermənistan ordusunun baş qərargah rəisinin keçmiş müavini, keçmiş hərbi komissar, general-mayor Levon Stepanyan isə etiraf edir ki, ordudan fərarilik halları da yüksək olaraq qalır. Xatırladaq ki, ikinci Qarabağ müharibəsi zamanı da erməni ordu sıralarından minimum 10 min əsgər fərarilik edərək döyüşü tərk edib. Bu fonda Ermənistan Silahlı Qüvvələrində tüğyan edən rüşvətxorluq və korrupsiya halları da ən çox müzakirələrə və mübahisələrə səbəb olan mövzudur. Bu günlərdə isə daha bir rüşvət qalmaqalı Ararat vilayətinin Armaş yaşayış məntəqəsində yerləşən hərbi hissədə baş verib. Burada xidmət edən bir neçə hərbçi tərxis olunmaq üçün komandanlığa müraciət edib. Müraciətlərinə uzun müddət cavab almayan şəxslər bunun səbəbi ilə maraqlanıblar. Cavabında isə ehtiyata buraxılmaq istəyən erməni hərbçilər Edqar Zavtilyan, Artur Volodyan, Qriqori Qriqoryandan külli miqdarda rüşvət tələb olunub. Erməni hərbçilər müraciətlərinə müsbət cavab verilməyəcəyi təqdirdə məhkəməyə müraciət edəcəklərini bildiriblər. Daha bir maraqlı məqam odur ki, Ermənistan ordusunun hərbi qulluqçuları arasında spirtli içkilərə meyllilik artıq adi hal alıb. Bu vəziyyət ordu rəhbərliyi üçün başağrısına çevrilib. Elə bir ay və ya həftə yoxdur ki, içkili vəziyyətdə yol-nəqliyyat hadisəsi və digər cinayət törədən erməni hərbçisi məsuliyyətə cəlb olunmasın. Yayılan məlumatlarda növbəti belə insidentin Ararat şəhərində baş verdiyi bildirilir. Ermənistan silahlı qüvvələrinin hərbi qulluqçusu Mariam Petrosyan içkili vəziyyətdə şəhər əhalisinə qarşı nalayiq hərəkətlərə yol verib. Sakinlərin şikayətindən sonra hərbçi polis bölməsinə aparılıb. Onun hərbi qulluqçu olduğu müəyyən edildikdən sonra M.Petrosyan hərbi polis əməkdaşlarına təhvil verilib. Orduda digər qanunsuzluqlar fonunda erməni tərəfinin Azərbaycana qarşı indi hansısa müqavimət təşkil edə bilməsi inandırıcı görünmür. Elə bu səbəbdən “İravnuk” qəzeti yazır ki, Azərbaycanla son sərhəd toqquşmasında erməni tərəfinin itkilərinin və əsirlərinin sayının çox olması təəccüblü qarşılanmamalıdır. Yeri gəlmişkən xatırladaq ki, Ermənistanın baş naziri Nikol Paşinyan noyabrın 16-da Ermənistan Silahlı Qüvvələrinin sərhəddə törətdiyi təxribat zamanı saxlanılan erməni hərbçilərin sayı ilə bağlı maraqlı açıqlama verib. Baş nazirin sözlərinə görə, bu rəqəm Ermənistan Müdafiə Nazirliyinin açıqladığı kimi 19 yox, 32-dir. Paşinyan bildirib ki, saxlanılan 32 erməni hərbçi ilə bağlı məlumatlar dəqiqləşdirilir: “Başa düşürəm, belə danışmaq yersizdir… Amma altı ölü, 24+8 saxlanılan var. Bununla belə, məlumatları dəqiqləşdirmək lazımdır. Üstəlik, saxlanılanlar arasında yaralılar da var”. Lakin erməni mediası yazır ki, Zəngəzur bölgəsindəki son sərhəd döyüşlərində Ermənistan Silahlı Qüvvələri 21 hərbçisini itirib. Azərbaycan tərəfindən saxlanılan erməni hərbçilərinin sayı isə həqiqətən 30 nəfərdən çoxdur. Bundan başqa, Ermənistan Silahlı Qüvvələrinin yaralılarının sayı 100-ə çatır.
Tahir TAĞIYEV
