Əli Orucov: “Paşinyan nə qədər Qərbpərəst olsa da, onun elektoratı olmasa bu mümkün deyil”
“Komsomolskaya pravda” nəşrinə verdiyi müsahibədə Ermənistan parlamentinin spikeri Alen Simonyan deyib ki, erməni cəmiyyətində Rusiya Qarabağı təhvil verib anlayışı var.
Onun sözlərinə görə, bir çox sui-qəsd nəzəriyyələri var ki, Baş nazir Paşinyan başda olmaqla, indiki Ermənistan hakimiyyəti Qarabağı qəsdən təhvil verib: “Qarabağın məhv olduğu məlum olanda heç nə etmədilər. Niyə? Bu barədə yalnız İrəvanda öyrənmək olar”.
Müsahibə zamanı jurnalist birbaşa belə bir sual verib: “Ermənistan Qarabağı xüsusi şəkildə təhvil verib ki, geosiyasi vektoru Rusiyadan Qərbə dəyişsin?”.
Bu zaman müsahibə debata çevrilib və bundan sonra Alen Simonyan qəzəblə cavab verərək, Rusiyanı dolayı da olsa ittiham edib: “Erməni cəmiyyətində belə bir anlayış var ki, Rusiya Qarabağı təhvil verib. Və ümumiyyətlə, nədən güman etdiniz ki, Qarabağı kimsə təhvil verib? Beləliklə, siz erməni xalqını və onun uğrunda qan tökənləri təhqir edirsiniz. Qarabağı təhvil vermək istəsəydilər, Rusiya XİN-in təklifləri də daxil olmaqla bir neçə variant var idi”.
Məlum məsələdir ki, A.Simonyan tutduğu vəzifəsinə görə sıradan bir şəxs deyil. Onun müsahibə zamanı hisslərini cilovlaya bilməməsi əslində pərdə arxasında Rusiya-Ermənistan münasibətlərinin necə gərgin olmasının göstəricisidir. Yəni Qarabağla bağlı Paşinyan üzdə Putinin fəaliyyətini nə qədər tərifləsə də, real vəziyyət tamam başqadır.
- “Erməni spiker əslində başqalarının dili ilə Qarabağa görə Rusiyanı ittiham edib”
Məsələyə münasibət bildirən AMİP funksioneri Əli Orucov da hesab edir ki, dialoqun sərt tonda keçməsi təsadüfi deyil: “Kimin nə deməsindən asılı olmayaraq, reallıq ondan ibarətdir ki, Ermənistanda güclü anti-Rusiya ovqatı var. Özü də bu, təkcə 44 günlük müharibədən sonra formalaşmayıb. Bu, əsasən 2008-ci ildə Robert Köçəryanın inzibati resurslar hesabına prezidentlik postunu Serj Sarkisyana ötürməsindən sonra formalaşıb. Ondan sonra bu daha da inkişaf etdi. 2018-ci ildə Paşinyan hakimiyyətə gələndən sonra bu artıq açıq müstəviyə keçdi. Paşinyan nə qədər Qərbpərəst olsa da, elektoratı olmasa bu mümkün deyil. Bu gün reallıq ondan ibarətdir ki, ermənilər öz gələcəyini Qərblə yaxınlaşmaqda görür. Bu onların bicliyindən və diaspor amilindən irəli gəlir. Rusiya da bütün bunların fərqindədir. Ona görə də “Qarabağ klanı”nın hakimiyyətdə olduğu zaman verdiyi dəstəyi indi Ermənistana verə bilmir. Çünki ermənilərin Qərbə doğru boylandıqlarını çox yaxşı bilir. Alen Simonyan müsahibəsində əslində başqalarının dili ilə Qarabağa görə Rusiyanı ittiham edib. Bu o deməkdir ki, mövcud hakimiyyət sözügedən amildən istifadə edir. Ermənistan hakimiyyətinin Qərbə meyllənməsini göstərən digər amil danışıqların Avropa təsisatlarının himayəsi ilə keçirilməsinə göstərdiyi maraqdır. Çünki Paşinyan noyabrın 10-u ərəfəsində Rusiyada keçiriləcək danışıqlardan yayındı. Əvəzində 15 dekabrda Brüssel danışıqlarına razılıq verdi. Bu, əslində Rusiyaya arxa çevirmək idi. Vəziyyəti belə görən Putin bir növ zor gücü ilə Paşinyanı 26 noyabrda keçiriləcək Soçi görüşünə razı saldı. Bütün bunlar Ermənistan-Rusiya münasibətlərinin üzdə göründüyü kimi sabit olmadığını göstərir”.
Partiya funksioneri hesab edir ki, iki ölkə arasında gərginlik davam edəcək.
Vidadi ORDAHALLI
