İrəvanın ortasında antirus mitinqin və Vilson mədhiyyəsinin əsas təşkilatçısı - Paşinyan...

Ceyhun Məmmədov: “Ermənistanda Paşinyanın rəhbərliyi ilə yenidən anti-Rusiya meylləri baş qaldırıb və bu istiqamətdə çox ciddi addımlar atılır”

img

Noyabrın 23-də İrəvanda ABŞ səfirliyi qarşısında Vudro Vilson verdiktinin ildönümü ilə bağlı “minnətdarlıq mitinqi” keçirilib. Səfirliyə təqdim olunmuş və Co Baydenə ünvanlanmış məktubda təşkilatçılar ABŞ-ı Ermənistana “daha aktiv dəstək verməyə” çağırır və Rusiyadan şikayətlənirlər.

Qeyd edək ki, aksiyada “Bizim xilasımız Amerika və birləşmiş Qərbdir!”, “Amerika Ermənistana dəstək verə bilər və Rusiya ilə Türkiyənin güclənməsinin qarşısını alar”, “Ruslar burnundan uzağı görə bilmir, Amerika isə 100 il sonranı proqramlaşdırır”, “Ermənistanda Vudro Vilsonun abidəsi qoyulmalıdır”, “Amerika kömək etmək istəyir, amma ona imkan vermirlər” və sair şüarlar səsləndirilib.

İrəvanda ABŞ səfirliyi qarşısında Vudro Vilson verdiktinin ildönümü ilə bağlı “minnətdarlıq mitinqi”ni və burada səsləndirilən şüarları şərh edən millət vəkili Ceyhun Məmmədov “Bakı-Xəbər”ə şərhində bildirdi ki, Ermənistan hər zaman Rusiyanın dəstəyinə güvənib. Millət vəkilinin sözlərinə görə, Ermənistan düşünürdü ki, İkinci Qarabağ müharibəsində də Rusiya öz dəstəyini əsirgəməyəcək. Əslində, Rusiya bu və digər formada hər zaman Ermənistana öz dəstəyini göstərib. Ancaq Ermənistanın istəyi ondan ibarət idi ki, Rusiya gəlib Ermənistan tərəfindən döyüşsün və Azərbaycana qarşı müharibədə iştirak etsin. Bu da, əlbəttə,  anlaşılan və qəbul edilən bir məsələ deyil. Son günlər hiss olunur ki, Ermənistanda Paşinyanın rəhbərliyi ilə yenidən anti-Rusiya meylləri baş qaldırıb və bu istiqamətdə çox ciddi addımlar atılır. Paşinyan xalqa müraciətində, qısa da olsa, Rusiyaya öz münasibətini bildirdi və Rusiyanın Azərbaycana olan münasibətini tənqid etdi. İrəvanda ABŞ səfirliyi qarşısında Vudro Vilson verdiktinin ildönümü ilə bağlı “minnətdarlıq mitinqi”ndə səsləndirilən şüarlar da onu göstərir ki, bu, məqsədli şəkildə təşkil olunmuş aksiyadır, Ermənistan hakimiyyətinin növbəti avantürasıdır. Məqsəd odur ki, Ermənistan Qərbin, ABŞ-ın dəstəyini alsın”.

C.Məmmədovun sözlərinə görə, Ermənistanda “minnətdarlıq mitinqi” keçirilməsi və burada anti-Rusiya şüarları səsləndirilməsi təsadüfi deyil. C.Məmmədovun bildirdiyinə görə, Rusiyanın, xüsusən də Zəngəzurla bağlı məsələləri dəstəkləməsi, eləcə də kommunikasiyaların açılması məsələsinə mövqe bildirməsi ermənilər tərəfindən birmənalı qarşılanmayıb. “Bu gün ermənilər bu məqsəddən istifadə edərək, anti-Rusiya çağırışları edirlər və çalışırlar ki, Qərbdən, xüsusən də Amerikadan dəstək alsınlar. Çünki onlar umduqları və istədikləri dəstəyi ötən dövrdə ala bilmədilər. Ancaq onlar düşünürlər ki, bu formada bu dəstəyi alacaqlar və Amerika Ermənistanın yanında olaraq onun mövqeyini, yanaşmasını tam dəstəkləyəcək. Bu baxımdan hesab edirəm ki, bu, Ermənistanın növbəti bir təxribatıdır və yolverilməz bir addımdır. Ermənistan bununla heç nəyə nail ola bilməyəcək, o, Azərbaycanın yaratdığı yeni reallıqla barışmalıdır və çalışmalıdır ki, bölgəyə sülh gəlsin.

Bu formada addımlar atmaqla Ermənistan heç bir güclü dəstək əldə edə bilməyəcək, əksinə vaxt itirəcək, bu ölkədəki ağır durum daha da mürəkkəbləşəcək, Ermənistan iqtisadiyyatı daha da ağır duruma düşəcək, vətəndaşları öz ölkəsini tərk edərək başqa ölkələrə gedəcək. Ona görə də hesab edirəm ki,  Ermənistan inkişafı bölgədə axtarmalıdır. Yəni digər ölkələrə müraciət edərək bu şəkildə hansısa uğur qazanmaq ehtimalı yoxdur. Ermənistan siyasətini tam dəyişməlidir...” - deyə millət vəkili bildirdi.

İradə SARIYEVA

Son xəbərlər