Paşinyan 9 noyabr üçtərəfli görüş razılaşmasını Rusiyaya arxadan zərbə gedişinə çevirdi...

Ramil Hüseynov: “Nikol diplomatik normalardan kənara çıxaraq Putini aldatdı”

img

Nikol Paşinyan son müsahibəsində növbəti dəfə onsuz da kövrək olan sülh və təhlükəsizlik danışıqlarına qeyri-konstruktiv münasibət sərgilədi. Bir daha rəsmi İrəvan administrasiyasının atacağı addımların ənənəvi destruktivlikdən fərqlənməyəcəyini bəyan elədi.

Digər maraqlı məqam isə Paşinyanın 9 noyabrda gözlənilən üçtərəfli danışıqları pozması, Rusiyanın arxa plana atılmasıdır. Onun açıqlamalarının ana xəttinin də məhz bu tezis üzərində qurulması diqqət çəkir. Çünki Paşinyan nala-mıxa vurmaqla, gah ikitərəfli danışıqlara toxunur, gah da beynəlxalq təşkilatları gündəmə gətirir. Hansı ki, 9 noyabrda tərəflər arasında görüş olacağı gözlənilirdi. Özü də bunu məhz Rusiya tərəfi birinci yaydı. Ancaq məsələ ondadır ki, Paşinyan 9 noyabrda Rusiya Prezidenti Vladimir Putinin təşəbbüsü ilə keçirilməsi nəzərdə tutulan görüşün baş tutmaması ilə bağlı müxtəlif ziddiyətli və manipulyativ fikirlər səsləndirdi. Təsadüfi deyil ki, Rusiya mediası da 9 noyabr görüşünün baş tutmamasının məhz Paşinyanın günahı üzündən olduğunu bildirdi. Diplomatik mənbələr təsdiq edir ki, Ermənistan tərəfi tədbirə bir gün qalmış hər hansı səbəb göstərmədən ona qatılmaqdan imtina edib. Halbuki, bu, danışıqlarda müəyyən dönüş yarada bilərdi. Rusiya tərəfinin təklifi ilə tərəflər arasında 9 noyabrda görüşün yekun bəyanatı da hazırlanırdı. Aydın məsələdir ki, bu, Rusiyanın nüfuzuna vurulan zərbə idi. Ötən il tərəflər arasında əldə olunan 10 noyabr razılaşmasının əsas arbitrının Rusiya olmağına rəğmən, Paşinyan bir növ Putinin başı üstündən iş görməyə cəhd etdi. Məsələ ondadır ki, 9 noyabr görüşü baş tutmayandan sonra Paşinyan üçtərəfli görüşün Brüsseldə keçirilməsi üçün Avropa İttifaqına müraciət etdi. Bununla, nəticə etibarilə, Rusiyanı çıxılmaz durumda qoydu. Bütün bunlar bir daha Paşinyanın Rusiyanın vasitəçiliyi ilə keçirilməsi planlaşdırılan üçtərəfli görüşü pozduğunu ortaya qoydu.

  • “Bunun nəticəsində gözlənilən üçtərəfli görüş pozuldu”

Məsələyə münasibət bildirən Yeni Yol Partiyasının sədri Ramil Hüseynovun fikrincə, Paşinyan bilavasitə Qərbdəki himayədarlarının təlimatı ilə bu addımı atıb: “Çünki oktyabr ayından başlayaraq Paşinyan ziddiyətli açıqlamalar verməyə başladı. Hər keçən gün bu yöndə ritorikanı sərtləşdirməyə cəhd etdi. Paşinyanın əsas məqsədi Rusiyanı iqnor etmək idi. Çünki davamlı olaraq Minsk Qrupunun aktiv vasitəçilik etməsini qabardırdı. Əslində bu, Rusiyanın vasitəçiliyinə qarşı yönəlmiş addım idi. Ən təəccüblüsü odur ki, Paşinyan diplomatik normalardan kənara çıxaraq Putini aldatdı. Çünki o, bununla bağlı əvvəl razılıq vermişdi. Belə olmasaydı, o zaman Rusiyada hakimiyyətə yaxın olan informasiya resursları 9 noyabr görüşünün anonsunu verməzdi. Ancaq nəticədə üçtərəfli görüş pozuldu. Hesab edirəm ki, Kreml bunu Paşinyana bağışlamayacaq”.

Partiya sədrinin fikrincə, Paşinyan Soçi danışıqlarını da poza bilər.

Vidadi ORDAHALLI

Son xəbərlər