Ermənistan ərazi bütövlüyünü tanımışdısa Azərbaycana niyə təcavüz etdi - Paşinyan "baş-ayaq" vurdu…

Abutalıb Səmədov: “Paşinyanın bu bəyanatı erməni ictimaiyyətini imzalayacağı sənədə hazırlamaq üçün verilib”

img

1991-ci ildə İrəvan və Bakı MDB-yə daxil olanda bir-birinin ərazi bütövlüyünü mahiyyətcə qarşılıqlı olaraq tanıyıb”. Bu fikirləri Ermənistanın baş naziri Nikol Paşinyan çərşənbə axşamı jurnalistlər üçün keçirdiyi onlayn mətbuat konfransında deyib.

Paşinyan bildirib ki, hər iki ölkə 30 il öncə MDB-nin yaradılması prosesində iştirak edib və qarşılıqlı tanınma həmin vaxt imzalanan bəyannamə və dövlətlərarası saziş əsasında baş tutub: “Konkret terminlərlə nəyi nəzərdə tutduğumuzu başa düşmək lazımdır. O vaxt artıq Qarabağ məsələsi var idi? Var idi. Amma sual budur: Qarabağ problemi ərazi problemidirmi? Bizim anlayışımıza görə, bu, ərazi problemi deyil. Qarabağ məsələsi hüquq məsələsidir və ərazi məsələsi ilə heç bir əlaqəsi yoxdur…”

İrəvan və Bakı MDB-yə daxil olanda bir-birinin ərazi bütövlüyünü mahiyyətcə qarşılıqlı olaraq tanıyıb nə deməkdir? Ermənistan Azərbaycanın ərazi bütövlüyünu tanımışdısa, bəs onda niyə Azərbaycana təcavüz edib torpaqlarını işğal etmişdi?

  • “…Başa düşür ki, Azərbaycanın ərazi bütövlüyünün tanınması barədə sənədə qol çəkməsi erməni cəmiyyətində…”

Paşinyanın bəyanatını “Bakı-Xəbər”ə şərh edən Azərbaycan Naminə Alyans Partiyasının sədri Abutalıb Səmədov bildirdi ki, Ermənistanın baş naziri, həmişə olduğu kimi, yenə də öz ampluasındadır. “Paşinyanın bu bəyanatı erməni ictimaiyyətini imzalayacağı sənədə hazırlamaq üçün verilib. Paşinyan başa düşür ki, Azərbaycanın ərazi bütövlüyünün tanınması barədə sənədə qol çəkməsi erməni cəmiyyətində böyük narazılıqla qarşılanacaq. Ancaq sənədə qol çəkməkdən başqa yolu da qalmayıb. Şübhəsiz ki, Soçidə nəzərdə tutulan görüşdə delimitasiya barədə razılığa gəlinəcək. Təbiidir ki, delimitasiya eyni zamanda müqavilə imzalanmasını tələb edir və ərazi bütövlüyünün tanınması şərti var. Paşinyan da bu addımı atmaq məcburiyyətindədir. Ona görə də bu cür hazırlayıcı bəyanatlar verir. Görürsüz, maraqlı arqumentlər axtarıb tapır. Ümumiyyətlə, bu cəhətdən Paşinyan ermənilərin içində ən istedadlısıdır”.  

A.Səmədovun sözlərinə görə, Azərbaycan torpaqlarının işğalına gəldikdə isə, Paşinyan da, başqa ermənilər də heç vaxt demirlər ki, Ermənistan Azərbaycan torpaqlarını işğal edib. “Deyirlər Qarabağ “özünün təhlükəsizliyini təmin etmək” üçün bir bufer zonası yaradıb və Azərbaycan torpaqlarını “Qarabağ ordusu” işğal edib. Hətta onlar son müharibənin də Azərbaycanla Ermənistan arasında getdiyini etiraf etmirlər. Deyirlər ki, Türkiyə və Azərbaycan “Qarabağ ordusu”na qarşı vuruşdu. Yəni “Qarabağ ordusu” Türkiyə və Azərbaycana qarşı vuruşub və təbiidir ki, məğlub oldu. Bu, erməni riyakarlığıdır. Ancaq bütün bunların içərisində sevindirici məqam nədir? Ciddi sənədlərin imzalanması prosesi artıq başlayıb, sərhədlərin müəyyənləşməsindən növbəti addım sülh sazişidir. Ümid edirik ki, bu da qısa müddətə imzalanar və biz bu uzunmüddətli münaqişəyə birdəfəlik son nöqtəni qoyarıq” - deyə A.Səmədov vurğuladı.

İradə SARIYEVA

Son xəbərlər