Gorus Ermənistandan ayrılıb müstəqil olmaq istəyir - separatizmin ləzzətini "nuş eləyin"...

Faiq Ələkbərli: “Separatçılar bu gün Gorusda baş qaldırıb “müstəqillik” tələb edirlərsə, sabah da başqa bir bölgədən “müstəqillik istəyirik” tələbləri səsləndirəcəklər”

img

Yayılan məlumatlara görə, Gorus şəhəri Ermənistandan ayrılıb “müstəqil” olur. Belə ki, Ermənistanın Gorus şəhərində bir qrup ziyalı və yerli siyasətçilər İrəvan hökumətinin təsirli tədbirlər görməməsi, habelə sərhədin müdafiəsinin lazımı səviyyədə təmin etməməsi səbəbindən təşəbbüslə çıxış edib.

Bildirilənə görə, bu barədə Gorusun bütün ziyalıları bir araya gələrək qərar verib. Həmin qərara əsasən, Gorus şəhəri və sərhədə yaxın kəndlərin müdafiəsi, problemlərinin həll edilməsi, habelə silahlı dəstələrin yaradılmasına başlanıb. Belə ki, Təşəbbüs Qrupunun rəhbəri Artur Xocabağyan bəyan edib ki, noyabrın 24-dən etibarən Təhlükəsizlik Şurası yaradırlar.

Onun sözlərinə görə, Təhlükəsizlik Şurası Gorusun təhlükəsizliyini təmin etməklə yanaşı, maddi-texniki baza yaratmaq və silahlı dəstələr formalaşdırmağı da öz üzərinə götürür: “Biz İrəvandakı hökumətdən heç bir yardım istəmirik. Qərara almışıq ki, Gorus və onun ətrafındakı yaşayış məntəqələrinin təhlükəsizliyini, strateji obyektlərin qorunmasını təmin etmək üçün könüllü hərbi birliklər formalaşdıraq. Onların silahla təchiz edilməsi məsələsi isə şəxsi əlaqələrimiz hesabına həyata keçiriləcək. Bundan başqa, orta məktəblərdə tədrisin təşkili, Qırmızı Xaç Komitəsinin dəstəyi ilə ilkin tibbi yardımın öyrədilməsi məqsədilə məktəblərdə kursların açılması da qərarlaşdırılıb. Əhalinin ehtiyaclarının qarşılanması, habelə digər məsələləri də Təhlükəsizlik Şurası həyata keçirəcək”.

O, maddi problemlərin həlli məsələsinə gəlincə bəyan edib ki, bu işdə diasporaya böyük ümid bəsləyirlər. Xocabağyan vurğulayıb ki, artıq bu istiqamətdə danışıqlar da aparılıb və müsbət nəticələr əldə olunub: “Diasporadan dəstək verəcəklər. Qərarlaşdırmışıq ki, qısa müddətdə yerli əhalini fiziki və taktiki cəhətdən hazırlayaq, habelə atəş təlimlərinin keçirilməsini təmin edək. Biz bütün Gorusu səfərbərliyə alacağıq. Bütün insanlar buna hazırdır”.

Göründüyü kimi, işğalçı Ermənistanın yürütdüyü qəsbkarlıq, terror siyasəti onun özünə baha başa gəlir. Artıq bu ölkədə real parçalanmalar göz qabağındadır və Gorus şəhər ictimaiyyəti “müstəqil” olmaq barədə qərar qəbul etdiklərini, Təhlükəsizlik Şurası yaratdıqlarını bəyan edirlər. Özləri də açıq deyirlər ki, arxalarında xaricdəki erməni diasporu durur.

  • “Ermənistan separatizm təhlükəsinin içindədir, Azərbaycana qarşı etdiklərinin qarşılığını bu şəkildə alır”

AMEA-nın Fəlsəfə və Sosiologiya İnstitutunun aparıcı elmi işçisi, BAO başqanının Türk dünyası üzrə əlaqələr üzrə müavini, siyasi şərhçi, tarix üzrə fəlsəfə doktoru, dosent Faiq Ələkbərli “Bakı-Xəbər”ə şərhində bildirdi ki, Ermənistan “nə töküb aşına, o da çıxıb qaşığına”. Azərbaycan ərazilərini parçalamaq niyyəti ilə ölkəmizə təcavüz edən Ermənistanın indi özünün parçalanma təhlükəsi astanasında olduğunu deyən F.Ələkbərlinin sözlərinə görə, indi Ermənistan görsün ki, daxili parçalanma nə deməkdir. “Gorus şəhər ictimaiyyətinin, rəhbərliyinin “müstəqillik”lə bağlı belə bir qərar verməsi  ilk növbədə Ermənistan hökümətinin ölkəyə nəzarət edə bilməməsi ilə bağlıdır. Əgər hökümət nəzarətsizliyi davam etdirsə, Gorusdan sonra digər şəhərlərdə də “müstəqillik” çağırışları baş verəcək. Bu da ondan irəli gəlir ki, rəsmi İrəvanla bölgələr arasında ciddi problemlər mövcuddur. Müəyyən mənada bu bölgələr bir-bir öz “müstəqillik”lərini elan edib, özünümüdafiəyə keçir. Düzdür, onlar buna “təhlükə” kimi Azərbaycanı və Türkiyəni göstərirlər, ancaq əslində, problem Ermənistanın öz daxilindədir. Hər halda, Gorus şəhər ictimaiyyətinin, ziyalılarının Təhlükəsizlik Şurası, “müdafiə dəstələr”i yaratması Ermənistan hökümətinin özünə qarşıdır və daxildəki böhranla bağlıdır”.

F.Ələkbərlinin sözlərinə görə, bu kimi addımlar atan, “müstəqillik” tələb edən şəhərlərin sayı artacaq. “Gorus niyə “müstəqil” olmaq, “müdafiə dəstələri” yaratmaq istəyir, “gücünü” Azərbaycana qarşı yönəltmək iddiasındadır, yoxsa hədəf rəsmi İrəvandır? Ekspertin fikrincə, istənilən separatçı dəstə Azərbaycana heç nə edə bilməz, Azərbaycandan dəmir yumruğun zərbəsini görə bilərlər.

F.Ələkbərli deyir ki, Azərbaycan uzun illərdir erməni separatizmindən əziyyət çəkib, indi isə Ermənistan özü erməni separatizmi ilə üzləşir. “Gorusun “müstəqil” olması ilə bağlı qərar qəbul edildiyinin bəyan olunması Ermənistanda böhranı daha da dərinləşdirəcək və bu ölkənin parçalanmasına səbəb olacaq. Ermənistanın bölgədə əkdiyi separatizm toxumları indi özündə “bəhrə” verir, indi görsün ki, separatizm, ölkənin parçalanması nə deməkdir. Ermənistan separatizm təhlükəsinin içindədir, o, Azərbaycana qarşı etdiklərinin qarşılığını bu şəkildə alır. Separatçılar bu gün Gorusda baş qaldırıb “müstəqillik” tələb edirlərsə, sabah da başqa bir bölgədən “müstəqillik istəyirik” tələbləri səsləndirəcəklər”.

F.Ələkbərli hesab edir ki, Azərbaycan, həmişə olduğu kimi, yenə də prosesləri səbr və təmkinlə izləməlidir. “Ya Ermənisan, ya da “müstəqil Gorus” olsun, fərqi yoxdur, Azərbaycanın ərazi bütövlüyünü təhdid edən hər kəs cavabını yenə də alacaq. Yəni bu kimi “özünümüdafiə dəstələri”ndən nə Gorus, nə də başqaları Azərbaycanın öz haqq və hüququnu bərpa etməsinə mane ola bilməyəcək. Hər halda, bu kimi halların çoxalması Ermənistan üçün nə qədər təhlükəlidirsə, bu ölkəni böhrana çəkirsə Azərbaycan da bundan faydalanmalıdır”- deyə F.Ələkbərli bildirdi.

İradə SARIYEVA

Son xəbərlər