Ermənistan ordusunda xidmətə bu dəfə qadınlar cəlb edilib. Bir neçə gün öncə Ermənistanda səfərbərlik elan olunduğunu əks etdirən görüntülərdə yaşlı insanlar, dəqiq desək, qocalar yer almışdı. Bu dəfə isə Ermənistan ordusuna qadınların cəlb olunmasına dair video yayılıb. Ermənistan mediasında yayılan həmin görüntülər qısa zamanda sosial şəbəkələrdə paylaşılıb və geniş müzakirələrə səbəb olub. Ermənistanın öz ordusunun sıralarına qocaları və qadınları cəlb etməsi nə ilə bağlıdır?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, son illərdə Ermənistanın siyasi-ictimai çevrələrində qadınların hərbi xidmətə çağırılması ilə bağlı başlayan müzakirələr davam etməkdədir: “Ermənistanda davam edən acınacaqlı sosial-iqtisadi vəziyyət kişilərin kütləvi sürətdə ölkəni tərk etməsi ilə xarakterizə olunur və işçağlçı ölkənin üzləşdiyi demoqrafik fəlakət ordu strukturunu məhv edir. İndi isə Ermənistan orduda yaşanan kadr böhranını qadınların hesabına həll etməyə çalışır. Adətən, qadınları orduya ehtiyacdan çağırırlar. Yəni kişi çatışmazlığı olanda növbə qadınlara çatır. Ermənistanda valideynlər oğlan övladlarını 16 yaşa çatmamış ölkədən çıxarıb, başqa ölkələrdə oxumasına və yaşamasına şərait yaradırlar. Bir sözlə, erməni valideynlər övladları hərbi qeydiyyata düşməzdən öncə onları xarici ölkələrə yollayırlar. Çünki Ermənistan cəmiyyəti gənclərin işğalçı, separatçı rejimin tərkibində işğal olunmuş Dağlıq Qarabağda xidmət etməsinə etiraz edir. Həmin etirazlar dəfələrlə səslənib. Biz bu tendensiyanı hələ ərazilərimiz işğal altında olanda müşahidə edirdik. 44 günlük müharibədə ermənilərin burnu yaxşı ovulduğu üçün bu tendensiya daha da artıb. Məsələnin əsas məğzi ondan ibarətdir ki, ölkədə çağırışçı çatışmır. Bu da Ermənistanı qadınları orduya cəlb etmək məcburiyyətində qoyub. Təbii ki, Ermənistan kişilərin çatışmazlığı səbəbindən bu addımı atır. Eyni zamanda, Ermənistanda əhalinin sosial durumun ağırlaşması səbəbindən kişilər qazanc məqsədilə xarici ölkələrə axışır. Ermənistan ordusunda şərait dözülməzdir. Prinsipcə, Ermənistan ordusu hərbi böhran yaşayır. Hazırda Ermənistanda çağırışla bağlı problemlər var. Ona görə də işğalçı ölkənin ordusunda qadınların kütləvi şəkildə hərbiyə cəlb olunması məsələsi bir neçə dəfə müzakirə edilib. Bu proses artıq həyata keçirilir və müqavilə əsasında qadınlar silahlı qüvvələrə çağırılır. Ermənistan hakimiyyəti orduda kişilərin yerini qadınlarla doldurmağı düşünürsə, təbii ki, bunun mənfi təsirləri də qaçılmazdır. Ermənistan ordusunda gedən qadınlaşma prosesi həmin ölkənin necə rəzil vəziyyətə düşdüyündən xəbər verir. Sərhədimizdə baş verən son təxribat zamanı Ermənistan ordusunun real vəziyyətini gördük. Çox ümidsiz və yorulmuş vəziyyətdədirlər. Bizim əsgərlər onları təpiklə döyüb mövqelərimizdən çıxarırdı”.
Məhəmmədəli QƏRİBLİ
