Son sərhəd müharibəsindən videolar yaymış hərbçilərə cəza tədbirləri birmənalı qarşılanmayıb...

Tərlan Eyvazov: “Müdafiə Nazirliyi bu istiqamətdə doğru addım atmış olub”

img

Müdafiə naziri Zakir Həsənov keçirdiyi xidməti müşavirədə son sərhəd müharibəsi zamanı bəzi hərbçilərin videoçəkilişlər edib, həmin materialları sosial şəbəkələrdə paylaşması ilə bağlı məsələyə aydınlıq gətirib. Onun sözlərinə görə, bu vəziyyətdən ciddi narahatlıq keçiriblər: "Son günlər dövlət sərhədində gedən döyüş əməliyyatları ilə bağlı bəzi sosial şəbəkə istifadəçiləri tərəfindən qeyri-rəsmi foto və video materialların paylaşılması Müdafiə Nazirliyinin rəhbərliyinin ciddi narahatlığına səbəb olub".

Nazir bildirib ki, Azərbaycan Ordusunun komandanlığı tərəfindən həyata keçirilən tədbirlər nəticəsində məxfilik rejimini kobud şəkildə pozaraq bu kimi paylaşımları edən bir qrup hərbi qulluqçu müəyyən edilib: "Həmin hərbi qulluqçuların ordu sıralarından tərxis edilməsi barədə qərar qəbul olunub, onların törətdiyi əməllərə hüquqi qiymətin verilməsi üçün toplanılan materiallar hüquq-mühafizə orqanlarına göndərilib".

Maraqlıdır ki, müdafiə nazirinin bu açıqlaması birmənalı qarşılanmayıb. Sosial şəbəkələrdə aparılan müzakirələrdən görünür ki, bəzi vətəndaşlarımız ön cəbhədə olan hərbçilərlə bu cür davranışı təqdir etmir. Onların qənaətincə, həmin hərbçilərlə bağlı daha yüngül cəza növləri seçilə bilərdi. Bəs bu barədə hərbi ekspertlər nə düşünür?

Hərbi ekspert, ehtiyatda olan zabit Tərlan Eyvazov “Bakı-Xəbər”ə açıqlamasında bildirdi ki, Müdafiə Nazirliyinin atdığı bu addım tam doğrudur: “Hətta deyərdim ki, bir qədər gecikib. Hərbi ilə məşğul olan icmalçılar, hərbi şərhçilər bu barədə fikir bildirirdilər ki, ötənilki 44 günlük Vətən müharibəsində hamı nizam-intizama ciddi əməl edirdi. Çox təəssüflər olsun ki, bu qələbə bizi bir qədər arxayınlaşdırıb. Sanki ehtiyatı əldən vermişik. Mənim və bəzi ekspertlərin düşüncəsinə və gəldiyi qənaətə görə, düşmən tərəfi həmin videolardan yararlana bilib. Əsgərlərimizin şəhid olmasında, yaralanmasında və eləcə də bəzi  mövqelərimizin atəş altına düşməsində həmin videoların rolu olub. Müdafiə Nazirliyi bu istiqamətdə doğru addım atmış olub. Düşünürəm ki, belə sərt addımların atılması daha əvvəl olunmalıydı. Xüsusi məxfilik qrifi altında xidmət edən şəxsi heyətin hamısından smartfon tipli telefonların götürülməsi lazımdı. Əslində nizamnamə və verilən təlimatlara görə bu qadağandır. Çox təəssüf ki, kimlərsə qanunu pozaraq həmin vasitələrdən istifadə edib. Bu, qətiyyən yolverilməzdir”.

Sosial şəbəkələrdə yayılmış videolara baxanda, açıq şəkildə görünür ki, Azərbaycan Ordusunun bölmələri cəm halda erməni mövqelərinə doğru gedirlər. Nə ara məsafəsi var, nə komandirin yeri bəllidir, nə əsgərin. Silah çiyində, telefon əldə. Qarşı tərəfi mövqelərindən çıxarmağa cəhd edirlər. Yenə hərənin əlində bir telefon həmin prosesi çəkirlər. Rus dilini bilən biri ermənilərə başa salmağa çalışır ki, onlara heç nə edilməyəcək, ancaq kənarda biri qışqırır, digəri söyüş söyür. Sanki hərbçilər yaxşı kadr tutmaq üçün yarışa giriblər. Bütün ermənilərin də əlində dolu silahlar. Həmin anda, hətta qorxudan belə hansısa erməni əsgəri atəş açsaydı, itkilərimizin sayını təsəvvür edirsinizmi? Kadrlarda görünənlərin bir adı var - hərbi intizamsızlıq…

Məhəmmədəli QƏRİBLİ

Son xəbərlər